24
1 Huajca Balaam ya quiitztoya para san tlapic se masehuali quintelchihuasnequis israelitame pampa TOTECO quinequiyaya quintiochihuas. Yeca Balaam ayacmo yajqui para quichihuas quen se tetlajchihuijquetl. Yajqui xitlahuac campa huelqui tlachiyas imelac ipan nopa huactoc tlali huan quinitac nopa israelitame. 2 Huan quema Balaam tlachixqui huan quinitac nochi nopa israelitame catli quiquetztoyaj ininyoyoncalhua ica pamitl, sese ica ihueyi familia imasehualhua, nimantzi Itonaltzi Toteco Dios motlali ipan ya, 3 huan pejqui quiijtohua ni camanali:
“Ya ni nopa camanali catli niBalaam, niicone Beor, nijhualica.
Na nise tlacatl catli cuali hueli niquita catli ininpantis ni israelitame.
4 Nijcactoc icamanal Toteco catli quipiya nochi chicahualistli, huan niquitztoc ya catli quipiya nochi chicahualistli huan catli nechnextilijtoc.
Huan quema nihuetzqui iixpa, nechtlapoli noixteyol huan nochi nijmachili.
Huajca ya ni catli nechilhui para ininpantis:
5 Nelía paquij iteipan ixhuihua Jacob por nopa tlatiochihualistli catli quinchiya.
Tlayejyectzi elis campa ininchajchaj israelitame huan nopona oncas paquilistli.
6 Niquinita para mosemantoc ininchajchaj campa hueli ipan huejhueyi tlamayamitl campa xoxohuic sacapetlatl.
Nesi quen se hueyi xochimili catli tlahuel yejyectzi huan catli nochi temaca pampa eltoc atentli.
Nesi quen campa miyac áloes catli TOTECO quitoctoc.
Itztoque quen miyac tiocuame catli tlatoctli ateno.
7 Miyac atl quipiyase israelitame hasta mocahuas.
Quipiyase atl para quiatequise inintlatochui.
Quipiyase inintlanahuatijca catli más hueyi que nochi totlanahuatijcahua.
Huan tlahuel hueyi elis itlanahuatil.
8 Toteco Dios catli quinquixti ipan tlali Egipto itztoc ininhuaya.
Yaya ininchicahualis quen se hueyi toro quipiya huejhueyi icuacua.
TOTECO quintzontlamiltis nochi masehualme ipan nochi tlalme catli quincualancaitaj.
Quena, quinpostequilis iniomiyo, huan quinmictis ica cuatlamintli.
9 Nopa israelitame itztoque quen se tecuani catli motectoc para mosiyajquetzas,
huan amo aqui motemaca para quiixitis. ¡TOTECO quintiochihuas catli anmechtiochihua, anisraelitame,
huan quintelchihuas nochi catli anmechtelchihuaj!”
Más icamanal Balaam
10 Huajca quema Tlanahuatijquetl Balac quicajqui nopa camanali catli Balaam quiijto, tlahuel cualanqui ihuaya, huan momatejtejtzonqui huan quiilhui:
―Na nimitznotzqui para xiquintelchihua nocualancaitacahua, huan ta hasta eyi huelta tiquintiochijtoc. 11 ¡Xiquisa nica! Na nijnequiyaya nimitzmacas miyac tlamantli catli tlahuel patiyo, pero Toteco amo quinejqui ma nimitzmaca.
12 Huan Balaam quiilhui Tlanahuatijquetl Balac:
―Achtihui niquinilhui nopa tlacame catli techtitlanili 13 para masque Tlanahuatijquetl Balac nechmacasquía ichaj temitoc ica oro huan plata, amo hueli niquixpanos catli nechilhuía TOTECO. Amo tleno catli cuali, niyon catli amo cuali niquijtos san pampa na nijnequi niquijtos. San catli TOTECO nechilhuía, ya nopa niquijtos. ¿Amo quej nopa niquinilhui? 14 Huan ama, quena, nimocuepas notlal, pero achtihui nimitzilhuis catli ni israelitame quinchihuilise amomasehualhua teipa.
Itlamiya camanal Balaam
15 Huajca Balaam sempa camanaltic quen se tlachixquetl huan quiijto ni camanali:
“Ya ni nocamanal niBalaam, niicone Beor.
Ama cuali niquita catli huala.
16 Nicamanaltis na catli nijcactoc icamanal TOTECO.
Quena, Toteco catli más hueyi nechmachiltijtoc ni catli ya quimati.
Niquitztoc ya catli quipiya nochi chicahualistli,
huan ya ni catli nechnextilijtoc.
17 Niquita se catli amo aqui ama.
Yaya catli nijtlachilía nopona hasta tlahuel huejca,
yaya hualas teipa.
Monextis se sitlali catli hualas tlen iteipan ixhuihua Jacob.
Yaya elis se hueyi Tlanahuatijquetl catli motlananas ipan ni israelitame.
Quintzonpechis Moab ehuani.
Quintlamiltis iteipan ixhuihua Set.
18 Israelitame quitlanise nopa tlali Edom huan Seir.
Quena, moaxcatise inintlal inincualancaitacahua.
Quichihuase huejhueyi tlamantli catli temajmatise.
19 Se tlanahuatijquetl quisas ipan iteipan ixhuihua Jacob,
huan quintzontlamiltis nochi catli mocahuaj ipan altepeme ipan tlali Edom.”
20 Teipa Balaam quitlachili ininchajchaj iteipan ixhuihua Amalec, huan sempa camanaltic quen se tlachixquetl huan quiijto ni camanali:
“Imasehualhua Amalec hualahuij tlen huejcajya,
pero se tonal mocahuas amo tleno, tlamisosolijtos.”
21 Huan Balaam nojquiya quintlachili campa ininchajchaj nopa quenitame, huan sempa camanaltic quen se tlachixquetl huan quiijto ni camanali:
“Amojuanti anceneos, cuajcuali campa anmomanahuíaj.
Anitztoque temachtli quen se tototl
ica itepasol huejcapa campa huejhueyi tetl.
22 Pero anmechsosolose nopa soldados tlen tlali Asiria,
huan anmechhuicase anilpitoque.”
23 Teipa Balaam quitlamilti icamanal huan quiijto:
“¡Ay! ¿Ajqueya noja hueli itztos quema ni tlamantli quichihuas Toteco Dios?
24 Huejhueyi cuaacalme quiixcotonase hueyi atl huan hualase ica tlacame tlen nopa Chipre tlali,
huan quema inijuanti mocuepase, quicajtehuase tlalme Asiria huan Heber tlami tlasosolme.”
25 Huan quema Balaam tlantoya quiijtohua ni camanali, quisqui huan mocuepqui ichaj. Huan Tlanahuatijquetl Balac nojquiya quistejqui.