23
Balaam camati tlajtoli tlen Toteco
1 Huajca Balaam quiilhui Tlanahuatijquetl Balac:
―Xinechchihuili nica chicome tlaixpamitl, huan xinechcualtlalili chicome becerros huan chicome borregojme.
2 Huan Tlanahuatijquetl Balac quichijqui senquistoc queja Balaam quinahuatijtoya. Huan san sejco ipan sesen tlaixpamitl quitencahuilijque se becerro huan se borrego.
3 Huan teipa nopa tlachixquetl Balaam quiilhui Balac:
―Ximocahua nica ica motlacajcahualis tlatlatili huan na niyas nepa niquitas intla TOTECO nechnamiquiqui. Teipa nimitzilhuis tlen ya nechilhuis para ma nimitzilhui.
Balaam quintiochijqui nopa israelitame
Huajca Balaam yajqui ipan se piltepetzi tlen ax tleno quipiya, 4 huan Toteco hualajqui quinamiquico huan quiilhui:
―Na nijcualtlalijtoc chicome tlaixpamitl huan ipan sesen tlaixpamitl nimitztencahuilijtoc se becerro huan se borrego.
5 Huajca TOTECO quimacac Balaam nopa tlajtoli tlen quinequiyaya ma quiijto, huan quiilhui:
―Ximocuepa campa itztoc Tlanahuatijquetl Balac huan xiquijto nochi senquistoc queja nimitzilhuijtoc.
6 Huan Balaam mocuepqui huan quipantico Tlanahuatijquetl Balac ijcatoc nechca nopa tlacajcahualistli tlen quitlatijtoya. Huan ihuaya itztoyaj nochi nopa tlayacanani tlen nopa tlali Moab. 7 Huajca Balaam quiijto ni tlajtoli:
“Nechchijtoc ma nihuala nica nopa hueyi Tlanahuatijquetl Balac ipan ni tlali Moab.
Huan nihualajtoc tlen nopa tepetini ipan tlali Aram ica campa quisa tonati.
‘Xihuala’, yajaya nechilhui, ‘xiquintelchihuaqui ni israelitame.
Xijcahua mocualancayo ma tlejco ica inijuanti para ma ininpanti tlen fiero.’
8 Pero ax hueli niquintelchihuas intla Toteco ax quintelchijtoc.
Ax hueli niquincualanis tlen TOTECO ax ininca cualani.
9 Niquinita tlen nica itzonpac ni hueyi tepetl.
Nojquiya niquintlachilía tlen piltepetzitzi.
Niquinita para moiyocatlalijtoque tlen sequinoc.
Inijuanti seyoc tlamantli tlacame.
Ax queja sequinoc tlaltepac ehuani.
10 Tlahuel miyac inijuanti hasta itztoque queja tlaltejpoctli.
Axaca hueli quinpohua.
Niyon se ax hueli quimatis quesqui itztoque.
Nipaquisquía intla nimiquisquía xitlahuac iixpa TOTECO queja inijuanti.
Ma nimiquis ica nopa tlatiochihualistli tlen se israelita quipiya.”
11 Huajca nopa Tlanahuatijquetl Balac quiilhui Balaam:
―¿Tlaque tijchijtoc? Na nimitzhualicac para xiquintelchihua nocualancaitacahua, huan ta tiquintiochijtoc.
Sampa Balaam camati tlajtoli tlen TOTECO
12 Huan Balaam quinanquili:
―Monequi san niquijtos tlen TOTECO nechilhuis.
13 Huajca Tlanahuatijquetl Balac quiilhui Balaam:
―Xihuala nohuaya huan ma tiyaca seyoc lugar. Huan tlen nopona hueli tiquitas san se achi tlen nochi nopa miyac israelitame. Tlen nopona huelis tiquintelchihuas san se achi tlen inijuanti.
