1 Eeꞌ masikaꞌ, diiꞌkoo narunge tee aaꞌpupeuꞌ: Teing bakei oreng dake ning naumemaing. Teka ioꞌ noruꞌeai mmaikoꞌ: Daꞌ teeꞌ nariꞌ oroꞌke, teing-pinaꞌ. Teing dake aaꞌperima: Teing oreng, kiimatavariaining, teeꞌ minkuema tee, daꞌ nariꞌ teing ninka minkuraramang daꞌ teeꞌ nariꞌ nkoraramaung-koo. 2 Dake aaꞌpepeuꞌ: Niiꞌke tee noruꞌampiri otong tee Kumponing-nung kiimata makosinaꞌ tavoꞌaravaing teing-koo nantoong-koo temuriiꞌ kapooꞌ nkoaamaing-koo. 3 Nka ninge eeꞌpinaꞌ nauramaang mmaikoꞌ: Nka dake teing naing tuumpierimaang dakanooꞌ noruꞌdaravaꞌ teeꞌ nariꞌ nkoraramanooꞌ? Dake eeꞌ noruꞌemaung ee: “Ninge baariꞌampaing Kumponing bakaang kiimata.”? 4 Teie aaꞌnaꞌ piaaruma daꞌ pankaroong kiimataruaꞌ, boimpui nentumang bereꞌdaraaꞌnaang dakaang orakaꞌ nko-ita, eeꞌnoko noruꞌeaꞌ otong ee? 5 Tee dakaang domang ivekung bereꞌdaravaunge mmauꞌ deeng-antavemaung tee iirananka Kumponing-etananka, eeꞌnoko tee oroꞌparavaing asiranaꞌmung bakaang kiimata koontoꞌnanka siraꞌpuainaꞌmung. 6 Teie tee mooꞌ avuriaing ookara nantoong biikaang nko-nkoi siompui otoinaꞌ. 7 Teing nantoong tampaꞌ nariꞌ nkoaamaing eeꞌnoko besiꞌaakooꞌ tee meenasi Kumponing-etaing, pankaing-anta, eeꞌnoko domaang booꞌpaaꞌ, teie teing domaang tampaꞌ nariꞌ otoꞌ avuriaing. 8 Teka teing turang nkoaamaing eeꞌnoko kara masikung siompaavarukooꞌ eeꞌnoko orara aarumo siompaakooꞌ teing tee Kumponinge aaꞌnaꞌ iiravoitaaꞌ tavuriaing. 9 Kuneꞌaavaing teinge tee poreꞌanta orarunsi ninka ookara nantoong orakaꞌ nkoarimainge, tutuntoma Juꞌnupoong eeꞌnoko napoꞌ damaꞌke Juꞌdeeaing teeꞌ nariꞌ. 10-11 Eeꞌnoko tee meenasi, miring pankaing eeꞌnoko mooa kompaavaing teinge tampaꞌ nkoarimainge tutuntoma Juꞌnupoong eeꞌnoko napoꞌ Juꞌdeeaing, Kumponinge nariꞌ basinooꞌka noruꞌurimaung-koo.

12 Teing nantoong orakaꞌ nkoarimaing Moosesi-nung botoi kuung deempuriaruko keraꞌanta kuneꞌaavaing, bane tee noruꞌaavaꞌ nkoaamaunge. Eeꞌnoko teing teie botoi kuung deempurioꞌ orakaꞌ nkoarimaing tee teie botoi simpeꞌuriaining. 13 Naninge tee, tee boto taaravupeuꞌ nka tee siompuarura Kumponing-ankoi koontoꞌ deemparavarupeuꞌ. Teing muteroꞌaamaing naing koontoꞌnuka tampuriaing. 14 Niiꞌning Juꞌdeeaing Moosesi-nung boto otoꞌevoroaing, nka tee biiꞌka matauai tampaꞌ nkoaako tee, noruꞌampipeuꞌ teinge tasiꞌpai otong tampara aarumo bane Moosesi-nung boto noruꞌaavainge. 15 Tee matau biikaang tampaꞌ ooampira noruꞌampipeuꞌ kapooꞌnanka botoi minkuvui otoining teing-koo biikaang domang-koo daariari otong. Eeꞌnoko biikaang domange nariꞌ masikaꞌ onouaakooꞌ. Tasiꞌpari otong biikaang noruꞌke niiꞌning namuꞌnaꞌ tuumpivurikooꞌ eeꞌnoko napoꞌ namuꞌnaꞌ pakuvurikooꞌ. 16 Teeꞌkoo, teie doorenang tamparai minkuvui otoinaꞌ ninge siraꞌpamaunge, teeꞌ nariꞌ nkoaravaing teꞌmung asiꞌnaꞌmung Kumponinge Jiisuuꞌ Karistooꞌkoo kuunge koong-antavuriaing biikaang aarumo makensiꞌning noruꞌuitaaꞌ.

