1 Nelía paquij nochi catli monejnemiltíaj xitlahuac,

huan catli senquistoc quichijtinemij catli quiijtohua iley TOTECO.

2 Paquij nopa masehualme catli quitemohuaj TOTECO ica nochi ininyolo huan quichijtinemij catli yaya quiijtohua.

3 Pampa inijuanti amo quichihuaj catli amo cuali.

Monejnemiltíaj senquistoc ipan iojhui TOTECO.

4 Ta techmacatoc motlanahuatilhua para ma tijchihuaca catli quiijtohuaj.

5 ¡Tlahuel nijnequisquía nijchijtinemis senquistoc catli techyolmelajtoc ma tijchihuaca!

6 Quej nopa amo nimopinahuasquía sintla niquinchijtinemis nochi motlanahuatilhua.

7 Na nimitztlascamatis ica nochi noyolo quema ya nijmachilis nochi motlamachtilhua catli xitlahuac.

8 Na nijchihuas nochi catli techyolmelajtoc ma tijchihuaca ipan tonemilis.

Yeca amo techtlahuelcahua.

9 ¿Tlaque monequi quichihuas se telpocatl para itztos tlapajpactic moixpa, TOTECO?

Monequi quipohuas mocamanal huan quichihuas catli quiijtohua.

10 Na ica nochi noyolo nimitztemojtoc, Toteco.

Amo techcahuili nimoiyocacahuas tlen motlanahuatilhua.

11 Ipan noyolo nicajoctoc nochi catli tiquijtojtoc,

para amo nitlajtlacolchihuas ica ta.

12 TOTECO, ta catli nochi mitzhueyimatij,

technextili quenicatza nijchihuas nochi catli techyolmelajtoc.

13 Na nitepohuilijtoc nochi motlamachtilhua catli ta techmacatoc.

14 Más nimopaquilismacatoc pampa ninemi ipan moojhui huan nijchihua catli ta tiquijtojtoc,

huan amo ipan ricojyotl.

15 Nimonejnehuilis tlen motlanahuatilhua huan ninemis ipan nopa ojtli campa quiijtohuaj ma ninejnemi.

16 Nimopaquilismacas ica catli techyolmelajtoc,

huan amo quema niquelcahuas mocamanal.

17 Na nimotequipanojca, techchihuili catli cuali.

Techcahuili ma niitzto miyac tonali para nijsenhuiquilis nijtlepanitas mocamanal.

18 Techixtlapo para niquitas nopa huejhueyi tlamachtilistli catli quipiya moley.

19 Na san nipaxalohua ipan ni tlaltipactli.

Amo xijtlati motlanahuatilhua tlen na pampa monequi ma nechyacana.

20 Ipan noyolo tlahuel nijnequi nijchihuas nochi catli xitlahuac quen quiijtohua motlamachtil.

21 Ta tiquinajhua nopa tlaixpanoca masehualme catli mohueyimatij.

Inijuanti itztoque quen tlatelchihualme pampa quinhuejcamajcahuaj motlanahuatilhua.

22 Amo xiquincahuili ma nechpinahualtica pampa na nijtlepanita nochi catli ta tiquijtohua.

23 Hasta nopa huejhueyi tlacame catli quipiyaj tequiticayotl mosehuijque para nechejelnamiquise,

pero na nimotequipanojca,

senquistoc nimonejnehuilía tlen nochi catli ta techyolmelajtoc.

24 Pampa motlajtol nechtlahuilía huan nechconsejomaca.

25 Nelía nimotequipachohua hasta nihuetztoc ipan tlaltejpoctli.

Xijyancuili nonemilis ica mocamanal.

26 Na nimitzpohuili nochi catli nijsencajtoc nijchihuas huan ta techtlacaquili.

Ama technextili quenicatza nijchihuas nochi catli techyolmelajtoc.

27 Techchihua ma nijmachili nopa ojtli catli ipan ninemis para niquintoquilis nochi motlanahuatilhua.

Huan na nimonejnehuilis ipan nochi nopa huejhueyi tlamantli catli tijchihua.

