1 Toteco Dios, ta techhuejcamajcajtoc huan ayacmo tijmatij tlaque monequi tijchihuase.

Ticualantoc ica tojuanti huan techtlahuelcajtoc.

Ama timitztlajtlaníaj para sempa ximoyoltlali tohuaya huan sempa techfuerzajmaca.

2 Ni tlali tijchijqui ma huihuipica ica majmajtli.

Tlahuel tijtlaijiyohuiltijtoc.

Huajca ama, noTeco Dios, sempa xijcualtlali totlal catli tlamitlatlapacatoc.

3 Tijchijtoc para tojuanti timomasehualhua ma tijpanoca huejhueyi tlaijiyohuilistli.

Huan ica ni tlaijiyohuilistli techchijtoc ma timomimilojtinemica quen elisquía tiihuintitoque.

4 Pero ama techmacatoc nochi tojuanti catli timitzimacasij huan timitztlepanitaj se bandera campa timosentilise.

Huan quena, nochi tojuanti catli tijchihuaj catli melahuac timosentilise nopona,

para timomanahuise quema tocualancaitacahua techmajcahuilise cuatlamintli.

5 Technanquili huan techmanahui nochi tojuanti catli techicnelía.

Xijtequihui mohueyi chicahualis para techmanahuis.

6 Toteco Dios, yaya catli itztoc ipan ichaj nepa ilhuicac quiijtojtoc:

“Ica paquilistli nijxelos tlali Siquem,

huan nijtamachihuas nopa tlamayamitl catli itoca Sucot,

para nijmacas aqui nijnequis pampa nopa tlalme noaxcahua.

7 Huan nopa tlali Galaad huan Manasés nojquiya noaxcahua.

Ipan tlali Efraín hualase nosoldadojhua catli nechmanahuise quen notzontzajca,

huan ipan tlali Judá hualase notlanahuatijcahua.

8 Catli itztose ipan tlali Moab elise notequipanojcahua catli teicneltzitzi.

Catli itztoque ipan tlali Edom nechtequipanose.

Huan nitlahuejchihuas chicahuac quema ya niquintlantos nopa filisteos.”

9 ¿Ajqueya nechchihuas ma nicalaqui ipan nopa altepeme catli moyahualtzactoque ica tepamitl ipan tlali Edom?

¿Ajqueya nechchihuas ma niquintlani sintla amo ta?

10 San ta techyacanas ipan tlahuilancayotl, noTeco Dios.

Amo techtlahuelcahua.

Sintla ta amo tiyas ihuaya tosoldados para tlahuilanase, Toteco,

amo aqui techpalehuis.

11 Quena, Toteco Dios, techpalehui para tiquintlanise tocualancaitacahua,

pampa inintlapalehuil masehualme, amo tleno ipati.

12 Ica itlapalehuil Toteco Dios tijchihuase huejhueyi tlamantli.

Yaya iseltzi quintzontlamiltis nochi tocualancaitacahua.