1 Nijpixtoc ipan noyolo catli nijnequi niteyolmelahuas tlen inintlajtlacol amo cuajcualme.

Amo cuajcualme quielcahuaj Toteco Dios huan amo quiimacasij.

2 Mohueyimatij ica ininseltzi hasta moilhuíaj yaya amo hueli quichihuas cuenta nochi catli fiero quichijtinemij,

huan yeca amo quintlatzacuiltis.

3 Quisa inincamaco senquistoc catli fiero huan catli amo melahuac.

Quipolojtoque inintlalnamiquilis,

huan ayacmo quichihuaj catli cuali.

4 Quema motecaj ipan inintlapech para cochise,

san quisencahuaj tlaque tlajtlacoli quichihuase.

Moneltlatzquilijtoque ipan iniojhui catli fiero huan san catli amo cuali quinequij.

5 TOTECO, motlasojtlacayo quinajsi nochi masehualme huan onajsi hasta ilhuicac huan hasta campa mixtli.

Nelía titemachtli.

6 Tiitztoc tlahuel tixitlahuac huan amo quema timopatla.

Tiitztoc temachtli quen nopa huejhueyi tepeme campa tlahuel tlahuejcapa.

Nelxitlahuac titetlajtolsencahua,

huan amo hueli tijmachilíaj motlanejnehuilis,

pampa eltoc quen nopa hueyi atl catli onpano huejcatla.

¡TOTECO! Ta san se tiquinmocuitlahuía quen masehualme huan tecuanime.

7 Toteco Dios, nelía yejyectzi moteicnelilis catli amo quema techcahua.

Yeca masehualme catli quipiyaj tlanahuatili huan catli teicneltzitzi monechcahuíaj campa ta para xiquinmanahui.

Quena, mochihuaj quen pilpiyotzitzi catli calaquij ieltlapaltzala ininnana.

8 Masehualme catli mitztemohuaj ixhuij cuali ica nopa tlatiochihualistli catli tiquinmaca nepa mochaj.

Eltoc quen se hueyi tlacualistli catli techtencahuilía toixpa.

Techcahuilía ma tiatlica ipan nopa atlajtli catli temaca ajhuiyac atl.

Quena, nochi catli tijtlajtlaníaj techmaca.

9 Pampa ta techmaca nemilistli nochi catli tiitztoque,

huan pampa techmaca tlahuili, tojuanti tihuelij titlachiyaj.

10 Nimitztlajtlanía para mojmostla techicneli tojuanti catli timitziximatij.

Nochipa techchihuilía catli xitlahuac nochi tojuanti catli ipan toyolo tijnequij tijchihuase catli cuali.

11 Amo xijcahua para ma nopan moquejquetzaca inijuanti catli mohueyimatij.

Niyon amo xiquincahuili ma nechtojtocaca amo cuajcualme.

12 Se tonal niquijtos:

“¡Xiquitaca quenicatza ama huetztoque nochi tlajtlacolchijca masehualme catli mosisiníaj!

Toteco Dios quintlahuisojtoc para ayacmo huelise motlananase.”