28 Nichoca pampa tlahuel nitlaijiyohuía.

Techyolchicahua ica mocamanal.

29 Techpalehui mojmostla para amo niistlacatis.

Huan pampa techicnelía, techpalehui ma nijmati nochi moley.

30 Na nijtlapejpenijtoc nopa ojtli catli melahuac,

huan san nimoilhuía tlen motlamachtil.

31 Na nimotlatzquilijtoc ipan motlajtol huan nijchihuas catli quiijtohua.

¡TOTECO, amo techcahuili nihuetzis ipan pinahualistli!

32 Sintla techmacas noyolo catli cuali moixpa,

huajca na achi más nijchijtinemis catli quiijtohuaj motlanahuatilhua.

33 TOTECO, technextili quenicatza nijchihuas nochi catli techyolmelajtoc.

Huan nijchijtinemis nochi tonali hasta nimiquis.

34 Techmaca tlalnamiquilistli huan nijchijtinemis nochi catli quiijtohua moley.

Quena, nijchijtinemis ica nochi noyolo.

35 Techyacana ipan nopa ojtli catli technextilíaj motlanahuatilhua,

pampa san ya nopa nijnequi nijchihuas.

36 Xijchihua para más ma nijnequi motlajtol huan amo tomi.

37 Techhuejcatlali tlen nochi tlamantli catli amo cuali para amo niquixtocas.

Más cuali tlatoctzitzi techyolchicahuas para senquistoc ninemis ipan moojhui.

38 Techmatilti na, nimotequipanojca, para temachtli techmacas catli techtlajtolcahuilijtoc,

pampa san ta nimitzimacasi huan nimitztlepanita.

39 Amo techcahuili ma niquinimacasi catli nechpinahualtíaj pampa nimitztlepanita,

pampa motlamachtil senquistoc cuali huan xitlahuac.

40 TOTECO, na tlahuel nijnequi nijchihuas catli quiijtohuaj motlanahuatilhua.

Xijyancuili nonemilis pampa ta senquistoc tixitlahuac.

41 TOTECO, techtlasojtla huan techmaquixti tlen nocualancaitacahua,

san quen tiquijtojtoc tijchihuas.

42 Quej nopa huelis niquinnanquilis inijuanti catli nechpinahualtíaj,

huan niquinmatiltis para san nimotemachía ipan mocamanal.

43 Amo techquixtili mocamanal catli melahuac huan amo techcahuili ma niquelcahua,

pampa san ipan motlamachtil na nimotemachía.

44 Na nijtlepanitas moley mojmostla.

Quena, para nochipa nijtlepanitas moley huan amo quema tlamis.

45 Ninemis nimajcajtoc pampa niquintemohua motlanahuatilhua para nijchihuas catli quiijtohuaj.

46 Na niquinpohuilis motlajtol tlanahuatiani,

huan amo nimopinahuas.

47 Na nimopaquilismacas ipan motlanahuatilhua pampa tlahuel niquinicnelía.

48 Nimomatlananas para nijnextis notlatlepanitacayo por motlanahuatilhua,

huan san nimonejnehuilijtinemis tlen nochi catli techyolmelajtoc ma tijchihuaca ipan tonemilis.

49 Amo quema xiquelcahua catli techtlajtolcahuilijtoc techchihuilis na, nimotequipanojca,

pampa san ya nopa nijchixtoc.

50 Catli techtencahuilijtoc techchihuilis nechyoltlalía quema nimopantía ipan tlaijiyohuilistli.

Quena, nochi catli tiquijtojtoc nechmaca yancuic chicahualistli ipan nonemilis.

51 Nopa masehualme catli mohueyimatij nechpinajtíaj pampa nimitztlepanita, Toteco,

pero masque ya nopa, na amo nimohuejcatlalis tlen moley.

52 TOTECO, na niquelnamiqui motlamachtil catli huejcajya techmacac.

Huan motlamachtil nochipa nechyoltlalía.

