22
Nopa huicatl catli David quiijcuilo
1 Huan ya ni eltoc nopa huicatl catli David huicac para TOTECO pampa quinmanahuijtoya tlen nochi icualancaitacahua huan tlen Saúl. 2 Quiijto:
“TOTECO, mopan ta nimotlatía.
Ta catli techmanahuía quen nielisquía iijtico nopa tepamitl catli tilahuac.
Ta tinotemaquixtijca.
3 NoTeco Dios, ta techyahualohua para amo huelis nechajsise nocualancaitacahua.
San ipan ta nimotemachis.
Ta catli techyahualohua para techmanahuis tlen mosisinijca tlacame.
NoTeco Dios, ipan ta nijmati nitemachtli.
Tinotemaquixtijca.
Techmanahuía ica catli nechmictisquía.
4 Nijnotzas, TOTECO, catli quinamiqui tijhueyichihuase.
Huan yaya nechmaquixtis tlen nocualancaitacahua.
5 Quema nochi nechyahualohuayayaj para nechmictise,
huan nijmatqui nechtlanisnequiyaya catli amo cuali ica nochi ichicahualis,
nimitztzajtzili.
6 Quema nijmatiyaya nimiquisquía huan nechtilanayaya campa mijcatzitzi,
huan nimoixnamiquiyaya ica miquilistli,
7 huajca ipan notlaohuijcayo nijnojnotzqui TOTECO.
Quena, nijtzajtzili noTeco Dios ma nechpalehui.
Huan yaya nechtlacaquili hasta nepa ipan ilhuicac.
Quena, quichihuili cuenta catli niquilhui,
huan nechpalehui.
8 Huajca chicahuac mojmolini tlali,
huan nojquiya molini ilhuicactli campa motlatzquilijtoc.
Nochi mohuihuixojque pampa Toteco Dios cualanqui ica nocualancaitacahua.
9 Elqui quen poctli quisayaya ipan iyacatzol.
Huan icamaco quisayaya tlilelemectli catli tetzontlamiltiyaya.
Quena, elqui quen lemeniyaya miyac tlicuahuitl, pampa tlahuel cualantoc.
10 Huan TOTECO quiechcapano ilhuicactli huan hualtemoc para nechpalehuis.
Nejnentihualajqui ipan mixtli catli nelyayahuic.
11 Elqui quen TOTECO tlejcoc ipan ieltlapal se querubín tequihuajquetl huan patlantihualajqui ajacatipa.
12 Yaya motzajqui ica tzintlayohuilotl,
huan atl quiyahualo para amo aqui quiitasquía.
13 Cahuaniyaya itlatlanex TOTECO huan elqui quen tlapetlaniyaya iixpa.
Huan itlatlanex lemeniyaya quen tlicuahuitl.
14 Tlatomonqui nelía chicahuac tlen ilhuicac huan ajsic campa hueli,
pampa TOTECO Catli Más Hueyi camanaltic.
15 Quimajcajqui cuatlamintli huan nocualancaitacahua cholojque campa hueli.
Tlahuel tlapetlanalti huan quitlamisosolo.
16 Quema yaya tlailpitzqui ica cualantli,
quixejxelo nopa tlahuel huejcatla hueyi atl,
huan nopa ojme catli eltoc atzintla monexti.
Huan nesqui tlanemijya nochi itzinpehualtil ni tlaltipactli,
pampa TOTECO teajhuac chicahuac.
17 TOTECO momaxitlajqui tlen ilhuicac huan nechitzqui.
Nechmaquixti quema nimisahuiyaya ipan miyac atl.
18 Nechmanahui tlen nocualancaitacahua catli más tetique.
Nechmaquixti tlen inijuanti catli techcualancaitayayaj,
huan catli nechonpanoyayaj ica ininchicahualis.
19 Inijuanti motlalijque noca na quema nechajsitoya se hueyi tequipacholi.
Pero TOTECO nechpalehui huan nechtlali campa temachtli.
20 Nechhuicac campa amo mahuilili.
Nechmaquixti pampa nechicnelía.
21 TOTECO nechtlaxtlahuijtoc pampa nijchihua catli xitlahuac iixpa.
Nechpalehui pampa quiitac para amo tleno nijchijtoya.
22 Quena, nijtoquilijtoc iojhui TOTECO,
huan amo nijcajtoc.
Amo nijcajtejtoc noTeco Dios para nijtoquilis catli amo cuali.
23 Niquiximati itlanahuatilhua,
huan amo quema nimohuejcatlalijtoc tlen catli quiijtohua.
24 Ninejnentoc xitlahuac iixpa,
huan nimomocuitlahuijtoc para amo nitlajtlacolchihuas.
25 Yeca TOTECO nechtlaxtlahuijtoc,
pampa nijchijtoc catli xitlahuac.
Techtiochijtoc pampa nechitztoc para nitlapajpactli iixpa.
