2 Samuel
1
David quicajqui para mijqui Saúl
1 Quema ya mictoya Saúl, David mocuepqui ipan ialtepe Siclag pampa ya tlantoya quintzontlamiltía nopa amalecitame huan nopona mocajqui ome tonati. 2 Huan ipan ne seyoc tonali, ajsico se tlacatl catli quisqui tlen isoldados Saúl. Yaya quihualicayaya iyoyo tzayantoc huan motlalilijtoya tlaltejpoctli ipan itzonteco pampa quipiyayaya hueyi tequipacholi. Huan quema ajsico campa David mohuijtzonqui ica miyac tlatlepanitacayotl. 3 Huajca David quitlatzintoquili nopa tlacatl:
―¿Canque tihuala?
―Na nicholojtejqui campa toisraelita masehualhua tlahuilanaj ―tlananquili nopa tlacatl.
4 Huan David quiilhui:
―Techilhui tlaque panotoc ipan nopa tlahuilancayotl.
Huan nopa tlacatl quinanquili:
―Miyac toisraelita soldados mictoque huan miyac cholojtejtoque. Huan nojquiya mijqui Saúl huan icone, Jonatán.
5 Huan David quitlatzintoquili:
―Huan ¿quenicatza tijmatqui para mijqui Saúl huan icone?
6 Huajca quinanquili:
―Na niitztoya ipan tepetl Gilboa huan nopona niquitac para Saúl motlatzquiliyaya ipan icuatlamin catli huehueyac. Huan monechcahuiyayaj icualancaitacahua ipan tlahuilanca carros. Nojquiya hualayayaj miyaqui tlacame ipan cahuayos. 7 Huajca ipan nopa tlatoctzi Saúl nechitac huan nechnotzqui. Huan huajca nimonechcahui campa itztoya. 8 Huan yaya nechtlatzintoquili ajqueya na huan niquilhui para nieliyaya se niamalecita tlacatl. 9 Huajca techilhui: ‘Xihuala huan techmicti pampa tlahuel nitlaijiyohuía, huan noja niyoltoc.’ 10 Huajca nimonechcahui huan nijmicti pampa nimomacac cuenta para ayacmo huelis itztos pampa tlahuel mococojtoya. Huan nijcuili icorona catli quipixtoya ipan itzonteco huan nopa costli catli quipixtoya ipan imax huan nimitzhualiquilía ta.
11 Huan quema quicajqui nochi catli quiijto, David huan nopa tlacame catli itztoyaj ihuaya quitzayanque ininyoyo pampa tlahuel motequipachojque. 12 Huan pejque quichoquilíaj Saúl huan itelpoca Jonatán, huan nopa isoldados TOTECO huan nochi sequinoc israelitame, pampa tlahuel miyac tlacame mictoyaj ipan tlahuilancayotl nopa tonal. Huan mosajqui David huan itequipanojcahua, huan amo tleno quicuajque hasta tlayohua. 13 Huan David quiilhui nopa tlacatl:
―¿Canque tiehua?
Huan quinanquili:
―Na niseyoc tlali ejquetl, niamalecita.
Huan David quiilhui:
14 ―Huajca ¿para tlen amo timajmajqui timomatlananqui huan tijmicti Saúl catli TOTECO quitlapejpenijtoya huan quitequitlalijtoya?
15-16 Huajca David nimantzi quinotzqui se soldado huan quiilhui:
―Xijmicti ni tlacatl.
Huan David quiilhui nopa tlacatl:
―Timiquis pampa ta ica moseli tiquijto para tijmicti Saúl, nopa tlacatl catli TOTECO quitlapejpenijtoya para elis tlanahuatijquetl.
Huan isoldado hualajqui huan quimicti ica icuatlamin catli huehueyac.
David quinchoquili Saúl huan Jonatán
17 Huan David quisencajqui se huicatl huan huicac tlen Saúl huan icone, Jonatán, catli mictoyaj. 18 Huan tlanahuati ma quinmachtica nopa soldados catli tlali Judá ehuani. Huan ni huicatl nojquiya mopantía ijcuilijtoc ipan nopa ama tlajcuiloli catli itoca Jaser. Huan quej ni quiijtohua:
19 “Noisraelita icnihua, nopa tlacatl catli más yejyectzi tijpixque, mictoc.
Yaya catli achi más techmacayaya paquilistli quimictijtoque nepa huejcapa campa tepeme.
Quena, yaya catli más tetic huetztoc.
20 Amo xiquinilhuica tocualancaitacahua catli itztoque ipan altepetl Gat.
Niyon amo xiquinpohuilica catli itztoque ipan tianquis
ipan altepetl Ascalón para amo ma techhuetzquilica nopa filisteo sihuame.
Amo tijnequij ma techpinajtica nopa sihuame catli amo quineltocaj TOTECO.
21 Saúl mijqui ipan tepetl Gilboa.
Huajca amo quema ma tlaquiyahui nopona.
Niyon amo quema ma onca ajhuachtli.
Ma ayacmo tlaelilti pampa nopona mijqui catli motemacac.
Nopona mijqui Saúl quen se tlen hueli tlacatl,
quen elisquía amo ya catli quitlapejpeni Toteco.
22 Saúl huan Jonatán nochipa tlatlaniyayaj ipan tlahuilancayotl.
Inijuanti quinmictiyayaj inincualancaitacahua,
masque tlahuel motemacayayaj.
Amo quema mocuepque ipan se tlahuilancayotl san ininmax,
pampa nochipa tlatlaniyayaj.
23 Nochi tojuanti tiquinicneliyayaj huan tlahuel tiquinnequiyayaj.
Nelía se paquilistli para tiquiniximatise.
San sejco nemiyayaj quema itztoyaj huan nojquiya san sejco mocajque ipan miquilistli.
Achi más chicahuac huelque motlalojque que ne hueyi cuajtli catli hueli patlani.
Elque más tetique inijuanti que se león.
24 Anisraelita sihuame, xijchoquilica Saúl catli yejyectzi anmechyoyontiyaya ica yoyomitl catli morado quen motlalilíaj sihua tlanahuatiani.
Quena, Saúl quiyejyecchijqui amoyoyo ica oro,
huajca xijchoquilica.
25 Yaya catli motemacac ya mijqui ipan tlahuilancayotl.
Mijqui Jonatán ipan ne tepetl Gilboa.
26 Nimitzchoquilía noicni, Jonatán,
pampa tlahuel nimitzicneli.
Huan techicneli miyac nojquiya hasta motlaicnelil quitlani inintlaicnelil sihuame.
27 Mictoque catli más motemacayaya.
Ayacmo quinemiltíaj inintepos pampa ya mictoque.”
Quej nopa elqui nopa huicatl catli David quisencajqui para quichoquilis Saúl huan Jonatán.