24
1 Huajca Balaam ya quiitztoya para san tapic se masehuali quintelchihuas israelitame pampa TOTECO quinequiyaya quintiochihuas. Yeca Balaam ayecmo yajqui para quichihuas quej se tenahualhuijquet. Yajqui xitahuac campa huelqui tachiyas imelac ipan nopa huactoc tali huan quinitac nopa israelitame. 2 Huan quema Balaam tachixqui huan quinitac nochi nopa israelitame cati quiquetztoyaj iniyoyoncalhua ica pamit, sese ica ihueyi familia imasehualhua, nimantzi Itonaltzi Toteco Dios motali ipan ya, 3 huan pejqui quiijtohua ni camanali:
“Ya ni nopa camanali cati niBalaam, niicone Beor, nijhualica.
Na nise tacat cati cuali hueli niquita cati ininpantis ni israelitame.
4 Nijcactoc icamanal Toteco cati quipiya nochi chicahualisti, huan niquitztoc para yaya cati quipiya nochi chicahualisti huan cati technextilijtoc.
Huan quema nihuetzqui iixpa, techtapohuili noixteyol huan nochi nijmachili.
Huajca ya ni cati techilhui para ininpantis:
5 Nelía paquij iteipan ixhuihua Jacob por nopa tatiochihualisti cati quinchiya.
Tayejyectzi elis campa ininchajchaj israelitame huan nopona oncas paquilisti.
6 Niquita para momoyajtoc ininchajchaj campa hueli ipan huejhueyi tamayamit campa xoxohuic sacapetat.
Nesi quej se hueyi xochimili cati tahuel yejyectzi huan cati nochi temaca pampa eltoc atenti.
Nesi quej se mili ten áloes cati TOTECO quintoctoc.
Itztoque quej miyac tiocuame cati tatocti atenti.
7 Miyac at quipiyase israelitame hasta mocahuas.
Quipiyase at para quiatequise inintatochui.
Quipiyase inintanahuatijca cati más hueyi que nochi totanahuatijcahua.
Huan tahuel hueyi elis itanahuatil.
8 Toteco Dios cati quinquixti ipan tali Egipto itztoc inihuaya.
Yaya ininchicahualis quej se hueyi toro quipiya huejhueyi icuacua.
TOTECO quintzontamiltilis nochi masehualme ipan nochi talme cati quincualancaitaj.
Quena, quinpostequilis iniomiyo, huan quinmictis ica cuataminti.
9 Nopa israelitame itztoque quej se tecuani cati motectoc para mosiyajquetzas,
huan amo aqui motemaca para quiixitis. ¡TOTECO quintiochihuas cati amechtiochihuaj, anisraelitame,
huan quintelchihuas nochi cati amechtelchihuaj!”
Más icamanal Balaam
10 Huajca quema Tanahuatijquet Balac quicajqui nopa camanali cati Balaam quiijto, tahuel cualanqui ica ya, huan momatejtejtzonqui huan quiilhui:
―Na nimitznotzqui para xiquintelchihua nocualancaitacahua, huan ta hasta eyi huelta tiquintiochijtoc. 11 ¡Xiquisa nica! Na nijnequiyaya nimitzmacas miyac tamanti cati tahuel patiyo, pero Toteco amo quinejqui ma nimitzmaca.
12 Huan Balaam quiilhui Tanahuatijquet Balac:
―Achtohui niquinilhui nopa tacame cati techtitanili 13 para masque Tanahuatijquet Balac techmacasquía ichaj temitoc ica oro huan plata, amo hueli niquixpanos cati techilhuía TOTECO. Amo teno cati cuali, yon cati amo cuali niquijtos san pampa na nijnequi niquijtos. San cati TOTECO techilhuía, ya nopa niquijtos. ¿Amo quej nopa niquinilhui? 14 Huan ama, quena, nitacuepilis notal, pero achtohui nimitzilhuis cati ni israelitame quinchihuilise amomasehualhua teipa.
Itamiya icamanal Balaam
15 Huajca Balaam sempa camanaltic quej se tachixquet huan quiijto ni camanali:
“Ya ni nocamanal niBalaam, niicone Beor.
Ama cuali niquita cati huala.
16 Nicamanaltis na cati nijcactoc icamanal TOTECO.
Quena, Toteco cati más hueyi techmachiltijtoc ni cati ya quimati.
Niquitztoc ya cati quipiya nochi chicahualisti,
huan ya ni cati technextilijtoc.
17 Niquita se cati amo aqui ama.
Yaya cati nijtachilía nopona hasta tahuel huejca,
yaya hualas teipa.
Monextis se sitali cati hualas ten iteipan ixhuihua Jacob.
Yaya elis se hueyi Tanahuatijquet cati motananas ipan ni israelitame.
Quintzonpechis Moab ehuani.
Quintamiltis iteipan ixhuihua Set.
18 Israelitame quitanise nopa tali Edom huan Seir.
Quena, moaxcatise inintal inincualancaitacahua.
Quichihuase huejhueyi tamanti cati temajmatise.
19 Se tanahuatijquet quisas ipan iteipan ixhuihua Jacob,
huan quintzontamiltis nochi cati mocahuaj ipan altepeme ipan tali Edom.”
20 Teipa Balaam quitachili ininchajchaj iteipan ixhuihua Amalec, huan sempa camanaltic quej se tachixquet huan quiijto ni camanali:
“Imasehualhua Amalec hualahuij ten huejcajquiya,
pero se tonali amo teno mocahuas, tamisosolihuis.”
21 Huan Balaam nojquiya quintachili campa ininchajchaj nopa quenitame, huan sempa camanaltic quej se tachixquet huan quiijto ni camanali:
“Amojuanti anceneos, cuajcuali campa anmomanahuíaj.
Anitztoque temachti quej se totot
ica itepasol huejcapa campa huejhueyi tet.
22 Pero amechsosolose nopa soldados ten tali Asiria,
huan amechhuicase anilpitoque.”
23 Teipa Balaam quitamilti icamanal huan quiijto:
“¡Ay! ¿Ajquiya noja huelis itztos quema Toteco Dios quichihuas ni tamanti?
24 Huejhueyi cuaacalme quiixcotonase hueyi at huan hualase ica tacame ten tali Chipre,
huan quema inijuanti tacuepilise, quicajtehuase tali Asiria huan Heber tami sosolijtoc.”
25 Huan quema Balaam tantoya quiijtohua ni camanali, quisqui huan tacuepili ichaj. Huan Tanahuatijquet Balac nojquiya quistejqui.