1 NoTeco Dios, techtlacaquili quema nimotlatlajtía ica ta.

Amo ximotlati quema nimitztzajtzilía.

2 Techtlacaquili huan technanquili,

pampa tlahuel nimotequipachohua huan nichoca pampa nitlaijiyohuía.

3 Nocualancaitacahua nechtzajtzilíaj chicahuac huan quinequij nechmictise.

Tlahuel nechcualancaitaj huan ica nochi inincualancayo nechtepotztocatihualahuij para nechtzontlamiltise.

4 Nelía nechcocohua noyolo pampa nechitzquía se hueyi majmajtli.

5 Quena, tlahuel nimajmahui huan nihuihuipica.

6 ¡Cuali elisquía sintla nijpiyasquía noeltlapal quen quipiya se paloma para huelisquía nipatlantehuasquía huan nimosiyajquetzati!

7 Quena, nicholosquía hasta nepa campa huactoc tlalme catli mopantíaj huejca huan nepa nimocahuasquía.

8 Nimoisihuiltisquía para nicholos huan nimotlatis tlen nochi ni tlaijiyohuilistli catli hualajtoc nopani.

Eltoc quen se hueyi ajacatl hualajtoc catli tlamitlasosolohua.

9 Toteco, xiquintzontlamilti nocualancaitacahua.

Xijchihua ma mocuapoloca inijuanti ininseltzitzi quema camanaltij.

Na niquitztoc para nochi tlahuilanaj campa hueli ipan ni moaltepe.

10 Tlayohua huan tonaya masque itztoque catli quiyahualojtinemij ni altepetl ipan itepa para quimocuitlahuise tlen tocualancaitacahua,

inijuanti catli nica ehuani ininseltzitzi mohuilanaj se ica seyoc ipan ni altepetl.

11 Tlatlajco nopa altepetl quichihuaj miyac tlamantli catli amo cuali,

huan amo onca tlatlepanitacayotl.

Ipan tianquis huan campa hueli momictíaj,

tlachtequij huan tlacajcayahuaj.

12 Amo elqui se nocualancaitaca catli nechcajcayajqui,

pampa sintla quej nopa eltosquía, huajca niquijiyohuijtosquía.

O hueltosquía nimotlatis huan nicholos.

13 Pero elqui se catli nemiyaya nohuaya,

se catli nechyacanayaya huan catli nonelhuampox.

14 Quena, elqui yaya catli sentic timopohuiliyayaj nopa tlamantli catli tijpixtoyaj ipan toyolo,

huan yejyectzi timocamanalhuiyayaj quema san sejco tiyohuiyayaj ipan mochaj, Toteco Dios.

15 Ma tlatocmiquica nochi nocualancaitacahua huan ma yaca hasta mictla quema noja yoltoque,

pampa ipan ininchaj huan ipan ininyolo san onca tlajtlacolotl.

16 Pero na san nijtzajtzilis Toteco Dios para ma nechmaquixti.

Huan quena, temachtli yaya nechmaquixtis.

17 Na nimotlatlajtis ica ijnaloc, ica tlajco tona huan ica tiotlac.

Huan yaya nechtlacaquilis huan nechnanquilis.

18 Ipan tlahuilancayotl yaya nechmanahuis,

masque tlahuel miyac nocualancaitacahua nechhuilanase chicahuac.

19 Toteco Dios catli ipa itztoc huan tlanahuatijtoc hasta tlen huejcajya,

yaya nechtlacaquilis huan quintzontlamiltis.

Pampa nocualancaitacahua amo quipatlaj ininnemilis catli fiero,

niyon amo quitlepanitaj itlanahuatil.

20 Nopa masehualme catli amo cuajcualme momatlananaj para quinhuilanaj hasta ininhuampoyohua.

Quiixpanoj nopa camanali catli quichihuaj ininhuaya sequinoc.

21 Quitequihuíaj camanali catli nelyejyectzi huan yamanic quen mantequilla,

pero ipan ininyolo san moilhuíaj quenicatza tlahuilanase.

Nochi catli quiijtohuaj eltoc alaxtic quen aceite,

pero ichtacatzi teyolcocohuaj ica camanali quen quema timotzontequis ica machete.

22 Nochi motequipachol xijcahua imaco TOTECO huan yaya mitzmacas temachili.

TOTECO amo quicahuas ma huetzi se catli quitlepanita.

23 Pero ta tinoTeco Dios,

tiquintitlanis nocualancaitacahua ipan nopa ostotl catli tlahuel huejcatla.

Nopa temictiani huan istlacatini amo itztose niyon tlajco tlen ininnemilis,

pampa amo huejcahuase itztose ipan ni tlaltipactli.

Pero na nochipa nimotemachis ipan ta para techmaquixtis.