17 Enang tee daꞌ Juꞌnupoong-koong tantarama Moosesi-nung botoi pakuruioꞌ daꞌ Kumponing bakaang naning tantarama daangantaramaung deekoꞌ, 18 eeꞌnoko tee boto-koo barerararaiꞌnange Kumponing-nung pia noruꞌei otoing deekoꞌ, 19 eeꞌnoko simpeꞌepeuꞌ kapooꞌ orara eeꞌnoko tampara, eeꞌnoko daꞌ naning mutuu siong-anta deekoꞌ, eeꞌnoko araka teing-koo mutaanang-kooning-koo, 20 napoꞌ nau-antai amakoori-koo, eeꞌnoko kakeꞌii-anta toireꞌkoo deekoꞌ, eeꞌnoko kompei otomaung noruꞌ masikung kinkomparioꞌ tee boto-koo kuung deekoꞌ, 21 daꞌ nantoong nau-antaverimaung daka ee nau-antararavaꞌ otong? Daꞌ bakiaaꞌkoo daankirarama poteverimaung, arekeeꞌ, bakiaaꞌkiaunge? 22 Nampeesi orari-koo poteverikooꞌ. Arekeeꞌ, daka nampeesi orarieaunge? Kumponing tositosinanka maremaarenanka tamperikooꞌ. Arekeeꞌ, maareroaꞌ teing-koo pakuraramaung ee? 23 Bakei daangantaramaung tee boto tampaꞌ noruꞌei otoing tantarama. Arekeeꞌ, Kumponing-nung miring duaꞌantaveaung ee tee boto totoꞌpema? 24 Daari Meekunge teeꞌ nariꞌ minkuvui otong, aaꞌpumaung,

25 Dopaꞌ totoꞌ tee Kumponing-nung taaꞌniꞌanta masikung tampaꞌ taaraveri dei tee boto. Teka totoꞌperiaing deekoꞌ tee boto tee, diikaang dopaꞌ totoꞌ tee-pinaꞌ tamunsiꞌnung deempari otoaing. 26 Teka niiꞌnung naning Juꞌdeeaung dopaꞌ totoꞌ nkavuaruinunge tee boto tampaꞌ siompui dei sirakaꞌpari otong tee makosi, otopeuꞌ tee-pinaꞌ naning dopaꞌ totoꞌ nkavuing-pinaꞌ, bane dopaꞌ totoꞌ nkavuarupeuꞌnunge. 27 Tee eeꞌnara naning, dopaꞌ totoꞌ nkavuaunge boto tampaꞌ tarevui dei, teie tee daꞌ booꞌkoo makosi tantupeuꞌ, daꞌ eeꞌnara boto totoꞌpemaung, bane boto daariniiꞌ eeꞌnoko dopaꞌ totoꞌ kompei otomaunge. 28 Nka naning tamung damaꞌdunung ooꞌooe Juꞌkoong Juꞌ masikung deeaꞌ, eeꞌnoko dopaꞌ totoꞌ masikung tee mono-aapenameng-koong aarumo deeaꞌ. 29 Naning Juꞌ masikung tee, bakaang domang Juꞌpinaꞌ otomaung, Tanuaang Meekunge dopaꞌ totoꞌniiꞌ, tamung boto paara-koong deeaꞌ. Baa tee naning temuriiꞌ aampariꞌ nkavuaing bakaang domang-koo tee, teie daangang nkavuaing Kumponing-eta, nantoong-aapeita deeaꞌ.