1 Nomasehualhua, xijtlacaquilica notlamachtil huan nochi catli niquijtohua,

2 pampa nimechnextilis tlamantli catli amo aqui más quimati catli panoc huejcaya.

3 Tlamantli catli tijcactoque huan tijmajtoque pampa totatahua techpohuilijque.

4 Quena, nimechmatiltis para anhuelise anquinpohuilise amoconehua nochi nopa yejyectzitzi huan huejhueyi tlamantli,

catli TOTECO quichijqui ica ihueyi chicahualis.

5 Toteco Dios quimacac miyac tlanahuatilme Jacob ipan tlali Israel para ma monejnemiltica xitlahuac,

huan quinnahuati tohuejcapan tatahua ma quinnextilica ininconehua,

6 huan iniixhuihua catli tlacatise teipa.

Huan quej nopa nochi masehualme quiniximatise itlanahuatilhua Toteco.

7 Yeca hasta ama miyac masehualme quintlepanitaj itlanahuatilhua Toteco Dios,

huan motemachíaj ipan ya para quinmocuitlahuis.

Huan amo ma quielcahuaca nochi nopa huejhueyi tlamantli catli quichijtoc Toteco.

Monequi ma quitoquilijtinemica nochi itlanahuatilhua.

8 Pampa amo quinamiqui para elise quen ininhuejcapan tatahua catli moyoltetilijque huan amo tlatlepanitaque.

Inijuanti amo elque temachme ica Toteco Dios,

niyon amo quimactilijque ininyolo, niyon ininnemilis.

9 Nopa masehualme tlen tlali Efraín mocuepatoj huan cholojque ipan nopa tonali quema yohuiyayaj tlahuilanatij.

Quena, cholojque masque quipiyayayaj miyac tepostli para tlahuilanase.

10 Amo quintlepanitaque itlanahuatilhua Toteco Dios,

huan amo quinejque nejnemise ipan iojhui.

11 Quielcajque nochi tlamantli catli yaya hueli quichihua.

Amo quielnamijque nopa yejyectzi tiochicahual nextili catli quichijqui Toteco.

12 Quena, Toteco Dios quichijqui miyac tlamantli iniixpa ininhuejcapan tatahua ipan tlali Egipto campa itoca Zoán.

13 Quitlajcoxelo nopa hueyi atl huan quichijqui ma panoca.

Ipan ome lados nopa atl moquetzqui quen tepamitl.

14 Ica tonaya quinyacanqui ica se mixtli para quinecahuilis,

huan ica tlayohua ica se mixtli catli tlahuiyaya quen tlitl.

15 Ipan huactoc tlali quitlapo nopa hueyi tetl huan quisqui miyac atl para atlique hasta aixhuique.

16 ¡Quena, ipan tetl quisqui miyac atl catli motlalo quen se hueyatl!

17 Pero inijuanti quisenhuiquilijque amo quitlepanitaque.

Huan nepa campa huactoc tlali tlajtlacolchijque ica Toteco Catli Más Hueyi.

18 Pampa quiyejyecojque Toteco Dios huan quitlajtlanijque tlacualistli catli ininyolo quinequiyaya.

19 Hasta cualanque ica Toteco huan quiijtojque:

“¿Atlac Toteco Dios huelis techtlamacas ipan ni huactoc tlali?

20 Xiquitaca, Toteco Dios quitlapo nopa hueyi tetl huan quisqui miyac atl quen eltosquía se hueyatl hasta atzonpoli tlali,

pero ¿atlac nojquiya hueli techmacas tlacualistli?

¿Huelis techtlamacas tiimasehualhua ica nacatl?”

21 Huan quema TOTECO quicajqui ni tlamantli, tlahuel cualanqui.

Huan ipan icualancayo quisqui tlitl ica israelitame, inijuanti catli iixhuihua Israel,

22 pampa inijuanti amo quineltocaque Toteco Dios,

niyon amo motemachijque ipan ya para quipiya chicahualistli para quinmaquixtis.

23 Pero masque quej nopa quichijque,

Toteco Dios quinahuati nopa mixtli huan quitlapo ilhuicactli.

24 Huan quichijqui ma huetzi nopa tlacualistli catli itoca maná para ma quicuaca quen quema huetzi atl.

Quinmacac tlacualistli catli hualajqui tlen ilhuicac.

25 Masehualme quicuajque catli elqui inintlacualis itequihuajcahua Toteco.

Quena, quintlamacac hasta cuali ixhuique huan hasta mocajqui nopa tlacualistli.

