49
Itayacapan camanal Jacob
1 Huan Jacob quinnotzqui itelpocahua huan quinilhui: “Ximonechcahuica huan nimechilhuis cati amechpanos teipa.
2 Noconehua, ximonechcahuica huan techcaquica.
Na niJacob huan amojuanti annoconehua.
Techtacaquilica niamotata, Israel.
3 Ta Rubén, tinoachtohui cone.
Tieliyaya tinochicahualis huan quema titacatqui eltoya quej nopa achtohui iselca notetilis.
Tijpiyas miyac chicahualisti huan tatepanitacayot.
4 Pero ayecmo tielis cati más tihueyi,
pampa tiitztoc quej at cati tehuilana.
Quej nopa eltoc pampa techpinahualti quema timotejqui ipan notapech ihuaya notequipanojca.
5 Simeón huan Leví nelía anicnime pampa san se amonemilis.
Amomachetas anquitequihuíaj san para tatehuilisti.
6 ¡Amo quema nijnequi nijcaquis amocamanal,
yon amo quema nimosentilis amohuaya!
Pampa quema ancualaniyayaj, antemictijque,
huan san pampa anquinejque, anquinmetzpostejque torojme.
7 ¡Tatelchihualtic, quena, tatelchihualtic amocualancayo,
pampa annelfierojtique huan amo antatasojtaj!
¡Nimechsemanas huan anitztose campa hueli ipan nochi tali Israel!
8 Ta tiJudá, moicnihua mitzpaquilismacase.
Huan tiquinitzquis mocualancaitacahua ininquechta huan tiquintanis.
Hasta moicnihua motancuaquetzase para mitztepanitase.
9 Ta tiJudá, tielis quej icone se tecuani cati tacuepili pactoc por nopa tapiyali cati quimictijtoc.
Tielis quej se león cati mopachohua huan moteca talchi,
huan quichiya taya quiitzquis.
Tielis quej se sihua león cati nelía quipiya tetili.
Amo aqui mitzcuesolmacas.
10 Amo aqui huelis quiquixtis nopa tanahuatili cati moteipan ixhuihua quipiyase.
Yon amo aqui hueli quinquixtilis nopa tepos cuatopili cati quipiyase para ica tetatzacuiltise.
Quipiyase tanahuatili para nochipa.
Huan teipa hualas moteipan ixhui cati temacas tasehuilisti.
Yaya cati nelía iaxca nopa tepos cuatopili huan nopa tanahuatili para tanahuatis.
Huan masehualme ipan nochi talme campa hueli quichihuase cati yaya quinilhuía.
11 Elis se tominpixquet huan campa hueli oncas xocomeca mili cati iaxca.
Quiilpis iburro ipan ten hueli xocomeca tzonti cati quinequis,
huan sinta quinequi, quiilpis ipilconeburro ipan nopa xocomeca macuayot cati más cuali.
Quipiyas miyac xocomecat iayo hasta nesis quej huelis ica quichicuenis iyoyo.
Quena, hasta mocahuas quipiyas iayo xocomecat cati temacas nochi imil.
12 Iixteyol elis más yayahuic que xocomecat iayo,
huan itancochhua más chipahuac que lechi.
13 Ta tiZabulón, moteipan ixhuihua itztose iteno hueyi at,
huan nopona ajsise miyac cuaacalme.
Motal ajsis hasta tali Sidón.
14 Ta tiIsacar, moteipan ixhuihua elise tejtetique quej se tapiyali cati quimati tamama etic.
Mosiyajquetzase campa quintzacuaj borregojme.
15 Quema quiitase quenicatza nelía cuali amotal para ipan anmosiyajquetzase huan quenicatza nelía yejyectzi,
huajca motancuaquetzase huan mocuitapantise para tamamase.
Huan yon amo molinise moteipan ixhuihua quema quinchihuase ma tequipanoca san tapic.
16 Ta tiDan, ta huan moixhuihua antetajtolsencahuase quej quinamiqui pampa anelise se hueyi familia ipan tali Israel.
17 Moteipan ixhuihua elise quej se cohuat cati itztoc ojtipa,
huan quintzacanía inincotzta cahuayojme huan quintahuisohua cati tejcotoque ipan cahuayojme.
