1 TOTECO, amo techtlaijiyohuilti quema ticualani.

Huan amo techtlatzacuilti ica mohueyi cualancayo.

2 Miyac nechcocohua catli amo cuali nijchijtoc.

Eltoc quen nochi mocuatlaminhua calactoc ipan na.

Quena, eltoc quen techajsitoc,

pampa nijmati ticualani nohuaya.

3 Huan pampa ticualani por notlajtlacol,

nijmati quen nochi notlacayo mococohua.

Niyon se noomiyo amo cuali eltoc.

4 Nochi notlajtlacolhua nopan huetztoc.

Eltoc quen nimisahuisquía campa miyac atl.

Notlajtlacolhua eltoc quen se tlamamali tlahuel etic catli amo hueli niquijiyohuía.

5 Palani notlacayo pampa nijchijqui se huihuiyotl.

Mijyotíaj nococohua.

6 Nicuitlapanhuitoltic huan amo hueli nijtlanana notzonteco.

Semilhuitl nichocatinemi por catli nijchijtoc.

7 Nochi notlacayo tliquisa.

Huan ya tlantinemi nochicahualis por notlajtlacol.

8 Nimomati quen nitlatejtejtzontli.

Niyon quentzi fuerza amo nijpiya.

Nelía nitlaayijhuía ipan noyolo.

9 NoTeco, ta tijmati quen nijnequi sempa niitztos cuali moixpa.

Nochi catli nimoilhuía tlanemijya nesi moixpa.

Amo tleno hueli nimitztlatilía.

10 Noyolo nelhuihuipica,

huan ya tlantinemi nochicahualis.

Ayacmo hueli nitlachiya cuali.

11 Nonelhuampoyohua huan noteiximatcahua san nechhuejcaitaj, pampa quiijiyaj nococohua.

12 Inijuanti catli quinequij nechmictise quisencahuaj tlaquetztli para nechmasiltise.

Catli quinequij nechcocose tlatoctzitzi nechilhuíaj quenicatza nechtzontlamiltise.

Semilhuitl quitemolíaj quenicatza nechcajcayahuase.

13 Pero na nimochihua quen amo nijcaqui catli quiijtohuaj.

Nimochihua quen se ninono huan amo nijtlapohua nocamac para niquinnanquilis.

14 Quena, na nimochihua quen amo nijcaqui inincamanal,

huan amo tleno niquijtohua para ica nimomanahuis.

15 Pampa san ipan ta nimochiya, TOTECO, tinoDios.

Na nijcajtoc momaco para xiquinnanquili huan techmanahui.

16 San nimitztlajtlanía para amo xiquincahuili ma noca huetzcaca.

Amo xiquincahuili ma mohueyitlalica noixpa pampa nihuetzqui.

17 Nijmati nimiquis pampa tlacuajcualoli amo nechcahua niyon se tlatoctzi.

18 TOTECO, nijnequi nimitzpannextilis nochi notlajtlacolhua,

pampa nelía nimotequipachohua ica catli nijchijtoc.

19 Nocualancaitacahua momiyaquilijtoque huan moyoltetilijtoque.

Miyac nechcualancaitaj, masque amo tleno niquinchihuilijtoc.

20 Masque catli cuali niquinchihuilijtoc, nechcuepilijtoque ica catli fiero.

Nechcualancaitaj pampa nijtoquilía catli cuali.

21 NoTeco Dios, amo techcajtehua noseli.

Amo ximoiyocatlali ica na.

22 ¡Toteco! Xihuala nimantzi techpalehuiqui, ta tinotemaquixtijca.