26 Ta, TOTECO tiquintlasojtla catli tetlasojtlaj.
Tiquinchihuilía nel xitlahuac catli nejnemi xitlahuac.
27 Timonextía titlapajpactli ica catli tlapajpactli.
Pero timonextía tlahuel tichicahuac ica inijuanti catli fiero inintlalnamiquilis.
28 Ta tiquinmaquixtía catli motequipachohuaj,
pero tiquintlachilía masehualme catli mohueyimatij, tiquinicnotlalía.
29 TOTECO, tinotlahuil.
Techtlahuilía ipan tzintlayohuilotl.
30 Ica mochicahualis Toteco Dios huelis niquintlanis miyac soldados catli nocualancaitacahua.
Huelis nihuitonis para nipanos iixco nopa tepamitl ipan inialtepe.
31 Xitlahuac nochi iojhui Toteco Dios.
Nochipa quisa melahuac catli quiijtohua icamanal TOTECO.
Yaya quinmanahuía nochi catli motemachíaj ipan ya.
32 Amo aqui seyoc Dios,
san yaya TOTECO.
Amo aqui seyoc quipiya tetili para techmanahuis quen Toteco Dios.
33 Yaya Toteco Dios catli nechchicahualismaca.
Quichihua temachtli noojhui.
34 TOTECO quichihua noicxihua ma elica ajacasontzitzi.
Quinchihua temachtli quen iniicxihua chivojme catli motlalohuaj campa tepeixco.
Techtlalijtoc huejcapa huan niya ica temachili.
35 TOTECO techmaca noyajatil para huelis nitlahuilanas.
Techfuerzajmaca hasta ica nomax huelis nijcuelpachos se tetic tepos huitoli catli quichijtoque ica bronce.
36 Ta techmanahuía quen se tepostli catli nechyahualohua.
Quena, techmaquixtía huan ica motlaicnelil techhueyichijtoc.
37 Noojhui tijchijtoc patlahuac para amo niohuijtis,
huan para amo nimopeyahuas quema ninejnemis.
38 Niquintoquili nocualancaitacahua, huan niquintzontlamilti.
Amo nimocuepqui hasta quema nochi niquinmictijtoya.
39 Niquintzontlamilti nochi para amo aqui huelis sempa motlananas.
Inijuanti huetzque noicxitla.
40 Ta techfuerzajmacac para huelis nitlahuilanas.
Ta techtlanilijtoc nocualancaitacahua huan mocajtoque noicxitla.
41 Huan ta tijchijqui para nochi nocualancaitacahua ma choloca noixpa.
Niquintzontlamiltijtoc nochi catli nechcualancaitayayaj.
42 Inijuanti tlatzajtzilijque para acajya quimaquixtisquía,
pero amo aqui quinpalehui.
Hasta nojquiya quitlajtlanijque TOTECO ma quinpalehui,
pero amo quintlacaquili.
43 Huajca na niquinchijqui quen tlaltejpoctli.
Niquintlaijiyohuilti huan ininpani nimoquejquetzqui quen soquitl ipan ojtli.
44 Techmanahuijtoc tlen nopa fiero tlacame catli mopantíaj ipan noaltepe.
Techtlalijtoc para ica temachili nielis niinintlanahuatijca miyac tlalme.
Ama nechtequipanohuaj masehualme catli ehuaj tlalme catli achtihuiya amo niquiniximatiyaya.
45 Huan catli ehuani sequinoc tlalme huihuipicaj noixpa.
Nechneltoquilíaj quema quicaquij tlen nochicahualis.
46 Sequinoc tlali ehuani momajmatíaj,
huan quisaj tlen campa motlatijtoyaj,
huihuipicatihualahuij noixpa.
47 TOTECO itztoc.
Ma tijpaquilismacaca yaya ipan catli nimotlatía.
Ma tijhueyichihuaca Toteco Dios,
pampa yaya catli nechmaquixtía.
48 Toteco Dios quinmacuepilía nochi nocualancaitacahua.
Quintlantoc nochi altepeme huan quinchijtoc ma nechtlepanitaca.
49 Quena, TOTECO nechmanahuijtoc tlen nocualancaitacahua.
Nechtlalijtoc más huejcapa que nopa tlacame catli nechajsisnequiyayaj.
Nechmaquixtijtoc tlen nopa tlacame catli mosisiníaj nohuaya.
50 Yeca nimitztlascamati, TOTECO.
Nimitzhueyitlalis iniixpa catli ehuaj nochi tlalme.
Nimitzhuicatis ni huicatl para nimitzpaquilismacas.
51 TOTECO, ta techmanahuijtoc huan techtlalijtoc nimotlanahuatijca.
Techtlasojtlatoc na, niDavid, catli ta techtlapejpenijtoc.
Ta tiquintlasojtlas nochi noteipan ixhuihua para nochipa.”