Icamanal Toteco Cati Quiijcuilo Mateo
1
Ihuejcapan tatahua Jesucristo
(Lc. 3:23-38)
1 Ni amat quipiya inintoca ihuejcapan tatahua Jesucristo. Yaya se iteipan ixhui David huan se iteipan ixhui Abraham.
2 Abraham cati itztoya huejcajquiya quipixqui se icone cati quitocaxti Isaac.
Huan Isaac quipixqui se icone cati quitocaxti Jacob.
Huan Jacob quinpixqui majtacti huan ome iconehua huan se ten inijuanti elqui itoca Judá.
3 Judá huan nopa sihuat Tamar quinpixque ome ininconehua huan quintocaxtalijque Fares huan Zara.
Huan Fares quipixqui se icone cati quitocaxti Esrom.
Esrom quipixqui se icone cati quitocaxti Aram.
4 Aram quipixqui se icone cati quitocaxti Aminadab.
Huan Aminadab quipixqui se icone cati quitocaxti Naasón.
Naasón quipixqui se icone cati quitocaxti Salmón.
5 Huan Salmón huan isihua Rahab quipixque se inincone cati quitocaxtijque Booz.
Booz huan isihua Rut quipixque se inincone cati quitocaxtijque Obed.
Obed quipixqui se icone cati quitocaxti Isaí.
6 Huan Isaí quipixqui se icone cati quitocaxti David cati moscalti huan elqui nopa hueyi tanahuatijquet.
Huan nopa hueyi tanahuatijquet David quipixqui se icone cati quitocaxti Salomón.
Huan inana Salomón achtohui eltoya isihua Urías.
7 Huan Salomón quipixqui se icone cati quitocaxti Roboam.
Roboam quipixqui se icone cati quitocaxti Abías.
Huan Abías quipixqui se icone cati quitocaxti Asa.
8 Asa quipixqui se icone cati quitocaxti Josafat.
Huan Josafat quipixqui se icone cati quitocaxti Joram.
Joram quipixqui se icone cati quitocaxti Uzías.
9 Huan Uzías quipixqui se icone cati quitocaxti Jotam.
Jotam quipixqui se icone cati quitocaxti Acaz.
Acaz quipixqui se icone cati quitocaxti Ezequías.
10 Huan Ezequías quipixqui se icone cati quitocaxti Manasés.
Manasés quipixqui se icone cati quitocaxti Amón.
Amón quipixqui se icone cati quitocaxti Josías.
11 Huan Josías quipixqui se icone cati quitocaxti Jeconías, huan nojquiya quinpixqui más iconehua.
Josías huan iconehua itztoyaj ipan nopa tonali quema hualajque tali Babilonia ehuani huan quinhuicaque nechca nochi israelitame ilpitoque para quintequipanotij ipan inintal.
12 Huan teipa nepa ipan tali Babilonia Jeconías quipixqui se icone cati quitocaxti Salatiel.
Huan Salatiel quipixqui se icone cati quitocaxti Zorobabel.
13 Huan Zorobabel quipixqui se icone cati quitocaxti Abiud.
Abiud quipixqui se icone cati quitocaxti Eliaquim.
Eliaquim quipixqui se icone cati quitocaxti Azor.
14 Huan Azor quipixqui se icone cati quitocaxti Sadoc.
Sadoc quipixqui se icone cati quitocaxti Aquim.
Aquim quipixqui se icone cati quitocaxti Eliud.
15 Huan Eliud quipixqui se icone cati quitocaxti Eleazar.
Eleazar quipixqui se icone cati quitocaxti Matán.
Matán quipixqui se icone cati quitocaxti Jacob.
16 Huan Jacob quipixqui se icone cati quitocaxti José cati moscalti huan mosihuajti ihuaya María.
Huan María elqui inana Jesús.
Huan Jesús elqui nopa Cristo cati Toteco Dios quititanqui ipan ni taltipacti.
17 Huajca majtacti huan nahui huejhueyi tatame quinpixque ininconehua ten quema Abraham itztoya ipan taltipacti hasta quema Tanahuatijquet David itztoya. Huan seyoc majtacti huan nahui huejhueyi tatame quinpixque ininconehua ten quema David itztoya ipan taltipacti hasta quinhuicaque nechca nochi israelitame ipan tali Babilonia. Huan seyoc majtacti huan nahui huejhueyi tatame quinpixque ininconehua ten quema quinhuicaque israelitame ipan tali Babilonia hasta quema tacatqui Cristo cati Toteco Dios quititanqui ipan taltipacti.
Quenicatza tacatqui Jesucristo
(Lc. 2:1-7)
18 Quej ni panoc quema tacatqui Jesucristo. Inana Jesús quitocaxtiyayaj María huan ya quiijtantoya José huan quisencajtoyaj ipan amat para mocuilis quej momatque quichihuaj. Huan ipan nopa xihuit quema polihuiyaya para motoquilise, José quimatqui para María ya tanemiltiyaya, pero elqui ichicahualis Itonal Toteco cati quichijqui ma conecui. 19 Huan José cati ya eltoya ihuehue María ipan amat, eliyaya se tacat xitahuac, huan amo quinequiyaya quipinahualtis iniixpa masehualme, huajca moilhui más cuali moamasosolos ihuaya María ixtacatzi huan mocahuase. 20 Huan quema José moilhuiyaya quichihuas ni tamanti, quiitac ipan se temicti se iilhuicac ejca Toteco cati quiilhui: “Xitacaqui José, ta tiiteipan ixhui David cati huejcajquiya. Amo ximajmahui para timocuilis María, mosihua, pampa nopa conet cati quinemiltía iijtico, pejqui ica ichicahualis Itonal Toteco. 21 Huan María quitacatiltis se oquichpil huan tijtocaxtis: ‘Jesús’ cati quiijtosnequi: ‘Temaquixtijquet’, pampa quinmaquixtis imasehualhua ten inintajtacolhua.”
22 Huajca nochi ya ni panoc para ma tami cati Toteco Dios techilhui ica tajtolpanextijquet huejcajquiya para teipa panos. Yaya techilhui:
23 “Xiquita se cuali ichpocat cati amo quema itztoya ihuaya se tacat tanemiltis,
huan quitacatiltis se oquichpil huan quitocaxtis: Emanuel.
Emanuel quiijtosnequi: ‘Toteco itztoc tohuaya.’ ”
24 Huajca quema José isac, quichijqui senquisa cati iilhuicac ejca Toteco quiilhuijtoya. Quicuito María quej isihua, 25 huan José amo quinechcahui hasta tacatqui icone. Huan María quitacatilti iachtohui cone, se piloquichpiltzi. Huan José quitocaxti Jesús.