1 ¡Amojuanti anmasehualme catli anquipiyaj tequiticayotl para antetlajtolsencahuaj!

¿Atlac nelía xitlahuac anquintlajtolsencahuaj masehualme?

2 ¡Amo! San anmoilhuíaj catli fiero huelis anquichihuase.

Anquichijtoque para noja más ma onca tlahuilancayotl ipan amotlal.

3 Nopa masehualme catli amo quitlepanitaj Toteco pejque moiyocacahuaj hasta quema tlacatque.

Huan ipa istlacatij hasta quema pejque huelij camanaltij.

4 Inijuanti tencocoque quen cohuame catli temictíaj ica inintencococa.

Huan itztoque quen nopa cohuame catli momatij quincaquij inintoscac inintecohua,

pero ayacmo quinequij quinneltocase.

5 Monacastzacuaj huan ayacmo quichihuilíaj cuenta,

masque ininteco quintlatzotzonilíaj yejyectzi para ma quinneltoquilica.

Huan nimantzi tetzacaníaj.

Quej nopa itztoque ni fiero masehualme.

6 NoTeco Dios, xiquintlamiltili ininchicahualis.

Quena, xiquinquixtili ininchicahualis nopa masehualme catli mosisiníaj,

quen tiquinquixtilisquía inintlancoch huan inintlacuajcuayo nopa tecuanime.

7 Ma ixpolihuica quen ixpolihui nopa atl catli toyahui ipan huactoc tlali.

Huan nopa tepostli catli quipixtoque ininmaco para ica tlahuilanaj,

ma eli quen amo tleno ipati.

8 Ma elica quen nopa cuachololojtli catli atiya quema noja nentinemi.

O ma elica quen se pilconetzi catli tlacatqui mictoc huan catli amo quema quiitac tlatlanextli.

9 Toteco Dios quinixpolihuiltis catli huehuentzitzi huan catli telpocame.

Quintzontlamiltis nelnimantzi quen se chachapali catli nimantzi totoniya ica nopa tlitl catli lementoc ica huitzcuahuitl.

10 Pero catli itztoque xitlahuaque iixpa Toteco,

paquise quema quiitase para Toteco ya momacueptoc ica nopa masehualme catli amo tleno quitlepanitaj,

huan moicxipajpacase ica inieso nopa masehualme.

11 Huan huajca nochi masehualme quiijtose:

“Nelía quiselíaj se cuali tlaxtlahuili nopa masehualme catli itztoque xitlahuaque,

pampa melahuac itztoc se Dios catli tetlajtolsencahua xitlahuac ipan ni tlaltipactli.”