18 ¡TOTECO! Nijchiya para techmanahuis.
19 Ta tiGad, miyac soldados hualase huan quintehuise moteipan ixhuihua,
pero teipa inijuanti moicancuepase huan quinquixtijtiyase.
20 Ta tiAser, moteipan ixhuihua quipiyase tacualisti cati cuali.
Quena, temacase tacualisti cati ajhuiyac quej cati quicuaj huejhueyi tanahuatiani.
21 Ta tiNeftalí, moteipan ixhuihua elise quej se masat cati nemi campa quinequi huan cati quintacatiltía yejyectzitzi pilconemasatzitzi.
22 Ta tiJosé, moteipan ixhuihua elise quej se cuali cuahuit cati quitoctoque campa ameli.
Temaca miyac itajca huan imacuayohua moscaltía miyac hasta quipano nopa tepamit cati tilahuac.
23 Masehualme quincualancaitase moteipan ixhuihua,
huan quinmajcahuilise cuataminti huan nochipa quinmacase tequipacholi.
24 Pero moteipan ixhuihua quiquetzase inincuahuitol xitahuac,
huan amo huihuipicase inimax quema quitequihuise pampa elise tejtetique.
Quena, tatanise pampa noTeco Dios, Yaya Cati Quipiya Nochi Chicahualisti quinpalehuis.
Yaya quinmocuitahuis pampa yaya totamocuitahuijca tiisraelitame.
Yaya nopa Hueyi Tet cati techmanahuijtoc miyac huelta.
25 Quena, ma amechpalehui ininTeco mohuejcapan tatahua.
Ma amechtiochihua ta huan amoteipan ixhuihua yaya Toteco Dios cati quipiya nochi chicahualisti.
Ma quintiochihuas moteipan ixhuihua ica miyac tatiochihualisti quej at cati huala ten huejcapa ipan ilhuicac,
huan cati huala huejcata ipan hueyi at huan quichihuas ma moscaltis amomilhua.
Ma mitztiochihuas ta huan moteipan ixhuihua huan mosihuajhua.
Ma amechmacas miyac amoconehua cati moscaltise cuali.
Ma tahuel momiyaquilica amotapiyalhua.
26 Quena, José, Toteco ma mitztiochihua, yaya cati noTeco na, nimotata.
Ni tatiochihuali momiyaquilis hasta ajsis ipan nopa tepeme cati huejcahuase para nochipa.
Nochi ya ni elis nopa tatiochihualisti cati ta tijpiyas, José,
pampa Toteco mitziyocatali ten moicnihua para tielis tiinintanahuatijca.
27 Ta tiBenjamín, moteipan ixhuihua tatanise quej se tepechichi.
Ica ijnaloc quicuase cati quimictijtoque,
huan hasta tiotac quipiyase cati mocajtoc para temajmacase.”
28 Ya ni nopa 12 itelpocahua Israel huan nopa tatiochihuali cati inintata quinmacac. Quinilhui cati quinamiqui para sesen quiselis pampa Toteco quinextili cati panos ica ininteipan ixhuihua sese ten inijuanti.
Imiquilis Jacob
29 Nojquiya Jacob quinmacac itelpocahua ni tanahuatili: “San quentzi polihui para nimiquis. Techtalpachoca inihuaya nohuejcapan tatahua ipan nopa ostot cati eltoc ipan ital Efrón nopa heteo. 30 Quena, techtalitij nopona ipan tali Canaán ipan nopa ostot ipan nopa mila cati itoca Macpela, iixpa Mamre. Nopa cati Abraham quicohuili Efrón para ipan ma quintalpachoca nochi iteixmatcahua. 31 Nopona quintoctoque Abraham ihuaya isihua, Sara, huan Isaac huan isihua, Rebeca, huan nopona nijtalpacho Lea. 32 Nopa tali huan nopa ostot cati eltoc nopona quincohuili nopa heteo tacame.”
33 Huan quema Jacob tanqui quinnahuatía itelpocahua, motejqui ipan itapech huan mijqui.