1 ¡Xihuicaca ica paquilistli para Toteco Dios,

pampa yaya techpixtoc imaco!

¡Ma tijpaquilismacaca!

¡Ma tihuicaca para Toteco Dios yaya catli iTeco Jacob!

2 Ma tihuicaca huan ma tijtzijtzilinica pandero.

Nojquiya ma tijtzotzonaca nopa arpa huan guitarra.

3 Ma tijpitzaca tlapitzali quema yancuic metztli,

quema temitoc metztli,

huan ipan sequinoc tonalme quema tiilhuichihuaj,

4 pampa Toteco Dios catli eli iTeco tohuejcapan tata Israel techmacatoc nopa tonalme para ma tipaquica miyac.

Huan nojquiya eltoc ijcuilijtoc ipan itlanahuatilhua para ma tijchihuaca.

5 Huan techmacac para ma tiquelnamiquica catli quichijqui ica José,

huan quenicatza mohuilanqui ininhuaya nopa masehualme tlen tlali Egipto,

campa titetequipanojque san tlapic.

Nijcajqui camanaltic se catli amo niquiximatqui huan quiijto:

6 “Ama nimechquixtilis nopa tlamamali catli anquihuicaj amoajcolpa,

huan ayacmo anquitlananase ica amomax tlamantli catli tlahuel etic.”

7 Nojquiya quiijto:

“Amojuanti antechtzajtzilijque quema anitztoyaj ipan tlaohuijcayotl huan na nimechmaquixti.

Nimechnanquili hasta tlen nepa tepetl Sion campa motlatía nopa tlatomonilotl.

Nojquiya ipan tlali Meriba nimechyejyecoli amotlaneltoquilis quema anmotequipachohuayayaj pampa amo oncayaya atl.

8 Yeca annoisraelita masehualhua,

techtlacaquilica quema chicahuac nimechtlacahualtía.

9 Amo quema xijhueyichihuaca seyoc catli quitocaxtíaj ‘dios’.

Niyon amo xiquinpiyaca tlaixcopincayome ipan amocalijtic.

10 Pampa elqui na, niamoTECO huan amoDios,

catli nimechquixti ipan tlali Egipto.

Xijtlapoca amocamac huan anquiitase sintla amo nimechixhuitis.

Quena, anquiselise nochi tlamantli tlatiochihualistli catli anmechpolohua.

11 ¡Pero amo! Nomasehualhua amo quinejque nechtlacaquilise.

Israelitame amo quinejque ma niitzto tlatlajco inijuanti.

12 Yeca niquintlahuelcajqui para ma huihuitiyaca huan ma elica quen popoyotzitzi.

Huan niquincahuili ma quichihuaca catli inijuanti quinequiyayaj.

13 Pero sintla noisraelita masehualhua nechtlacaquilijtosquíaj huan quitoquilijtosquíaj noojhui,

14 huajca na san ipan se tlatoctzi niquinechcapantlalijtosquía inincualancaitacahua huan niquintzontlamiltijtosquía.”

15 Quena, nochi catli quicualancaitaj TOTECO,

nimantzi moechcapanojtosquíaj iixpa.

Huan itztosquíaj ipan tlatzacuiltili para nochipa.

16 Pero Toteco Dios anmechtlamacasquía ica tlacualistli catli más cuali.

Huan anmechmacasquía sayolnectli huan nochi catli más anquinequij para anmechixhuitisquía.