53 Nelía tlahuel nicualani ica nopa tlaixpanoca masehualme catli quitlahuelcahuaj moley.

54 Nochi catli techyolmelajtoc nechhualiquilijtoc paquilistli,

huan nechchijtoc ma nihuica campa hueli campa niitztinentoc quen niseyoc tlali ejquetl.

55 Ica tlayohua nimitzelnamiqui, TOTECO,

huan nijnequi nijchihuas catli quiijtohua moley.

56 Nijseli tlahuel miyac tlatiochihualistli pampa nijchijqui catli quiijtohuaj motlanahuatilhua.

57 ¡TOTECO, san ta tinoaxca!

Na niquijtojtoc para nijtlepanitas catli quiijtohua mocamanal.

58 Ica nochi noyolo nijnequi motlatiochihualis.

Techtlasojtla senquistoc quen techtlajtolcahuilijtoc para tijchihuas.

59 Nimotlachili quenicatza nimonejnemilti

huan nimantzi nimocuepqui para nijchihuas catli quiijtohua motlajtol.

60 Quena, nimoisihuiltía para nijchihuas catli quiijtohuaj motlanahuatilhua.

61 Miyac tlaixpanoca masehualme nechyahualojtoque para nojquiya ma nitlajtlacolchihua ininhuaya,

pero na amo niquelcajtoc moley.

62 Tlajco yohual nimehua para nimitztlascamatis por motlamachtil catli senquistoc xitlahuac.

63 Na niquinita quen nohuampoyohua nochi catli mitzimacasij huan mitztlepanitaj,

huan nochi catli quichihuaj catli quiijtohuaj motlanahuatilhua.

64 ¡TOTECO, nochi tlaltipactli temitoc ica motlaicnelijcayo!

Technextili nochi catli techyolmelajtoc ma nijchihua ipan nonemilis.

65 ¡TOTECO, tlahuel techchihuilijtoc catli cuali na, nimotequipanojca!

Techtiochijtoc senquistoc quen tiquijtojtoc para tijchihuas.

66 NoTeco, techchihua ma nijmachili catli cuali huan techmaca tlalnamiquilistli,

pampa na niquinneltocatoc motlanahuatilhua.

67 Achtihuiya quema ayamo techechcapantlalijtoya para techtlatzacuiltis,

san nimocuapolojtinenqui.

Pero ama senquistoc nijchihua catli quiijtohua mocamanal.

68 Ta nelía ticuali huan tijchihua san catli cuali.

Huajca techmachti quenicatza ma nijchihua catli techyolmelajtoc para nijchihuas.

69 Nopa masehualme catli mohueyimatij nechistlacahuijtoque,

pero na ica nochi noyolo nijchijtinemis catli quiijtohuaj motlanahuatilhua.

70 Inijuanti huihuitique huan tzactoc inintlalnamiquilis,

pero na nochipa nimopaquilismaca ipan moley.

71 Nelía cuali para techechcapantlali,

pampa technextili para ma nijchihua nochi catli techyolmelajtoc ma tijchihuaca ipan tonemilis.

72 Para na más ipati moleyes huan amo millones tlen oro huan plata.

73 TOTECO, ta ica momax tijsencajqui notlacayo.

Huajca ama techpalehui ma niquinmachili motlanahuatilhua huan niquintzontecomatis.

74 Nochi catli mitztlepanitaj huan motemachíaj ipan ta,

paquise quema nechitase,

pampa na nimotemachía ipan mocamanal.

75 TOTECO, na nijmati para motlamachtil senquistoc xitlahuac.

Huan nopa tlatzacuiltili catli techmacatoc nojquiya xitlahuac,

huan nechhualiquilis tlamantli catli cuali.

76 Huajca ama techyoltlali ica moteicnelijcayo,

senquistoc quen techilhuijtoc na, nimotequipanojca, para tijchihuas.

