1 ¡TOTECO, na san ipan ta nimotemachijtoc!

¡Amo quema techpinahualti!

2 ¡Techmanahui tlen nocualancaitacahua,

pampa ta tixitlahuac!

¡Techchololti ininmaco!

Ximohuijtzoma quentzi para techtlacaquilis huan techmaquixti.

3 Nochipa san nimotlatijtoc huan nimotemachijtoc ipan ta para amo nechajsise nocualancaitacahua.

Nijmati para ta titlanahuatijtoc ma nechmaquixtica pampa san ipan ta huelis nimomanahuis.

4 NoTeco Dios, techmanahui ininmaco ni mosisinijca tlacame huan temictiani.

5 TOTECO, ta catli titoTeco, san ipan ta nimotlatzquilijtoc,

huan san ipan ta nimotemachijtoc hasta tlen quema niconetzi.

Huan quej nopa nitelpocatixqui.

6 Ta nochipa tiitztoc nohuaya hasta quema noja niitztoya iijtico nonana.

Quena, tlen iijtico nonana ta techquixti huan nochipa techpalehuijtoc.

¡Yeca tlahuel nijnequi nimitzpaquilismacas para nochipa!

7 Miyac san nechsentlachilíaj pampa quiitaj quenicatza techmocuitlahuía.

8 Semilhuitl nimitzpaquilismacas huan nimitzhueyimatis por nochi catli techchihuilijtoc.

9 Amo techtlahuelcahua ama quema ya nihuehuentzi huan ayacmo nijpiya fuerza.

10 Pampa nocualancaitacahua nechejelnamiquij,

huan san sejco mosentilijque ininhuaya sequinoc catli quinequij nechmictise.

11 Huan quiijtohuaj:

“¡Ma tijtepotztocaca para tiquitzquise pampa iDios ya quitlahuelcajtoc,

huan amo aqui huelis quimanahuis!”

12 ¡Toteco Dios, amo ximohuejcachihua tlen na!

¡NoTeco, xihuala nimantzi techpalehuiqui!

13 Xiquinpinahualti huan xiquintzontlamilti nopa nocualancaitacahua catli quinequij nechchihuilise catli fiero.

Quena, ma ayacmo quimatica tlaque quichihuase.

14 Pero na más nimotemachis mopan ta para techpalehuis.

Huan noja más nimitzpaquilismacas.

15 Nochi masehualme niquinilhuis para san ta ticuali huan niquinpohuilis quenicatza techmanahuijtoc,

huan techmocuitlahuijtoc mojmostla.

Amo hueli nijpohuas quesqui huelta techmanahuijtoc ica catli amo cuali pampa tlahuel miyac.

16 Nochi tonali ninejnemi ica nopa chicahualistli catli techmaca, TOTECO, ta catli tinoDios.

Huan nochi masehualme niquinilhuía para san ta tixitlahuac huan ticuali.

17 ¡Toteco Dios, ta techpalehuijtoc hasta quema noja nieliyaya niconetzi!

Hasta ama noja niquinpohuilijtinemi sequinoc tlen nopa huejhueyi tlamantli catli tijchijtoc.

18 ¡Toteco Dios, ama quema ya nihuehuentzi huan nitzonchipahuac,

amo techtlahuelcahua!

Noja techmaca nemilistli para niquinpohuilis tlen mohueyi chicahualis ni masehualme catli itztoque ama huan catli teipa tlacatise.

19 Toteco Dios, mochicahualis huan catli xitlahuac tijchihua onajsi hasta ilhuicac.

Ta tijchijtoc huejhueyi tlamantli.

Amo onca seyoc Dios quen ta.

20 Ta techcahuilijtoc ma nijpano huejhueyi tlaohuijcayotl huan tequipacholi.

Pero nijmati para teipa, sempa techtlananas tlen campa nopa ostotl,

huan tijchihuas ma nimoyolcui.

Huan sempa nijpiyas nemilistli.

21 Huan huajca achi más techhueyitlalis huan sempa techyoltlalis.

22 Huan na nimitzpaquilismacas ica tlatzotzonali tlen arpa huan guitarra.

NoTeco Dios, nihuicas tiohuicatl catli tepohuilía para tijchihua nochi catli tiquijtohua.

Ta titoTeco tiisraelitame huan titlatzejtzeloltic huan nelía titemachtli.

23 Ica paquilistli nitzajtzis huan nihuicas para niteilhuis quenicatza techmaquixtijtoc.

24 Semilhuitl nitepohuilis para ta tijchihua catli xitlahuac,

pampa nochi catli quinequiyayaj nechmictise tiquinpinahualti huan tiquinechcapantlali.