26 Ica ihueyi chicahualis quihualicac nopa ajacatl catli huala campa hualquisa tonati huan catli huala ica tlani para ma tlaajaca campa ilhuicactli.

27 Quichijqui ma hualaca miyaqui totome quen imiyaca tlaltejpoctli.

Quena, hualajque totome quen mixtli huan quen imiyaca xali catli onca iteno hueyatl.

28 Huan Toteco quichijqui para nopa totome ma huetzica tlatlajco campa quichijtoyaj ininyoyoncal.

29 Huan nopa masehualme tlacuajque hasta ixhuique.

Toteco quinmacac nacatl quen ininyolo quinequiyaya.

30 Pero quema sanoc tlantoyaj tlacuaj,

huan hasta noja quipixtoyaj nacatl ipan inincamac,

31 Toteco Dios motlananqui ica ihueyi cualancayo,

huan quintzontlamilti nochi nopa telpocame catli más tlapejpenilme ipan tlali Israel.

32 Pero masque Toteco quinchihuili ya nopa,

nopa masehualme quisenhuiquilijque tlajtlacolchijque,

huan amo quineltocaque nopa huejhueyi tiochicahual nextili catli yaya quichijqui iniixpa.

33 Yeca Toteco quintlaijiyohuilti ipan nochi ininnemilis huan quintzontlamilti san ica se tlatoctzi.

34 Pero teipa, quema ya quintzontlamiltijtoya sequin,

huajca quena, ne sequinoc quitemojque Toteco Dios.

¡Quena, nimantzi mocuepque huan quitoquilijque!

35 Huan quielnamijque para yaya Toteco Dios catli quinmocuitlahuiyaya para amo quinajsis catli amo cuali.

Huan quielnamijque para Toteco Catli Más Hueyi san yaya inintemaquixtijca.

36 Pero nopa israelitame amo quitoquiliyayaj ica nochi ininyolo.

¡Amo! Quitoquiliyayaj san ica inincamac.

37 Pampa ininyolo eltoya huejca tlen Toteco.

Huan amo quichihuayayaj catli quitlajtolcahuilijtoyaj Toteco para quichihuase.

38 Pero Toteco quipixqui hueyi iyolo ica inijuanti.

Quintlapojpolhuiyaya inintlajtlacolhua huan amo quintzontlamiltiyaya.

Miyac huelta quiquetzqui icualancayo para amo quintlatzacuiltis.

39 Pampa Toteco quielnamijqui para inijuanti san elque masehualme catli ininnemilis ixpolihui san ica se tlatoctzi,

huan amo quema mocuepasquíaj sempa.

40 Nepa ipan huactoc tlali,

tlahuel miyac huelta amo tlatlepanitaque ica Toteco Dios huan quiyolcocojque.

41 Tlatoctzitzi quiyejyecojque,

huan ica ya nopa quichihualtiyayaj para Toteco ma quintzontlamilti.

Niyon amo quicahuilijque para Toteco ma quintiochihua,

yaya catli ininDios israelitame huan catli Tlatzejtzeloltic.

42 Quielcajque ihueyi chicahualis huan iteicnelijcayo.

Huan quielcajque quenicatza quinmanahui ininmaco inincualancaitacahua.

43 Quielcajque quenicatza Toteco quititlanqui tlatzacuiltili ipan tlali Tanis huan ipan tlali Egipto.

44 Quielcajque quenicatza quicuepqui estli nopa atl huan ayacmo aqui huelqui quiijic.

45 Quielcajque quenicatza quintitlanqui tlahuel miyac sayolime hasta quitemitijque nopa tlali.

Quielcajque quenicatza nopa temasolime quitemitijque nopa tlali Egipto.

46 Toteco quintitlanqui ocuilime huan chapolime para ma quicuaca inintlatochui huan ininpixquilis.

47 Ica tesihuitl quintzontlamilti ininxocomecamil huan ininhigueramil.

48 Ininhuacaxhua mijque ipan potrero pampa Toteco Dios quinmajcahuili tesihuitl catli tlahuel huejhueyi.

Huan ininborregojhua mijque ica tlapetlancayotl.

49 Quena, Toteco tlahuel cualanqui ica inijuanti,

huan yeca quintitlanili tlacuajcualocayotl huan tlaohuijcayotl.

Huan quintitlanili se pamitl tlen itequihuajcahua Toteco catli tetzontlamiltíaj.

