1 Teketa temono auning-nko makosinamono duaꞌarako ooansi oꞌnoko napoꞌ narung koosinung paning-eta depeto siaruꞌ. Tee tee aaꞌnaꞌ purintoꞌ, eeꞌnoko aung kansiꞌ aaꞌnaꞌ arakavuuꞌ bakaang sisisiisie. 2 Eeꞌnoko aurong tee bakei aaꞌnaꞌ purintoꞌke bokuma aaꞌpuuꞌ, “Duaꞌaring, duaꞌaring, temono Babiloniꞌnamono, osi pankamono. Enang tee maꞌnari biikaang osi deemparing. Ookara tanuaang orananka eeꞌnoko bareng orananka otoꞌdoma deemparing. 3 Aiꞌ temono temono ookara kansiꞌ kante-koo-nupoong kara masikung oovunaare ninka pituvui uaini pituniiꞌpinaꞌ nai-antavuruꞌnamono maroita iriꞌ nka-koo. Tee aarumo auning-koong-pinaꞌ. Eeꞌnoko ookara dauraronankai kansiꞌkoo-nupoonge teeꞌ nariꞌ auning-koong aarumo nkoaakoꞌnung temono ninka nariꞌ, eeꞌnoko nantoong kansiꞌnupoong bavevaave nkoaakoꞌnung deepoꞌ kavonankai maantoꞌantavarikooꞌ temono bakaang aarumo karakaraaꞌkoong-koo.”

4 Teketa napoꞌ narung aurong paning-eta karoma aaꞌpuko taaravantuꞌ, “Temono-ita tontaꞌdariai diiꞌ nkaning nantoong, tee-koo temono-koong-koo aarumo orara-koo tapoꞌdariaukaꞌnaꞌ, eeꞌnoko napoꞌ teie bakananka kiimatanankai konturiaukaꞌ aaꞌnaꞌ. 5 Aiꞌ temono-koo nko-nko orarananka aaꞌnaꞌ dau basinooꞌ iꞌnumparako Kumponinge tasiꞌpuring. 6 Teeꞌ masikaꞌ Kumponing bakaning orakaꞌ nkovurimanaꞌ makuꞌkoo nkoveriaing-namono, kapooꞌnanka nkovuining-koo kemuꞌkai makuꞌeriai. Nkovurimanaꞌketa dau basinooꞌ nkoveriai-namono. 7 Tee-koo baka deto basi-antavaramaung-koo tamung kavonanka barampuma kaꞌnumparavaꞌ otoi temono maukoverima toraꞌantaveriaing bakaang taarapiika-koo makosinaꞌ. Baka eeꞌ noruꞌarakooꞌ biivimparama, aaꞌpukooꞌ, ‘Ning bakei ovorinaang, naaro deeaꞌ, orarunsimaravaꞌ oꞌnoainani.’ 8 Teeꞌkoo niiꞌnaꞌmung arikanankai kuung deempura toraꞌantavuainani, aaꞌninge: booꞌbooꞌ, orarunsi, eeꞌnoko peera. Eeꞌnoko ntaꞌke taivura opuai, aiꞌ tee Ovoring Kumponing tee purintoꞌ teni kiimatavuaing.

9 “Tenang teinge dauraronankai ookara kansiꞌkoo-nupoonge teni ninka nariꞌ aunimpeema kavo tankampeemainge ooaara tee ii teni taivuko teing teing orarunsiarima birompariaing teni-koo. 10 Teinge isipoꞌ donkonai aaꞌnaꞌ avoreai teni toraꞌantavuko aaꞌpaavaing, ‘Piaaruꞌ, piaaruꞌ, bakei, osi pankaing, Babiloniꞌ purintoꞌ. Bakei naꞌmung doong-koo okiꞌning batei-koo kiimata ninka keraꞌdari.’ 11 Ookara kansiꞌnupoong kavonanka teka mooꞌaama baaveaamaing teinge birompariaininge, orarunsiarima temono-koo napoꞌ biikaning kavonanka naninge teka mooꞌevuriaukaꞌnung noruꞌaama. 12 Teing aing aaꞌning kavonanka: kooro, silivaꞌ, kapananka tampeng mooꞌ aaꞌnaꞌ pankeng-kooning, eeꞌnoko dukuꞌ, napoꞌ baarong amutemuriiꞌ aaꞌning: mootuꞌnanka, naankuviraaꞌ, napoꞌ dauraronuka biikaning duaana-pinaꞌ iiraampumaing; eeꞌnoko ookara koiꞌnanka tampaꞌ nuuraaꞌnanka, eeꞌnoko ookara kapooꞌnanka kauꞌ karenaumonanka-koo kainta-koo nkoniiꞌnanka, napoꞌ koiꞌnanka-koo nkoniiꞌnanka mooꞌ pankeng-kooning, eeꞌnoko boronsi˜nanka, aininanka, napoꞌ kapang miring maabolo. 13 Napoꞌ nariong kavonanka aing eeꞌ oroꞌ: tampaꞌ nuuraaꞌ kapaꞌnung sinamong-koong, napoꞌ mono-sisiꞌkooning, eeꞌnoko amutemuriiꞌ kanteng parankinsensi dovang betuꞌkoo ii tampaꞌ nuuraaꞌnanka, napoꞌ niiꞌnamuriiꞌ duuni miring meea, napoꞌ uaini, eeꞌnoko oliveꞌkoong duuni, eeꞌnoko napoꞌ palaua, uiteꞌ, boromakaꞌnanka, eeꞌnoko sipisipiꞌ, oosinanka, napoꞌ kaarisinanka, eeꞌnoko nantoong botovotonaaꞌnuka biikananka tanuaananka ninka baaveaarimaing.