77 Techyahualo ica motlaicnelijcayo para ma niyolto,

pampa san ipan moley nijpantía paquilistli.

78 Ma huetzica ipan pinahualistli nopa masehualme catli mohueyimatij,

pampa tlahuel nechcocojtoque ica iniistlacaticayo.

Pero na san nimonejnehuilijtinemis catli quiijtohuaj motlanahuatilhua.

79 Ma sempa mosentilica nohuaya nopa masehualme catli mitzimacasij huan mitztlepanitaj,

huan catli quiiximatij motlajtol.

80 Xijchihua para noyolo ma monejnemilti xitlahuac ipan nochi catli techyolmelajtoc.

Huan quej nopa amo quema nimopinahualtis.

81 Na nitlapolosnequi pampa nijchiya para techmaquixtis tlen nocualancaitacahua,

pampa nimotemachijtoc ipan catli tiquijtojtoc para techchihuilis.

82 Noixteyolhua siyahuij pampa quinequij quiitase ma pano nochi catli techtlajtolcahuilijtoc para tijchihuas.

¿Hasta quema techyoltlalis ica motlapalehuil?

83 Ya nihuehuentzi huan nitzocoyolijtoc quen se cuetlax bolsa catli quitlalijtoque campa poctli,

pero amo niquelcajtoc catli techyolmelajtoc.

84 ¿Quesqui tonali monequi nijchiyas para tiquintlatzacuiltis catli nechtoquilijtinemij?

85 Nopa masehualme catli mohueyimatij huan catli quicualancaitaj moleyes quichijtoque se hueyi ostotl para ma nimasi.

86 Techpalehui, pampa motlanahuatilhua senquistoc xitlahuac,

huan nechtepotztocatinemij masque amo tleno nijchijtoc.

87 San quentzi nechixpolihuiltíaj,

pero na amo niquinixpanotoc motlanahuatilhua niyon amo niquincajtoc.

88 Pampa hueyi moyolo, techcahuili ma niitzto.

Huan quej nopa nijsenhuiquilis nijchihuas catli quiijtohua motlajtol.

89 TOTECO, mocamanal eltos temachtli para nochipa nepa ilhuicac.

90 Mojmostla ta titemachtli huan tiitztos temachtli ica nochi catli tlacajtiyase para nochipa.

Cuali ta tijtlatzquilti ni tlali huan quej nopa eltoc.

91 Nochi tlamantli mocahua campa tiquinnahuati ma eltoca hasta ama ni tonal.

Quena, nochi tlamantli catli tijchijqui mitzneltocaj huan mitztequipanohuaj.

92 Sintla amo nimopaquilismacatosquía ipan moley,

huajca ya nimictosquía ica tequipacholi.

93 Amo quema niquinelcahuas motlanahuatilhua,

pampa ica motlanahuatilhua techmacatoc yancuic chicahualistli.

94 Na nimoaxca, techmaquixti pampa nochipa nijchijtinentoc catli quiijtohuaj motlanahuatilhua.

95 Masque nopa tlaixpanoca tlacame motlatise ipan ojtli para nechtzontlamiltise,

na san nimonejnehuilijtos tlen motlajtol.

96 Nochi tlamantli catli más cuajcualtzi niquitztoc canque ontlami,

pero motlanahuatilhua, amo quipiyaj inintlamiya.

97 ¡Tlahuel niquicnelía moley!

San tlen ya nimonejnehuilijtinemi semilhuitl.

98 Motlanahuatilhua nechchijtoque más nitlalnamiqui que nocualancaitacahua.

Pampa motlanahuatilhua nechyacantiyohuij mojmostla.

99 Quena, achi más nitlalnamiqui hasta niquintlani inijuanti catli notlamachtijcahua,

pampa na nimonejnehuilijtinemi tlen motlajtol.

100 Na más nijmachilía que nopa huehue tlacame,

pampa nijchihua catli quiijtohuaj motlanahuatilhua.