50 Cualanqui nelchicahuac huan amo quimanahui niyon se Egipto ejquetl.

San quintitlanili tlatzacuiltili huan huejhueyi cocolistli.

51 Teipa Toteco quinmicti nopa achtihui ehuani ipan sesen familia tlen tlali Egipto.

Quena, quinmicti catli elqui iniachtihui fuerza quema pejque quinpiyaj coneme.

52 Pero quinquixti imasehualhua quen elisquíaj pilborregojtzitzi,

huan quinyacanqui ica yejyectzi ipan nopa huactoc tlali.

53 Quinyacanqui ica miyac temachili para ma amo majmahuica.

Pero nopa hueyi atl quinatzonpolihuilti inincualancaitacahua.

54 Huan quinhuicac hasta campa inepa nopa tlali catli tlatzejtzeloltic.

Nopa tlali catli quipiya miyac tepeme catli Toteco quintlanili para inijuanti.

55 Iniixpa quintojtocac nopa masehualme catli itztoyaj ipan nopa tlali.

Teipa quitamachijqui huan quinmajmacac nopa huejhueyi familias tlen israelitame para iniaxca.

Huan nopona quincajqui ma itztoca.

56 Pero masque quinchihuili ya nopa,

inijuanti quisenhuiquilijque quiyejyecohuaj huan quicualancamacaj Toteco Catli Más Hueyi.

Huan amo quinejque quitlepanitase icamanal.

57 Yeca mocuepque para amo calaquise ipan nopa tlali tlatencahuali huan quicamaijixnamijque san se quen inintatahua quichijque.

Huan quen se cuatlamintli catli huijcoltic amo yohui xitlahuac quema quimajcahuaj,

inijuanti nojquiya amo yajque xitlahuac para quichihuase ipaquilis Toteco.

58 Quicualancamacaque Toteco pampa mochijchihuilijque teteyome huan tlaixpamitl para quinhueyichihuase ininteteyohua.

59 Pero quema Toteco Dios quiitac ya ni,

tlahuel cualanqui huan pejqui quincualancaita.

60 Huan quitlahuelcajqui itiopa catli eltoya ipan altepetl Silo,

nopa yoyon cali campa ipan itztoya catli quichijtoya nopona ininhuaya imasehualhua.

61 Huan Toteco quincahuili inincualancaitacahua ma quihuicaca icaxa catli quinpixtoya itlanahuatilhua.

Elqui quen quincuilijque ininchicahualis huan ininyejyejca.

62 Nojquiya quintemactili imasehualhua ininmaco inincualancaitacahua para ma quinmictica ica machete,

pampa yaya tlahuel cualantoya ininhuaya.

63 Inintelpocahua quintlatijque,

huan iniichpocahua quintzontlamiltijque,

niyon amo quiaxilijque para monamictise huan huicase ipan nenamictili.

64 Quintzontlamiltijque nopa totajtzitzi ica machete huan ininsihuajhua nojquiya mijque nimantzi,

niyon amo quinchoquilijque ininhuehuejhua.

65 Huajca Toteco motlananqui quen quema se acajya cochi huan mehua,

o quen se tetica tlacatl catli tlahuel tzajtzi chicahuac pampa ihuintitoc.

66 Huan Toteco quinichtacahui quinhuilanqui icualancaitacahua.

Quena, quinhuejcamajcajqui huan quintitlanqui ipan se lugar campa quipanose pinahualistli para nochipa.

67 Pero Toteco quintlahuelcajqui nopa huejhueyi familias catli hualajqui tlen José huan Efraín.

68 San quintlapejpeni ihueyi familia Judá,

huan nopa tepetl Sion catli yaya tlahuel quiicneliyaya.

69 Huan nopona quichijchijqui itiopa catli yejyectzi huan temachtli,

huan catli huejcahuasquía para nochipa quen huejcahua ilhuicactli huan tlaltipactli.

70 Quitlapejpeni itequipanojca, David,

quema quinmocuitlahuiyaya borregojme,

71 quema yohuiyaya inintepotzco nopa tenan borregojme catli quinpiyayayaj ininconehua,

huan quinhualicayaya para ma quinmocuitlahui.

Huan Toteco quichijqui David ma quinyacana imasehualhua,

nopa israelitame catli quintlapejpenijtoya para iaxcahua.

72 Huan quena, David quinmocuitlahui imasehualhua Toteco ica nochi ichicahualis huan ica nochi iyolo.