1 TOTECO, ta tiDios Catli Tijpiya Nochi Chicahualistli,

tlahuel yejyectzi motiopa.

2 Nelía tlahuel nijnequi nicalaquis ipan icalixpa nopa tiopamitl,

para nimonechcahuis huan nihuicas ica nochi noyolo para ta, Toteco Dios, catli tiitztoc.

3 TOTECO, ta tiDios Catli Tijpiya Nochi Chicahualistli,

Ta tinotlanahuatijca huan tinoTeco.

Campa motlaixpa ipan mochaj nochi quipantíaj ininchaj,

hasta nopa cochome huan toctoctzitzi catli nopona motepasoltíaj,

para nopona quintlacatiltíaj ininconehua.

4 ¡Nelía paquij nopa masehualme catli itztoque ipan motiopa huan quisenhuiquilíaj mitzpaquilismacaj!

5 Cuali ininpanti nopa masehualme catli itztoque momaco, Toteco,

huan quitoquilíaj moojhui huan yohuij Jerusalén para mitzhueyimatise.

6 Quema panose campa ohui huan ipan nopa tlamayamitl tlen Choquistli,

quicuepase para elis quen se yejyectzi ameli catli temitos ica atl quema tlaquiyahui,

pampa nopona quipantise miyac tlatiochihualistli,

7 Huan quej nopa nejnentiyase mojmostla ica más chicahualistli,

huan ajsise ipan Jerusalén para nopona monextise moixpa, Toteco.

8 TOTECO Dios, ta tiDios Catli Tijpiya Nochi Chicahualistli, techtlacaquili quema nimotlatlajtía.

Quena, techtlacaquili ta tiiTeco Israel.

9 Toteco, ta catli techmanahuía.

Xijcualita huan xijtiochihua nopa tlanahuatijquetl catli ticaltijtoc para tlanahuatis ipan Israel.

10 Achi más cuali ma niyolto se tonal huan ma niitzto ipan motiopa, Toteco,

huan amo niyoltos se mil tonali huan san ninentinemis campa hueli.

Quena, achi más cuali nimoquetzasquía campa ipuerta motiopa, Toteco,

huan amo niitztos ipan se hueyi cali campa onca tlajtlacoli.

11 Pampa ta, Toteco Dios, techtlahuilía huan techmanahuía.

Ta techicnelía huan techhueyitlalía.

Huan nochi catli monejnemiltíaj xitlahuac ipan moojhui,

ta tiquinmacas nochi tlamantli cuajcuali catli inijuanti quinequij.

12 Toteco Dios, ta tiDios Catli Tijpiya Nochi Chicahualistli,

nelía paquij nopa masehualme catli motemachíaj ipan ta para tiquinmocuitlahuis.