1 Na nijhueyimatis TOTECO ica nochi noyolo.

2 Nochi tonali ipan nonemilis nijpaquilismacas TOTECO.

Nihuicas tiohuicatl para noTeco Dios hasta nimiquis.

3 Amo ximotemachica ipan huejhueyi tlacame catli quipiyaj tequiticayotl,

niyon ipan se tlen hueli tlacatl pampa niyon se masehuali amo huelis mitzmaquixtis.

4 Pampa se tonal miquise nochi masehualme huan mocuepase tlali.

Quena, tlamis iniijiyo huan ininnemilis,

huan ica se tlatoctzi tlamis nochi catli moilhuijtoyaj quichihuase.

5 Pero nelía paqui nopa masehuali catli quipixtoc quen itlapalehuijca yaya catli iTeco Jacob,

huan san ipan TOTECO iDios motemachía para quimocuitlahuis.

6 Yaya catli quichijchijqui ilhuicactli,

tlaltipactli, hueyi atl huan nochi catli itztoque nopona.

Yaya catli quichihua nochi catli quitlajtolcajtoc para quichihuas.

7 TOTECO quinchihuilía catli xitlahuac nochi teicneltzitzi catli sequinoc quintlaijiyohuiltíaj.

Huan quintlamaca catli mayanaj.

Quinchihua ma yaca majcajtoque catli tzactoque masque amo tleno quichijtoque.

8 TOTECO quintlachiyaltía popoyotzitzi.

Quintlanana catli nechca itztoque para huetzise.

Huan quinicnelía catli monejnemiltíaj xitlahuac iixpa.

9 TOTECO quinmocuitlahuía nopa seyoc tlali ehuani.

Yaya quinmocuitlahuía catli icnotzitzi huan catli cahual toahuihua.

Pero yaya quisosolohua catli quisencahuaj masehualme catli amo quitlepanitaj.

10 TOTECO tlanahuatis para nochipa.

Amojuanti ipan altepetl Jerusalén,

amoTeco Dios elis nopa Tlanahuatijquetl,

catli quinnahuatis nochi masehualme catli tlacajtiyase para nochipa.

¡Paquilistli!