“Ama tijpiyaj se altepet cati cuali huan quipiya chicahualisti.

TOTECO cati techmaquixtijtoc, techyahualojtoc quej se hueyi tepamit para techmocuitahuis.

2 Xiquintapoca nochi nopa caltemit para ma calaquica nochi nopa masehualme cati itztoque xitahuaque.

Xiquincahuaca ma calaquica nochi cati temachme.

3 TOTECO, mojmosta tiquinmacas yoltasehuilisti nopa masehualme cati motemachíaj ipan ta, nochi cati quisenhuiquilíaj mitztemohuaj.

4 Tayohua tonaya ximotemachica ipan TOTECO pampa san yaya TOTECO Cati Más Quipiya Tanahuatili huelis amechmanahuis para nochipa.

5 Yaya quinechcapantalía nopa masehualme cati mohueyimatij.

Quintepexihuía nopa altepeme cati ipan itztoyaj.

Quintahuisohua hasta talchi huan quihuelonía inintepa.

6 Ama nopa teicneltzitzi cati quintaijyohuiltiyayaj ipan moquejquetzaj cati mocahua ten inialtepe.”

7 TOTECO ta tijchihua para nopa ojti cati quitoquilíaj cati xitahuaque moixpa amo cana fiero, yon amo ixtejcolis.

Pampa ta, TOTECO, amo titemaca se ojti cati fiero o cati amo cuali. Ta tijxitahua nopa ojti huan tijchihua yejyectzi.

8 TOTECO, tojuanti tijtoquilíaj moojhui cati xitahuac huan timochiyaj san ipan ta.

Techpactía miyac tijchihuase cati ta tijnequi.

Ipan toyolo san tijnequij timitzhueyichihuase.

9 Seyohual nimitztemohua ica nochi noyolo.

Huan quema niisa ica ijnaloc noja nimitztemohua.

Pampa fiero masehualme amo quicahuase quichihuase cati amo cuali huan quipehualtise quichihuase cati xitahuac,

hasta quema ta tihualas para tiquintajtolsencahuaqui huan tiquintatzacuiltiqui cati itztoque ipan ni tali.

10 Pero masque tiquinnextilía teicnelijcayot nopa masehualme cati fiero ininemilis, amo moxitahuaj.

Quisehuiquilíaj quichihuaj tamanti cati amo cuali ipan nopa tali campa sequinoc quichihuaj cati xitahuac.

Huan amo quichihuilise cuenta mohueyitilis, TOTECO.

11 Inijuanti amo mitztacaquilíaj quema tiquintacahualtía.

Huan quema tijtanana momax para tiquintatzacuiltis, inijuanti amo quiitaj, yon amo quichihuilíaj cuenta.

Pero xiquinnextili quenicatza tiquinicnelía momasehualhua, huan pinahuase.

Huan nopa tit cati ticajoctoc para mocualancaitacahua ya eltoc para quintzontamiltis.

12 TOTECO, ta cati techmaca tasehuilisti.

Nochi cati quisa cuali cati tojuanti tijchihuaj eltoc pampa ta tijchijtoc nopa tequit ipan tojuanti.

13 TOTECO ta cati titoDios, quipiya miyac tonali technahuatiyayaj sequinoc tetecome,

pero ama san ta timitzhueyitepanitase.

14 Nochi inijuanti cati tiquintequipanojque, ama ya mictoque huan ayecmo hualase sempa,

ixpolijque huan ayecmo quema motananase.

Pampa ta tiquintatzacuilti huan tiquintamiixpolihuilti.

Ama ayecmo aqui quinelnamiqui.

15 TOTECO, ta tiquinmiyaquilijtoc momasehualhua ipan total.

Tijchijqui para más ma monexti mohueyitilis.

Huan tijchijtoc total nojquiya ma eli más hueyi.

16 TOTECO, quema israelitame taijyohuiyayaj, timitztemojque.

Quena, quema ta techtatzacuilti, timotatajtijque ica ta.

17 Tiitztoyaj moixpa quej se sihuat cati momimilohua ica tacuajcualoli quema quitacatiltía icone.

18 Tojuanti tiitztoyaj ica tacuajcualoli huan tichocayayaj quej se sihuat,

pero san tapic titaijyohuijque pampa amo teno tijtacatiltijque.

Amo tihuelque titatanise para total huan amo teno quisqui ten totaijyohuilis.

Amo aqui tacatqui para mochihuase más masehualme ipan ni taltipacti.

19 Pero tijpiyaj ni camanali cati temachti:

Nochi cati ya mictoque cati moaxcahua TOTECO, sempa moyolcuise

Huan inintacayohua sempa motananase campa quintalpachojtoque.

Quena, nochi cati itztoque ipan ostot sempa isase huan huicase ica paquilisti.

Itaahuil TOTECO cati temaca nemilisti motalis ipan inijuanti quej elisquía ajhuechti.

20 Annomasehualhua, xiyaca amochajchaj huan xijtzacuaca amocaltehua campa anitztose temachti.

Ximotatica se talojtzi hasta quema ya panotos icualancayo TOTECO huan ya quintzontamiltijtos nochi icualancaitacahua.

21 TOTECO quisas ten ichaj huan hualas ipan ni taltipacti para quintatzacuiltiqui nochi masehualme por inintajtacolhua.

Huan monextis ajquiya temictijtoc ipan ni taltipacti huan ayecmo huelis motatis.

Mopanextise nochi cati quihuicaj tajtacoli.