1 Toteco Dios, tijcactoque tlaque techpohuilijtoque tohuejcapan tatahua tlen ta,

huan nochi nopa tlamantli catli tiquinchihuili huejcajya.

2 Quena, Toteco Dios, ica mohueyi chicahualis ta tiquintojtocac nopa fiero masehualme catli quinhueyichihuayayaj teteyome ipan nopa tlali,

huan nopa tlali tiquinmacac totatahua.

Quena, tiquintlatzacuilti ne sequinoc huan tiquinpalehui tohuejcapan tatahua para ma momiyaquilica,

huan ma moaxcatica.

3 Tohuejcapan tatahua amo quitlanque nopa tlali ica ininmachete, niyon ica ininchicahualis.

Tlatlanque ica nopa hueyi chicahualistli catli ta tijpiya ipan monejmac,

huan pampa hueyi moyolo ininhuaya,

huan achi más tiquinicnelía.

4 Ta tinotlanahuatijca huan tinoTeco Dios.

Ta tiquinmanahuía huan tijchihua ma tlatlanica momasehualhua.

5 Quena, ica motlapalehuil tiquintlanise tocualancaitacahua.

Huan ica mochicahualis ininpan timoquejquetzase catli techhuilanaj.

6 Pampa amo timotemachíaj ipan tocuahuitol huan tomachete para ma techmanahuica huan titlatlanise.

7 Eltoc ta, Toteco, catli tijchihua ma tiquintlanica tocualancaitacahua.

Ta tiquinpinahualtijtoc nochi catli techcualancaitaj.

8 Mojmostla timitzpaquilismacase tinoTeco Dios.

Huan timitzhueyichihuase ica huicatl para nochipa.

9 Pero amantzi eltoc quen techtlahuelcajtoc huan techpinahualtijtoc.

Niyon ayacmo tinemi ininhuaya tosoldados quema tiontlahuilanaj.

10 Tijchijqui ma ticholoca iniixpa tocualancaitacahua.

Quena, inijuanti catli techcualancaitaj techtlachtequilíaj huan quihuicaj nochi catli quinequij.

11 Techtemactilijtoc quen tipilborregojtzitzi catli san quichiyaj para quinhuicase campa quinmictise.

Huan techsemantoc campa hueli ipan sequinoc tlalme campa quinhueyichihuaj teteyome.

12 Technemacatoc timomasehualhua ica nelquentzi quen amo tleno topati elisquía.

13 Nochi masehualme ipan nopa tlalme catli itztoque tonechca quiitaque catli techchihuilijtoc.

Yeca techtlaijilhuíaj huan toca paquij.

14 Tijchijtoc para inijuanti catli quinhueyichihuaj tlaixcopincayome ma toca huetzcaca.

Nochi quema techitaj, motzonojoliníaj.

15 Mojmostla toixpa eltoc nopa pinahualistli hasta tijnequisquíaj timoixtzacuase,

16 pampa techtlaijilhuíaj huan techhuetzquilíaj nopa motlacuepilijca masehualme.

Quena, techpinahualtíaj tocualancaitacahua.

17 Nochi ni tlamantli topantitoc,

masque amo timitzelcajtoque,

niyon amo timoiyocacajtoque tlen nopa camanal sencahuali catli tijchijqui ininhuaya tohuejcapan tatahua.

18 Amo timoiyocatlalijtoque tlen ta,

niyon amo tijcajtejtoque moojhui.

19 Pero techtlahuelcajtoc campa amo aqui itztoc,

campa san itztoque tlapiyalme catli mosisiníaj.

Techcajtoc ipan se tzintlayohuilotl catli eltoc quen miquilistli.

20 Toteco Dios, sintla timitzelcajtosquíaj,

o tijhueyichijtosquíaj se totlaixcopincayo,

21 ta tijmajtosquía,

pampa ta tijmati nochi catli ichtacatzi eltoc ipan yolojtli.

Pero amo tijchijtoque, Toteco.

22 Pero masque amo tleno tijchijtoque,

por ta tiitztoque nechca miquilistli.

Techchihuaj quen tipilborregojtzitzi catli san quichiyaj ajqueya quinmictis pampa timoaxcahua.

23 ¡Toteco ximotlanana!

¡Amo xicochi!

Amo ximoiyocatlali tlen tojuanti para nochipa.

24 ¿Para tlen timoixtlatía?

Eltoc quen tiquelcajtoc para tojuanti titlaijiyohuíaj huan miyac techcualancaitaj.

25 Techtlahuisojtoque hasta tlalchi.

Toixayac mocahua ipan tlaltejpoctli huan amo hueli timotlananase.

26 ¡Ximotlanana, Toteco!

Techpalehuiqui.

Techmaquixti pampa tlahuel techicnelía.