22
Se tlacatl quitzajtzilía Toteco huan teipa quipaquilismaca
1 ¡NoTeco Dios! ¡NoTeco Dios!
¿Para tlen techtlahuelcajtoc?
¿Para tlen timohuejcachijtoc huan amo tihualajtoc para techmanahuiqui?
Amo tijtlacaquilía quema nitlatzajtzilía.
2 NoTeco, tonali yohuali amo nimosiyajquetza nimitznotza,
pero amo technanquilía.
3 Huan masque quej nopa eltoc,
ta quejipa titlatzejtzeloltic.
Nochi tohuejcapan tatahua tiisraelitame mitzyahualojque huan mitzhueyichijque.
4 Totatahua mochixque ipan ta.
Quena, motemachijque mopan ta huan ta tiquinmanahui.
5 Mitznojnotzque quema tlaijiyohuiyayaj huan tiquinmaquixti.
Mopan ta motemachijque huan amo tiquinpinahualti.
6 Pero na nimomati quen se pilocuiltzi huan amo nise masehuali.
Sequin san nechhuetzquilíaj huan sequinoc nechcualancaitaj.
7 Nochi catli nechitaj san noca paquij,
huan tlancuitzihuij huan motzonojolinía,
8 huan quiijtohuaj:
“Yaya catli motemachía ipan TOTECO,
huajca ma tiquitaca sintla quimaquixtis.
Sintla nelía quiicnelía,
ma quimanahuiqui.”
Quej nopa quiijtohuaj masehualme.
9 Pero TOTECO, na nijmati para techpalehuijtoc.
Techquixti iijtico nonana.
Techmocuitlahuijtoc hasta tlen quema noja nichichiyaya.
10 Huan quema nitlacatqui ya ipa nimotemachijtoc ipan ta.
Nochi tonali tieltihualajtoc tinoTeco Dios.
11 Amo techtlalcahui san pampa hualajtoc ni tequipacholi huan amo aqui seyoc catli hueli nechpalehuis.
12 Miyaqui nocualancaitacahua nechyahualojtoque quen torojme catli mosisiníaj.
Quena, nesij quen nopa huejhueyi torojme catli itztoque ipan tlali Basán.
13 Nanalcaj quen tecuanime catli mosisiníaj.
Camachalohuaj huan nechmelactlachilíaj.
14 Na nimomati quen atl catli mopatzcatoc huan campa hueli toyajtoc.
Nochi noomiyo lelecuecatoc.
Noyolo eltoc quen cera catli atiya.
15 Tlantoc nochi nochicahualis.
Nijpiya nocamac huactoc quen se chachapal tepalcatl,
huan nonenepil tlatzquitoc ica nocamacholec.
Techtlalijtoc campa tlahuactoc huan campa onca miquilistli.
16 Masehualme catli amo cuajcualme nechyahualojtoque quen chichime.
Quicocoyotztoque nomax huan noicxihua.
17 Hasta huelis nijpohuas noomiyohua,
pampa sesen nechcocohua.
Nocualancaitacahua nechsentlachilijtoque huan san noca paquij.
18 Momajmacaj catli nimoquentiyaya.
Quena, mahuiltíaj ica piltetzitzi para quiitase ajqueya quitocaros sesen noyoyohua.
19 Pero ta, TOTECO, amo techtlalcahui,
pampa na niitztoc momaco.
Xihuala nimantzi techpalehuiqui.
20 Techmanahui tlen ininmachete ni mosisinijca masehualme catli itztoque quen chichime.
Amo xiquincahuili ma nechmictica.
21 Eltoc quen niitztoc inincamaco tecuanime,
huajca techmaquixti. Nopa masehualme itztoque quen torojme,
amo ma nechtompojhuica.
22 Huan na niquinpohuilis noicnihua tlen ta, TOTECO,
huan quema oncas tlasentililistli,
nimitzhueyichihuas iniixtla nochi.
23 TOTECO, tojuanti catli timitztlepanitaj huan tiquimacasij timitzixpanose timitzpaquilismacaj.
Nochi tiiteipan ixhuihua Israel,
timitzhueyichihuaj.
Quena, timitzhueyimatij nochi tiisraelitame.
24 Pampa amo techelcajtoc quema titlaijiyohuíaj,
niyon amo techhuejcamajcajtoc.
Amo neli techcuanetlatilía.
¡Amo! Ta techtlacaquilía quema timitztlajtlaníaj techpalehuiqui.
25 Huajca, TOTECO, ipan nopa hueyi tlasentililistli nimitzpaquilismacas iniixtla nochi momasehualhua,
pampa ta titemachtli.
Iniixpa catli mitztlepanitaj huan quiimacasij mitzixpanose,
na nijchihuas catli nimitztencahuilijtoc para nijchihuas.
26 Huajca nochi catli teicneltzitzi tlacuase huan ixhuise.
Nochi catli quitemohuaj TOTECO quipantise huan quipaquilismacase.
Quena, paquise para nochipa.
27 Masehualme ipan nochi tlalme campa hueli ipan tlaltipactli motepotztocase huan quielnamiquise TOTECO.
Inijuanti pehuase quihueyimatise huan motlancuaquetzase iixpa.
28 Pampa TOTECO, yaya nopa tlanahuatijquetl catli quinahuatía nochi tlalme.
29 Nochi catli quipiyaj tomi huan nochi catli teicneltzitzi ipan ni tlaltipactli motlancuaquetzase iixpa.
Quena, nochi tlaltipac ehuani catli teipa miquise, quihueyimatise.
30 Nojquiya noteipan ixhuihua quihueyimatise TOTECO huan tepohuilise tlen ya nochi ininnemilis.
31 Quema toteipan ixhuihua tlacajtiyase,
tepohuilise para xitlahuac TOTECO huan nochi nopa huejhueyi tlamantli catli techchihuilijtoc.