101 Amo quema nijnectoc nijtoquilis se ojtli catli amo cuali,

pampa senquistoc nijnequi nijchihuas catli quiijtohua mocamanal.

102 Amo nimohuejcatlalijtoc tlen motlamachtil,

pampa ta technextilía quenicatza ma nimonejnemilti.

103 Nijmati nelía ajhuiyac mocamanal.

Achi más tzopelic nijmati que sayolnectli.

104 Motlanahuatilhua nechmacaj tlalnamiquilistli.

Yeca amo nijnequi niquitas niyon se tlamantli istlacatili.

105 Mocamanal eltoc quen se tlahuili catli quitlahuilía noojhui campa ninejnemi para amo nimotepotlamis.

106 Se huelta nitlatestigojquetzqui,

huan ama sempa nitlatestigojquetzas para nijchihuas catli quiijtohuaj motlamachtilhua pampa nelía xitlahuac.

107 TOTECO, nechcatitoc para nimiquis ininmaco nocualancaitacahua.

Techmaca yancuic chicahualistli quen tiquijtojtoc para tijchihuas.

108 TOTECO, nimitztlajtlanía xijseli nopa tlascamatili catli nimitzmaca quen se tlacajcahualistli.

Huan technextili motlamachtil.

109 Mojmostla nimopantía campa mahuilili para nonemilis,

pero amo niquelcajtoc moley.

110 Nopa tlaixpanoca masehualme quitlalíaj tlaquetztli para ma nimasi huan nihuetzis ipan tlajtlacoli,

pero na amo nimoiyocanequis tlen motlanahuatil.

111 Na san nimoaxcatijtoc motlajtol,

pampa san ipan motlajtol nijpantía paquilistli.

112 Ica nochi noyolo nijchihuas catli quiijtohuaj motlanahuatilhua nochipa hasta nimiquis.

113 Amo nijnequi niquinitas masehualme catli quichihuaj ome iniixayac.

Pero na niquicnelía moley.

114 Ipan ta nimotlatía para amo nechcocose nocualancaitacahua huan ipan ta nimomanahuía.

Pampa nimotemachía san ipan mocamanal.

115 Ma nechtlalcahuica nopa masehualme catli fiero inintlalnamiquilis.

Ma amo nechcuatotonica pampa na nijnequi nijchihuas catli quiijtohuaj motlanahuatilhua, Toteco Dios.

116 Huajca noTeco, techmaca yancuic fuerza senquistoc quen techtlajtolcahuili.

Huan quej nopa sequinoc amo quema huelis quiijtose para san tlapic nijpixqui nechiyalistli ipan ta.

117 Techfuerzajmaca para nimomaquixtis ininmaco nocualancaitacahua,

huan nochipa nijpiyas paquilistli para nijchihuas catli techyolmelajtoc.

118 Ta tiquinhuejcamajcajtoc nochi catli quitlahuelcahuaj catli techyolmelajtoc.

Inijuanti quiijtohuaj tlalnamiquij, pero amo neli, san mocajcayahuaj.

119 Nochi masehualme catli quinpactía tlajtlacolchihuaj ipan ni tlaltipactli tiquinita quen itetejtzo tepostli catli mocahua quema tijmolonía para tijtlapajpacchihuas.

Pero na niquicnelía huan nijtlepanita motlajtol.

120 Nochi notlacayo huihuipica pampa mitzimacasi huan mitztlepanita, Toteco.

Huan nojquiya niquimacasi motlatzacuiltil,

huan yeca amo nijnequi nimitzixpanos.

121 Na nijchijtoc catli xitlahuac huan catli melahuac moixpa.

Amo techtlahuelcahua ininmaco nocualancaitacahua,

122 Xitlatestigojquetza para techtiochihuas na, nimotequipanojca.

Amo xiquincahuili ma nechtlaijiyohuiltica nopa masehualme catli mohueyimatij.

123 Campa hueli nitlachixtoc pampa nijchixtoc techmaquixtiqui tlen nocualancaitacahua,

hasta siyajtoque noixteyolhua.

