1 Eeꞌnoko aaꞌmuuꞌ ning Jooni, “Narung karavoto daarieai tee-anko koosinung Epesesie dootuuꞌnupoong tanatavurimaung-anko. Aaꞌpeaing, ‘Aung kara tee ˜keura-taa beentoꞌ tampanaange kompuri otomaung bakaang eeꞌnoko teing-koo ˜kenaanka-taa araka baꞌnang kooro-kooning-koo meuꞌke nanukooꞌ. Teie aaꞌpuing, 2 “Ninge tee dakaang nko-nkonanka noruꞌansi oꞌnong poreꞌ kompemanaꞌ aaꞌnaꞌ mintoontarama iirauꞌdaravaꞌ. Eeꞌnoko orenanka ninka otori domang aaꞌnaꞌ mankiꞌdoma dake baakeeneveri siraꞌperikooꞌ teing biiꞌka daang kara okovuri nkanuka tamparimaing. 3 Ninge noruꞌansi oꞌnong pankaroong banainge mankiꞌ kompeuꞌnaꞌ mintoontarama iirauꞌdaravaꞌ poreꞌ kompema nkaang miring-koo, eeꞌnoko teeꞌ nkorarama tee konteroaung. 4 Teka daꞌ narung kapooꞌ ning-koo orakaꞌ apukaꞌdari otong, dake ning tee piaamekoꞌnaꞌ enang piaameaꞌ otong. 5 Norunoruꞌeai teeꞌ tero otokoꞌnaꞌ enang duaꞌdarara otoinooꞌketa eeꞌnoko enang napoꞌ bereꞌdarara teing nko-nko tero nkovekoꞌning nkoveai. Tee tee bereꞌdaravaruko ning mera tee dakaang daamu baꞌnang tontaꞌampaing otomanooꞌketa. 6 Aung tampara aarumo daꞌkoo otong, dake tee munteꞌemaung teing nko-nko oreng Nikolas-nupoonge nkoaamaing, tee aarumo tee ninge munteꞌamaunge. 7 Baa tee naning punkang-poꞌnunge tee tampaꞌ taaravuaing tee kapooꞌ Tanuaang Meekunge minkuvumaung dootuuꞌnupoong-koo osi kante-koo. Baata teing parapaara puruꞌaavaining tee tauraꞌ avorompaing tee koiꞌ domang-anta-koong sinang maaꞌaavaꞌnaang teke Kumponing bakanamono-koo meerooꞌke otomaung-koong.” ’ ”

8 “Napoꞌ narung karavoto daarieai tee-anko koosinung Simeenai dootuuꞌnupoong tanatavurimaung-anko. Aaꞌpeaing, ‘Teie ookara kapooꞌkoo tutuntoma eeꞌnoko oꞌdoma otomaunge, eeꞌnoko boora napoꞌ domamparuꞌ aaꞌnunge aaꞌpuing, 9 “Ninge tee dakaang nko-nkonanka, arikananka eeꞌnoko ataꞌoiꞌdari otomanaꞌ noruꞌansi oꞌnong, teka daꞌ tee tanuaang-aape maneenara. Napoꞌ teinge Juꞌnupoong tamparimainge orakaꞌ minkuraamanaꞌ noruꞌansi oꞌnong, teka teinooꞌ Juꞌnupoong masikeng deeaꞌ. Teing teing Sietaniꞌ bakanavitu-kooning. 10 Aroreaukaꞌ teing-koo kapooꞌ arikananka dake kuneꞌeaining-koo. Ee aung, Sietaniꞌke tee paara-anta-koo diiꞌkoo niiꞌning kiimatanava-koo sipuriiꞌnaang, kivora doong-koo arikung-koo otoriiꞌnaang, teka tee arooꞌdariri motekaroꞌnuka otoriaing bane booꞌ dovang-koo, eeꞌnoko makuꞌkoo ninge tee diiꞌ piiko-nupoong avuavuꞌ tampara arompima tee baakopo domampari otoꞌkoong kuruntampiaing. 11 Baa tee naning punkang-poꞌnunge tee tampaꞌ taaravuaing tee kapooꞌ Tanuaang Meekunge minkuvumaung dootuuꞌnupoong-koo osi kante-koo. Baata teing parapaara puruꞌaavaining teinge tee kemuꞌkanung booꞌpari otoꞌ toraꞌpaavaukaꞌnung.” ’ ”

