1 Eeꞌnoko napoꞌ narung koosinung ooansioꞌ paning-eta depeto siaruꞌ, aing aaꞌning kompui: kiiꞌ tee-koong dinkung tumangropa-koong, eeꞌnoko sieena pankaing. 2 Teketa teie tee pakia pankaing mooꞌuuꞌ, tee boruꞌ uripoꞌketa otomaung, tee eeꞌnara tee maꞌnaang, niiꞌnooꞌ Sietaniꞌ. 3 Eeꞌnoko daiꞌura tee-koo dinkung tumangropa-koo kuung duaꞌura dau pinkaꞌuuꞌ narung kokoreiꞌ mareꞌkoo teke otooꞌnaang, napoꞌ nantoong muuꞌ kante-kooning napoꞌ tosivuriarooꞌnaang bera teing mareꞌ narung kokoreiꞌ oparavainooꞌke basi. Teketa napoꞌ tee batei okiꞌnamuꞌkoo sing-antavuaing. 4 Teketa napoꞌ ovontung teing-koo biikaning baꞌnavaꞌnaniꞌnairu-koo baꞌnamparirioꞌ ooarantuꞌ Kumponinge tauraꞌ avuruꞌning nantoong simpeꞌkoo. Eeꞌnoko napoꞌ nantoong-koong uraanooꞌ ooarantuꞌ teing-koong Kumponing bakaang kara ninka Jiisuuꞌ siraꞌpaako kuru napuꞌaaruꞌning-koong. Teing aaꞌning biiko-koo eeꞌnoko tee-koong baka-oo-koo dootuuꞌariaꞌ eeꞌnoko bakaang mooꞌdoꞌanta oroꞌparavaꞌ biikaang oing-koo niiꞌnooꞌ bireng-koo. Teing tee domamparira Karistooꞌ ninka nariꞌ tanatavariaining teing-koo mareꞌ narung kokoreiꞌkoo. 5 Aung tee tutunaꞌnung booꞌketa daaꞌdaaꞌ dootuuꞌnupoong daaꞌariainung. Napoꞌ niiꞌning booꞌnuka teing domampariaꞌ otoroaining bera teing mareꞌ narung kokoreiꞌ oparavainooꞌke basi. 6 Teing tutunaꞌnung daaꞌdaaꞌkoo booꞌketa daaꞌariaining teing meekupoong biraankeariaining. Aming-koo? Nnaꞌ kemuꞌkanung booꞌpari otoꞌke puruꞌuriaukaꞌning deempariri otorong, eeꞌnoko napoꞌ teing teing Kumponing-taang beekaning piristiꞌnuka deempariri otoroaininge, eeꞌnoko tee Karistooꞌ ninka nariꞌ tanatavariri otoroaining teing-koo mareꞌ narung kokoreiꞌkoo.

7 Tenang teing mareꞌ narung kokoreiꞌ oparako, Sietaniꞌ kiimata-ita sing-antavaavaing. 8 Eeꞌnoko teketa ookarai kansiꞌke muuꞌ kantei nanuaing tosivurima, aaꞌninge: Kouku eeꞌnoko Makouku, kare-koo maamu-antavurima. Bakei nantoong karinga oosivuriaing, deeru-koo paapaaꞌke, pirung-koong-pinaꞌ piisiꞌpinaꞌ. 9 Eeꞌnoko tee, teinge ootukunung kansiꞌ opai nanaavaing Kumponing bakaning meekupoong otoroainairu koroai, eeꞌnoko osi pankamono Kumponinge piaavumanamono koroaavai. Teka teeꞌ koroai otoroko ntaꞌke paning-eta depeto duaꞌarara taivuriaing teing. 10 Eeꞌnoko tee Sietaniꞌ teing tosivurimaung tee dinkung-koo ntaꞌ piiko ninka urumparamaung-koong-koo duaꞌaavaing, teꞌ eeꞌnooꞌ tee biiko eeꞌnoko tee nakaronara daang minku duaꞌaaresioꞌ otoremanooꞌ. Eeꞌnoko toraꞌkaamatoai ookara batei-koo muung eeꞌnoko doong.

11 Teketa pankaing baꞌnavaꞌnaniꞌ kakaara ooantuꞌ, eeꞌnoko teke tee-koo tee naning baꞌnanui otokoꞌ. Kansiꞌ eeꞌnoko paning tontaꞌaretuꞌ teieta taapoꞌ, napoꞌ oo-koo makotuaꞌ. 12 Eeꞌnoko teka ookara booꞌnuka tee-koo uroꞌkanooꞌke donkonaioꞌ ooarantuꞌ, ookara aaꞌnoko ovontung eeꞌnoko tamunsiꞌnuka, eeꞌnoko teka napoꞌ buukunanka bereꞌuko ooantuꞌ. Eeꞌnoko napoꞌ niiꞌnaneꞌ buuku domantooꞌnaneꞌ teka ooansi oꞌnoko bereꞌuuꞌ teing domampariaining biikaang miring daariari otoinaneꞌ. Eeꞌnoko booꞌnuka teing ookara kapooꞌnanka nkoauꞌning-koo makosinaꞌ simpeꞌuruꞌ teing-koo buukunanka-koo daariariri otoinaꞌ siomparioꞌ. 13 Pirunge teing nantoong pirung-koo boorouꞌning tavoꞌuruꞌ, eeꞌnoko napoꞌ Booꞌ naankai Tutueu teing teka booꞌnuka kompaaresi otoremaing tavoꞌaaretuꞌ, eeꞌnoko ookara narunaꞌ narunaꞌ simpeꞌuruꞌ kapooꞌ nkoauꞌnankai tampui otoinaꞌ. 14 Teketa tenaanka Booꞌ eeꞌnoko Tutueu nariꞌ dinkung-koo ntaꞌ kauoori-poꞌnung-koo duaꞌaaretuꞌ oꞌantavaarema, tee tee kemuꞌkanung booꞌpari otoꞌ, sisikeera oparavaung kontoma. 15 Baata nantoong biikaang miring oovuriaruuꞌning tee buuku domantooꞌkoo teing teneꞌkoo domampariaining biikaang miring daariari otoinaneꞌkoo teing teing tee-koo dinkung ntaꞌ kauoori-poꞌnung-koo doonko duaꞌaaruꞌning.