Nijchixtoc techmanahui senquistoc quen tiquijtojtoc para tijchihuas.

124 TOTECO, ipan motlaicnelijcayo techchihuili catli cuali na, nimotequipanojca.

Technextili quenicatza nijchihuas catli techyolmelajtoc ma tijchihuaca.

125 Na nimotequipanojca, techmaca tlalnamiquilistli,

para niquiximatis motlajtol.

126 TOTECO, ya ajsic hora para timonextis huan tijchihuas catli tiquita para cuali.

Pampa ni tlaixpanoca masehualme ayacmo quitlepanitaj moley.

127 Pero na más niquinicnelía motlanahuatilhua huan amo quen oro catli senquistoc cuali.

128 Pampa nochi motlanahuatilhua nelía xitlahuac.

Yeca amo nijnequi niquitas niyon se tlamantli istlacatili.

129 Motlajtol nelía yejyectzi, TOTECO,

yeca nijtoquilijtinemi ica nochi noalma.

130 Quema quiixtomaj mocamanal,

techtlahuilía huan techtlalnamictía nochi timasehualme,

hasta nojquiya masehualme catli san quentzi quimachilíaj.

131 Yeca tlahuel nijnequi niquiximatis más catli quiijtohuaj motlanahuatilhua,

huan ya nopa nijtemohua.

132 Techtlachili huan techtlasojtla,

quen timomajtoc tiquinchihuilía catli mitzicnelíaj.

133 Techyacana ipan se cuali ojtli ica mocamanal para amo nechtlanis niyon se tlaixpanoli.

134 Techmanahui tlen nopa tlacame catli mosisiníaj huan quinequij nechtlaijiyohuiltise.

Huan quej nopa nijchihuas catli quiijtohuaj motlanahuatilhua.

135 Ma monexti moteicnelijcayo ipan moixayac quema techtlachilía na, nimotequipanojca,

huan techmachti nochi catli techyolmelajtoc para ma tijchihuaca.

136 Tlahuel nichoca pampa miyac masehualme amo quitlepanitaj moley.

137 TOTECO, ta nelía tixitlahuac huan nochi tlatzacuiltili catli titemaca nojquiya xitlahuac.

138 Nochi motlajtol xitlahuac huan temachtli para ipan ma timotemachica.

139 Nelía nimotequipachohua huan nicualani,

pampa nocualancaitacahua amo quitlepanitztoque catli ta tiquijtojtoc.

140 Nochi moley nijyejyecojtoc huan niquitztoc para nelía tlatzejtzeloltic.

Yeca niquicnelía.

141 Nelía niteicneltzi huan miyac amo quinequij nechitase,

pero na amo niquinelcajtoc motlanahuatilhua.

142 Ta tijchihua catli xitlahuac para nochipa huan moley senquistoc melahuac.

143 Ipan na huetztoc tequipacholi huan tlaijiyohuilistli,

pero motlanahuatilhua san ya nopa nechyolchicahuaj.

144 Motlajtol nochipa xitlahuac.

Techmaca tlalnamiquilistli para nijmachilis huan quej nopa huelis niitztos.

145 Ica nochi noyolo nimitztzajtzilía.

Technanquili noTeco, huan nijchihuas catli techyolmelajtoc.

146 Na nimitztzajtzilía huan nimitzilhuía:

“Techmaquixti tlen nocualancaitacahua”,

huan nijchihuas catli quiijtohua motlajtol.

147 Nimehua ica ijnaloc quema ayamo quisa tonati,

huan nimitztzajtzilía, TOTECO, pampa san ipan mocamanal nimotemachía.

148 Ica tlayohua amo nicochi pampa san nimonejnehuilía tlen nochi catli tiquijtojtoc techchihuilis.

149 Techtlacaquili pampa titetlasojtla, TOTECO.

Techmaca yancuic chicahualistli quen quiijtohua motlamachtil para tijchihuas.