12 “Napoꞌ narung karavoto daarieai tee-anko koosinung Peekamamiꞌke dootuuꞌnupoong tanatavurimaung-anko. Aaꞌpeaing, ‘Teie bainatu ookamenta irintoꞌ kompui otomaunge aaꞌpuing, 13 “Ninge dakaang nko-nkonanka eeꞌnoko teꞌ daꞌ otoinooꞌ noruꞌansi oꞌnong, teꞌ eeꞌnooꞌ Sietaniꞌ daurarong˜ deempari otomanooꞌ. Teka dake tee nkaang miring pinkaꞌei otomaung eeꞌnoko dakaang masikaꞌanta ning-koo teeꞌ nariꞌ pinkaꞌari otomaunge, bane tee Antipas ning-koo arooꞌari motekaroꞌari kara tampaꞌ siraꞌpukoꞌnung diiꞌkoo meuꞌka tavaioꞌ teka eeꞌnooꞌka Sietaniꞌ otomanooꞌka. 14 Teka daꞌkoo kapooꞌ ninge niiꞌning okiꞌning aarumo oreng otoko ooamaang, aaꞌnoko diiꞌkoo niiꞌninge tee Beelamu bakaang nau-anta kompai otorong, teie eeꞌnarai Baalakaꞌ Isireeli-nupoong duaꞌantanaꞌ nau-antavuuꞌnung. Aaꞌnoko tee taamang kumponing daang-koong-koo dariniiꞌ naiaavaꞌnaang aavavuruꞌ, eeꞌnoko napoꞌ kaukauro-koong aarumo nkoaavaꞌnaang siong-antavuruꞌ. 15 Napoꞌ niiꞌninge diiꞌkoo Nikolas-nupoong biikaang nau-anta kompai otorong, tee ninge munteꞌamaung. 16 Temuriiꞌketa bereꞌdariai. Bereꞌdariaruko deekoꞌ tee ning namuꞌke diiꞌanko mora turamparamaꞌnaang teing teie bainatue nkaang karang-etainge. 17 Baa tee naning punkang-poꞌnunge tee tampaꞌ taaravuaing tee kapooꞌ Tanuaang Meekunge minkuvumaung dootuuꞌnupoong-koo osi kante-koo. Baata teing parapaara puruꞌaavaining ninge tee taamang koreꞌnang paninung avorompaing kansiꞌnupoong-eta bakuꞌniiꞌ, napoꞌ tee kapang kakaara avorompainge narunaꞌ narunaꞌ, nkanooꞌ kuung tung-koo tauraꞌniiꞌ taaꞌniꞌanta, tee miring nerakung biikaang daariniiꞌ tereꞌkoo. Naninge noruꞌuaꞌ tee miring, teka teie tereꞌ nkavuainge baka noruꞌui otong.” ’ ”

18 “Napoꞌ narung karavoto daarieai tee-anko koosinung Taiatairai dootuuꞌnupoong tanatavurimaung-anko. Aaꞌpeaing, ‘Teie Kumponing Bauringe duta ntaꞌpinaꞌ urung naning tupuꞌui ooe, eeꞌnoko bakaang kauꞌ baraasi˜pinaꞌ ntaꞌke iivaiꞌniiꞌ pinaꞌ oroꞌnaꞌ aaꞌpumaang, 19 “Ninge tee dakaang nko-nkonanka noruꞌansi oꞌnong, napoꞌ tee dakaang piaa eeꞌnoko tee masikaꞌanta eeꞌnoko napoꞌ teing nantoong pakuerimanaꞌ. Eeꞌnoko parapaara-koo iirauꞌdaravarukooꞌ, eeꞌnoko enang noruꞌansi oꞌnong aaꞌnaꞌ masikaꞌ mintoontaramaang tutunaꞌnooꞌ divuꞌantavei. 20 Teka aung kapooꞌ ninge daꞌkoo ooamaang, dake teni manikuma Jesabel baka nakaronani˜ tamparamai tauraꞌpeioꞌ nau-antavarama nkaning botovotonaaꞌnuka akoꞌke beꞌantavurimaung. Eeꞌnoko aaꞌning-koo barevurikooꞌ: kaukauro nko eeꞌnoko kumponing daang-koong-koo darimpaamaung taamang nai-koo. 21 Ninge tee teni batei avonsing bereꞌaraaꞌnaang, teka teni piavoaruing bereꞌkoo, teieta bakaang aarumo kaukauro nko-ita. 22 Ee aung, teni teni ninge enang sisikeera pankaing-koo sipamaꞌnaang eeꞌnoko teing teni ninka nariꞌ nampeesi orariaamaing kiimata pankaing-koo siparamaꞌnaang, teing biikaang orara nko-nko-ita bereꞌariaruko deekoꞌ. 23 Eeꞌnoko tenie baurukaaꞌ dupisiꞌarampainge, ookara dootuuꞌnupoonge osi kante-koo noruꞌmaavainaꞌ ning tee eeꞌnara nantoong biikaang onou domang-koo noruꞌansi oꞌnoing. Eeꞌnoko ninge eeꞌnarai nantoong narunaꞌ narunaꞌ kante nkoverimanaꞌkoo bariꞌdampiaing. 24 Teka diiꞌ niiꞌning Taiataira-nupoong tee temuriiꞌ nau-anta siomperiaung, napoꞌ barerariarukooꞌ tee-koo niiꞌninge Sietaniꞌ bakaang makensiꞌnung tampaamaung-koo. Ninge aaꞌdampimang diiꞌkoo tee niiꞌning kapooꞌ mankiꞌ panteꞌampaukaꞌnung. 25 Teka tee kapooꞌ enang komperi otoing tee tampaꞌ pinkaꞌeri otoaing bera ning moainooꞌke basi. 26 Baata teing parapaara puruꞌaama nkaang nko-nko kompai otoroaining bera botu basinooꞌke, ninge tee teing iriꞌpoꞌnupoong deeng-antavarampaing ookara nantoong-koo amutemuuꞌkoo daua teing tanata-koo. 27 Ning tee Mmaꞌke temuriiꞌ iriꞌ amuuꞌnung Daari Meekunge aaꞌpumanaꞌ,