15
Huicatl para quihueyichihuas TOTECO
1 Huajca Moisés ininhuaya nopa israelitame huicaque ni huicatl para TOTECO:
“Nihuicas para TOTECO pampa tlatlanqui ica ihueyi chicahualis.
Quinisahui ipan hueyi atl nopa cahuayojme ininhuaya catli ininpan tlejcotoyaj.
2 TOTECO nechchijtoc ma nihuica ica paquilistli.
Yaya Notemaquixtijca catli nechfuerzajmaca.
Yaya Dios noTeco catli nijtlepanita, huan nijpaquilismacas.
Yaya nopa Dios catli notata quihueyichijqui, huan nijhueyitlalis.
3 TOTECO ya nopa tlahuilanquetl catli más quipiya chicahualistli.
Quena, TOTECO, ya nopa itoca.
4 Quinisahui ipan hueyi atl nopa tlahuilanca carros,
ininhuaya isoldados Faraón.
Nopa soldados catli más cuajcualme ipan nochi tlali Egipto,
misahuijque ipan hueyi atl catli itoca Chichiltic.
5 Huetzque hasta atzintla quen teme.
Huan nopa atl catli huejcatla quinatzonpolihuilti.
6 ¡Ay, TOTECO! Tijpiya hueyi chicahualistli,
huan tiquintlamilti tocualancaitacahua.
7 Huan ica mohueyi chicahualis tiquinpolo catli motlalijque moixpa.
Tlejcoc mocualancayo quen se hueyi tlitl,
huan quinpolihuilti.
Inijuanti tlami tlatlaque quen sacatl.
8 Chicahuac tiquilpitzqui nopa hueyi atl,
huan nopa atl motlajcoitac.
Nopa hueyi atl motlananqui huan moquetzqui oncac,
quen moquetzaj ome huejcapantique tepame.
Nopa hueyi atl catli huejcatla motetictlali.
9 Tocualancaitacahua mohueyimatque huan quiijtojque:
‘Tiquintoquilise hasta tiquinajsitij,
huan tiquinquixtilise nochi catli quipiyaj
huan timochihuase tiricos ica catli iniaxca.
Teipa tijquixtise tomachete huan tiquintzontlamiltise ica tomax.’
Quej nopa moilhuijque.
10 Pero ta, TOTECO, titlailpitzqui, huan nopa hueyi atl quintolo.
Misahuijque quen tepostli ipan atl catli huejcatla.
11 ¡Ay TOTECO! Amo aqui seyoc Dios catli ica huelis timitzhuicalotise.
Amo aqui tlatzejtzeloltic quen ta.
Amo aqui quipiya mohueyi chicahualis. Catli ta tijchihua temajmatía.
Huajca quinamiqui para timitzhueyichihuase.
12 Titenextili mochicahualis, huan quintolo nopa tlali.
13 Ica moteicnelijcayo techyacanas tojuanti timomasehualhua catli techmaquixtijtoc.
Ica mochicahualis techhuicas hasta mochaj catli tlatzejtzeloltic.
14 Nochi tlacame ipan nochi tlalme huihuipicase quema quimatise catli tijchijtoc.
Nopa filisteos majmahuise pampa quinitzquis majmajtli.
15 Huan nopa tlayacanani tlen soldados ipan tlali Edom, niyon amo huelis tlaijiyotilanase.
Nopa tlanahuatiani tlen tlali Moab huihuipicase ica majmajtli.
Huan ayacmo quipiyase chicahualistli inijuanti catli mooquichmatiyayaj ipan tlali Canaán.
16 Hueyi majmajtli quinajsis.
Quena, quinamiqui ma majmahuica.
Tocualancaitacahua ayacmo techhuilanase,
san majmahuise ica mohueyi chicahualis, TOTECO,
huan mocahuase quen teme.
Tojuanti catli techcojtoc para timoaxcahua tijpanoque nopa atl ica temachili.
Inijuanti amo tleno huelqui techchihuilise pampa ta techmanahuijtoya.
17 ¡Ay TOTECO! Techhuica para tiitztotij ipan motepe catli tlatzejtzeloltic,
Techyacana hasta nopa tlali campa tijtlapejpeni para tiitztose,
nopona ipan mochaj catli ta tijchijchijqui.
18 TOTECO, titlanahuatis para nochipa.”
Catli huicac María
19 Quema itlahuilanca carros Faraón huan icahuayojhua huan catli ipan tlejcotoyaj calajque ipan hueyi atl, TOTECO quichijqui nopa hueyi atl ma quinhuica. Pero nopa israelitame quiixcotonque nopa hueyi atl ipan se ojtli huactoc. 20 Huajca nopa sihua tlajtol pannextijquetl María, ihuelti Aarón, quicuic se tepos tlatzilintli, huan nochi israelita sihuame quitoquilijque quitzilinijtiyohuiyayaj tepos tlatzilintli, huan huicayayaj, huan mijtotiyayaj. 21 Huan María huicayaya huan quinnanquiliyaya ica ni camanali:
“Xihuicaca para TOTECO,
pampa tlatlanqui ica ihueyi chicahualis.
Quinisahui ipan hueyi atl nopa cahuayojme,
huan inijuanti catli ipan tlejcotoyaj.”
Nopa atl catli chichic
22 Huan Moisés quinyacanqui nopa israelitame huan quistejque tlen nopa Hueyi Atl Chichiltic, huan yajque ipan nopa huactoc tlali itoca Shur. Huan nejnenque para eyi tonali pero amo quipantiyayaj atl. 23 Huan quema quiajsique se ameli itoca Mara, amo huelque quiijique nopa atl catli oncayaya nopona pampa eliyaya chichic. Yeca nopa ameli quitocaxtijque Mara catli quinequi quiijtos “chichic”.
24 Huan nopa israelitame pejque cualancamanaltij ica Moisés, huan quiijtohuayayaj: “¿Tlaque huelis tiquijise?” 25 Huajca Moisés quitlajtlani TOTECO itlapalehuil para quimatis tlaque quichihuas, huan TOTECO quinextili se cuamacuayotl. Huan Moisés quimajcajqui nopa cuahuitl ipan atl, huan nopa atl mocuepqui se cuali atl.
Huajca nopona TOTECO quincamanalhui israelitame para quinyejyecos sintla quitoquilisquíaj huan ya ni catli quintencahuili. 26 Quinilhui: “Sintla anquitlacaquilise catli niamoTECO Dios nimechilhuía, huan anquichihuase catli xitlahuac noixpa huan anquineltocase notlanahuatil, amo nimechtitlanilis niyon se cocolistli catli nijtitlanqui ipan nopa egiptome, pampa na niamoTECO Catli Nimechchicahua.”
27 Huan teipa nopa israelitame ajsitoj Elim campa oncayaya majtlactli huan ome ameli huan 70 apachi cuame, huan nopona nechca atl quiquetzque ininyoyoncalhua.