150 Nechca hualahuij nopa tlacame catli mosisiníaj huan nechtepotztocatinemij.

Inijuanti mohuejcatlalijtoque tlen moley.

151 Pero ta tinoTeco tiitztoc nonechca.

Nochi motlanahuatilhua senquistoc melahuac.

152 Hasta quema niitztoya nitziquitetzi niquiximatqui motlajtol,

huan nijmatqui para motlajtol amo quema mopatlas para nochipa.

153 Xijtlachili notlaijiyohuilis huan techmanahui,

pampa amo niquelcajtoc moley.

154 Quena, techtenpalehui huan techmanahui quen techtlajtolcahuilijtoc para tijchihuas.

155 Amo tiquinmaquixtis nopa masehualme catli amo mitztlepanitaj.

pampa inijuanti amo quichihuilíaj cuenta catli techyolmelajtoc.

156 TOTECO, ta tlahuel techtlasojtla.

Techmaca yancuic chicahualistli quen quiijtohua motlamachtil para tijchihuas.

157 Miyac nocualancaitacahua nechtepotztocatinemij huan quichihuaj campica para ma nimitzixpano,

pero na amo nijcajtoc motlajtol.

158 Na niquincualancaita nopa tlacajcayahuani,

pampa inijuanti amo quichihuaj catli quiijtohua mocamanal.

159 Xiquita TOTECO, na tlahuel niquinicnelía motlanahuatilhua.

Techmaca yancuic chicahualistli pampa ta nelía ticuali,

huan hueyi moyolo.

160 Nochi mocamanal senquistoc melahuac.

Quena, nochi motlamachtil senquistoc xitlahuac huan huejcahuas para nochipa.

161 Tlacame catli quipiyaj tequiticayotl nemij notepotzco para nechcocose masque amo tleno niquinchihuilijtoc,

pero ipan noyolo san niquimacasi para niquixpanos mocamanal.

162 Na nimopaquilismaca ipan mocamanal quen se catli paqui miyac quema quipantijtoc catli tlahuel patiyo.

163 Nijcualancaita nochi tlamantli istlacatili,

pero niquicnelía miyac moley.

164 Nimitzhueyimati chicome huelta ipan se tonal,

huan nimitztlascamati pampa xitlahuac motlamachtil.

165 Nochi catli quiicnelíaj moley quipiyaj miyac tlasehuilistli ipan ininyolo,

huan amo huetzise ipan tlajtlacoli.

166 TOTECO, tlahuel nimochixtoc para techmaquixtis

huan yeca niquintlepanita motlanahuatilhua.

167 Na nijneltoca motlajtol huan niquicnelía ica nochi noyolo.

168 Na nijchihua catli quiijtohuaj motlanahuatilhua huan motlajtol,

pampa ta tiquiximati nochi catli nijchihua.

169 TOTECO, xijtlacaquili catli nimitztlajtlanía,

techmaca tlalnamiquilistli senquistoc quen tiquijtojtoc para tijchihuas.

170 Xijtlacaquili catli nimitztlajtlanía quema nimotlatlajtía,

huan techmanahui quen tiquijtojtoc techchihuilis.

171 Na nimitzpaquilismacas,

pampa ta technextilijtoc quenicatza nijchihuas nochi catli techyolmelajtoc ma tijchihuaca.

172 Nitepohuilis nochi catli tiquijtojtoc,

pampa nochi motlanahuatilhua senquistoc xitlahuac.

173 Ximocualtlali para techmanahuis,

pampa na nijtlapejpenijtoc nijchihuas catli quiijtohuaj motlanahuatilhua.

174 TOTECO, nijnequi techmaquixtiqui,

pampa na san nimopaquilismaca ica moley.

175 Techcahuili ma noja niitztos para nimitzhueyimatis.

Xijcahuili para motlamachtil ma nechpalehui.

176 Na nimocuapolojtoc quen se pilborregojtzi,

yeca xihuala para techtemoqui,

pampa na amo niquelcajtoc para niquintlepanitas motlanahuatilhua.