14 Teinge bavevaave-nupoonge temono aaꞌpaavaing, ‘Teinge sinanankai dake domange aaꞌnaꞌ karaaꞌemainge tee enang siꞌdaing. Ookara kavokavoro-nanka dakaosiꞌnanka teinge enang doomoꞌuringe, napoꞌ dake kompeaukaꞌnung.’ 15 Eeꞌnoko teing kavonanka mooꞌaama eeꞌnoko baaveaama kavo konsiiaamaing temono-koo enang tee isipoꞌ donkonai avoroꞌ ninka otorooꞌnaang temono toraꞌkuko ooai, orarunsiarima birompaama. 16 Eeꞌnoko bokiaama aaꞌpaavaing, ‘Piaaruꞌ, piaaruꞌnamono! Bakei osi pankamono, baarong tampenge mooꞌ pankeng-kooninge nopaꞌdaramai iiraampumainge eeꞌnoko urunankai, eeꞌnoko aaꞌninge bauntarakooꞌ: kooro, kapananka mooꞌ aaꞌnaꞌ pankeng-kooninge eeꞌnoko dukuꞌnankai. 17 Ookara kavonanka teing bakei batei okiꞌnamuꞌkoo orariariring.’

“Teing aarerinanka oko-nupoong, eeꞌnoko nanuꞌantavaamaing, eeꞌnoko nariꞌ nanaamaing, eeꞌnoko teing pirung-koo avutevuꞌ akaravarimaing, teing isipoꞌ donkonaavaing. 18 Tenang tee ii ooai temono taievuko teinge aaꞌpaavaing, ‘Aremono pa osi pankamono amono-pinaꞌ basinamono otong?’ 19 Sipung tovange pooꞌarima eeꞌnoko biromparima orarunsiariri bokiaama aaꞌpaavaing, ‘Piaaruꞌ, piaaruꞌ, bakaꞌe osi pankaing. Nantoong pirung-nupoong aareri-poꞌnupoong kavonanka-poꞌnupoong deeng-antaveruꞌnamono dakananka kavonankai. Enang tee, batei okiꞌnamuꞌkoo orarirari.’

20 “Teka Kumponing bakaninge aaꞌpaavai, ‘Doturaravai daꞌ paning, amono eeꞌ nkoaring-koo. Eeꞌ diiꞌ meekupoong, kara okovuri nkanuka eeꞌnoko nakaro-nupoong doturariai. Kumponinge tee enang kiimatavuing puing temonoi diiꞌ orakaꞌ nkoruruꞌnung-koo.’ ”

21 Teketa narung koosinunge bakei iirakutai kapang pankaing uiteꞌ putuꞌaamaung-pinaꞌ basi deto itaaꞌura pirung-koo duaꞌuma aaꞌpuuꞌ, “Eeꞌ, aung-pinaꞌ Babiloniꞌ biururuuꞌnang doonko duaꞌkoong, napoꞌ naninge oovuaukaꞌnunge. 22 Tee auronanka kiita-koonanka, teing nantoong kena nkonuka, kovi puunanka eeꞌnoko teing kururung puunuka, napoꞌ naninge taarareruriaukaꞌnunge. Naninge napoꞌ amutemuriiꞌ nko-nko nkovuko daꞌkoo ooaavaukaꞌnunge. Kaku-koong aurong karoko napoꞌ taaravaavaukaꞌnunge daꞌkoo. 23 Daamu-koong araka daꞌkoo napoꞌ arakavaravaukaꞌnunge. Napoꞌ nampeesiariko doturotu-koong aurong taaravaavaukaꞌnunge daꞌkoo. Teing dakaning bavevaave nkonuka teing ookara-koo kansiꞌkoo aaꞌnaꞌ purintoꞌnuka. Dake eeꞌnanie konoꞌerima akovetei siong-antaveruꞌ mmauꞌ nantoong kansiꞌ kante-kooning. 24 Babiloniꞌ tee kiimatavaravaing aaꞌning-koo: tee ereng Kumponing bakaning nakaro-nupoong-koong eeꞌnoko teing niiꞌning bakaning meekupoong-koong eeꞌnoko napoꞌ teing teroita kansiꞌkoo tavaarima dupisiꞌaarikoꞌning-koong, teing biikaang ereng teka temono-koo Kumponinge oovuuꞌnung-koo.”