1 Xijhueyichihuaca TOTECO,

amojuanti anitequihuajcahua.

Xijhueyichihuaca TOTECO catli quipiya hueyi ichicahualis huan itlatlanex.

2 Xijhueyichihuaca TOTECO por ihueyitilis,

pampa ya nopa quinamiqui para yaya catli tlahuel hueyi.

Xijhueyichihuatij TOTECO catli itztoc campa tlahuel tlayejyectzi huan tlatzejtzeloltic.

3 Quema TOTECO camanalti,

caquisti quen tlatomonilotl catli chicahuac ipan hueyi atl.

Itoscac Toteco Dios catli itztoc ipan ilhuicac caquisti quen tlatomoni ipan ilhuicac tlahuel chicahuac.

Quena, TOTECO itoscac monanquilía iixpa nopa hueyi atl ica nochi ihueyitilis.

4 Itoscac TOTECO quipiya chicahualistli.

Quena, itoscac quipiya tlahuel miyac chicahualistli.

5 Itoscac tlahuel temajmati huan quema TOTECO camanalti,

quichihua para ma ixtzayanica tiocuame.

Quena, Toteco quintlapana nochi tiocuame ipan tlali Líbano.

6 Quichihua ma huihuipicaca nochi cuatitlamitl ipan tlalme Líbano huan Sirión.

Quinchihualtía nopa cuame ma molinica quen piltorojtzitzi huan pilhuacaxtzitzi catli huitontehuaj.

7 Quema TOTECO camanalti,

quimajcahua tlilelemectli.

8 Quema TOTECO camanalti,

huihuipica nochi huactoc tlali.

Quena, hasta quichihua para ma huihuipica nopa huactoc tlali Cades.

9 Quema TOTECO quiijtohua para oncas tlatomonilotl,

huajca quichihua ma ixtzayanica nopa ahua cuame huan quicahua tlapepestic ipan cuatitlamitl.

Ipan ichaj nepa ilhuicac nochi quihueyichihuaj huan quiijtohuaj: “Tlahuel onpano yejyectzi mohueyitilis.”

10 TOTECO tlanahuatiyaya quema oncac nopa tlahuel miyac atl catli momanqui ipan nochi tlaltipactli.

Huan TOTECO noja tlanahuatía huan tlanahuatis para nochipa.

11 TOTECO quinmaca chicahualistli nochi imasehualhua.

Quena, TOTECO quintiochihua huan quinmaca tlasejseltili ipan ininyolo.