14 Huajca Tlanahuatijquetl Balac quihuicac Balaam ipan se mili campa itoca Zofim ipan itzonpac nopa tepetl Pisga, huan nopona quichijqui chicome tlaixpamitl huan quitencajqui se becerro huan se borrego ipan sesen tlaixpamitl. 15 Huajca nopona Balaam quiilhui Tlanahuatijquetl Balac:
―Ximocahua nica nechca motlacajcahualis tlatlatili huan na niquitati Toteco Dios nopona.
16 Huan TOTECO quinamiquico Balaam huan quimacac nopa tlajtoli tlen quinequiyaya ma quiijto. Huan nojquiya quiilhui:
―Ximocuepa campa itztoc Tlanahuatijquetl Balac huan xiquilhui tlen na nimitzilhuijtoc.
17 Huan Balaam mocuepqui huan quiitac Balac ijcatoc nechca nopa tlacajcahualistli tlatlatili, huan ihuaya itztoyaj nopa tlayacanani tlen tlali Moab. Huan Tlanahuatijquetl Balac quitlajtlani:
―¿Tlaque mitzilhuijtoc DIOS?
18 Huajca Balaam sampa pejqui camati huan quiijto ni tlajtoli:
“¡Tlanahuatijquetl Balac, ta tlen tiicone Zipor,
cuali xinechtlacaquili!
19 Toteco ax itztoc queja titlacame.
Yajaya ax istlacati.
Niyon ax moyolpatla queja se tlacatl.
Tlen yajaya quiijtohua para oncas, ya nopa oncas.
Tlen yajaya quitencahua, ya nopa quichihua.
20 Nechnahuatijtoc ma niquintiochihua ni tlacame.
Huan pampa yajaya ya quintiochijtoc,
ax hueli na niquijtos para axtle.
21 TOTECO ax quipantía tlajtlacoli ipan ni israelitame.
Inijuanti tlen iteipa ixhuihua Jacob.
Ax hualas cuesoli ipan inijuanti pampa TOTECO tlen inintata quihueyichijqui huan yajaya itztoc ininhuaya.
Yeca inijuanti tzajtzij ica paquilistli,
pampa tlahuel hueyi inintlanahuatijca tlen ininhuaya yohui.
22 Queja se hueyi toro quipiya icuacua,
ni tlacame quipiyaj TOTECO queja ininchicahualis, yajaya tlen quinquixti ipan tlali Egipto.
23 Axaca hueli quintelchihuas ni iteipa ixhuihua Jacob.
Ni israelitame ax tleno huelis quinchihuilis se tetlajchihuijquetl.
Nochi quiijtohuaj:
‘Huejhueyi tlamantli Toteco Dios quinchihuilijtoc.’
24 Ni tlacame motlalanaj huan temajmatíaj
queja se tecuani tlen ax mosiyajcahua
hasta quicuas tlen moitzquilijtoc,
huan quiis ieso tlen momictilijtoc.”
25 Huajca Tlanahuatijquetl Balac quiilhui Balaam:
―Yonque ax hueli tiquintelchihuas, amo xiquintiochihua.
26 Pero Balaam quinanquili:
―¿Ax nimitzilhui na san hueli niquijtos tlen TOTECO nechilhui?
27 Huajca Tlanahuatijquetl Balac quiilhui:
―Xinechchihuili se favor, xihuala nohuaya huan nimitzhuicas seyoc lugar. Huelis tlen nopona Toteco mitzcahuilis xiquintelchihua.
28 Huan Balac quihuicac Balaam hasta itzonpac nopa hueyi tepetl Peor campa nesiyaya nochi nopa huactoc tlali tlen mocajqui tlatzintla. 29 Huan nopona Balaam quiilhui Tlanahuatijquetl Balac:
―Xinechchihuili nica chicome tlaixpamitl, huan xiquinsencahua chicome becerros huan chicome borregojme.
30 Huajca Tlanahuatijquetl Balac quichijqui nochi senquistoc queja quinahuati Balaam. Huan ipan sesen nopa tlaixpamitl quitencajqui se becerro huan se borrego.