1 Ajuohekna ah ulenai ngai, nangni'n keini diangnga inphut angtho-thoa Pathian malung kamintai ringkhuo ah ringnasik ah ning-inchu angnga. Adik, hiwahi, nangni'n hiwa ringkhuo lam hin ninglaring, tuunchu nangni'n Pumi Jisu ramingnga kheella thonasik ah keini'n nina khat-um masokna kinnanei. 2 Ajarchu Pumi Jisu ranak khan nangni kinnaminchuna ngaikha nangni'n ningjet. 3 Nangni inthiangsik khat-um zool-inthaiya inphut pum-inthiang inthiang sik hi Pathian imanuom kha eii. 4 Inkanei pasal nangni rakip in ningnumei le inthiang khat-um kaya kaomma karing ning-inchu sik eii, 5 Pathian kajetmak zaatlop ngai'n taksa imanuom lamma inring kha emaru. 6 Hiwa jarra, nangni tu inkhat innum Christian inkhat diang akatuunmak thomarasu emakli inmani chungnga nemna leimarasu. Khawa katho ngaikha Pumi'n arachaaksik eii tihi matiang khan keini'n kinleiriljei halli keini'n nangnidiang kanatak-ah chongpena kinaleineijei. 7 Pathian in eini omchan inthiangmak ah kaom sik-ah inakoi emak, takkha inthiang sik-ah inakoi eii. 8 Khawa jarra tu e-innum hiwa minchuna kajuimak mi khan miring minchuna ijuimak emak, takkha ama Ratha Inthiang nakapeii Pathian minchuna ijuimak eii.

9 Nangni inkhat li inkhat inriang nasik jarra majiasik arei ommakjei. Ajarchu nangni inkhat li inkhat angtho-thoa inriang sikme tihi nangni ningpumtak diang Pathian in anaminchu suojei. 10 Macedonia ah kangamna rakip diang nangni'n hika-ang inthiang omchan katha ningthojei. Khawa jarra ulenai ngai kakheel doomma omchan katha ningthosik hi kinamasok eii. 11 Matiangnga kinnaleirilpi angnga, ringkhuo kahoiya omnasik, ningchuon ningchuon inngaidonru halli ningtheinuoa ringnasik inthoru. 12 Hinthoa nangni'n akangamna makngai diangnga inphut kayana ningmusik eii khat-um nangnisik ah angme arei kaom kha tu inkhat diang-um inngaimak kha ning esik eii.

13 Takkha ulenai ngai inngamna kaneimak ngai angnga ninmalung minpoong maknasik, akathi ngai jarra inthiang kha nangni'n ningjetsik hi keini'n kinmanuom. 14 Jisu hi athijei halli aringnook jei tihi eini'n ningamna, khawa jarra ama kangamna-ah akathi ngaikha Jisu le inruoiya Pathian in aruoisik eii tihi ningamna eii.

15 Ajarchu tuunna angme keini'n kinnaminchu hi Pumi minchuna kha eii: Pumi ajuoni, aleikaringnga kaom eini'n, aleikathi ngai neek-ah ma-sanumin. 1 Cor 15:51,52

16 Ajarchu Pumi apumtak Marwaanna inphut oong rasale, marwaan tirton kaliankhetpa rasa khat-um Pathian tampaloi rasale inruoiya ajuochumsik eii. Halli Christa kangamna-ah aleikathi ngaikha ma-insa-ah aminringsik eii, 17 khawapha takkhan eini aleikaringseng in intuupnita inmanile inruoiya suumphai chungnga Pumi inmupui nasik lairalak ah nikalsik ejei. Halli Pumi le inruoiya hektik neileiya niomsuom sik ejei. 18 Khawa jarra hiwa chong ngai hin nangni inkhat li inkhat malung insoknaru.