1 Iyamulan Ngindrai ihinonou lohonga Aparaham pe tahihilong tan. Pwen Ngindrai iyoh yiy.

Pe Aparaham isomwiy ipa, “Tesah? Yo iye.”

2 Pe Ngindrai ipa, “Wou awiri norum hamou o, Yisak, mepo ndriyam imbulihi yiy pwokeyan iya pe walu kaya kol Moriyah. Ngondron sih kintoraliy andre kupwainganiy satam, pe aya timwi norum kiyaliy tehe yukyuk.”

3 Pwen makohuping sih Aparaham itine. Yiy imwaniyani tongki tan pe iwiri ndramira mbulyan malmou iyasura yiy pe norun Yisak. Pwen isaya kihiy para timwi yukyuk, pe huyau huyerokai, huya kol nepo Ngindrai kinpwai kinna tan. 4 Hu yerokai, yerokai, ipo iro lang maroyoh ihipwen Aparaham maran itandras pe inime kol ara iya mwanan hape. 5 Aparaham ipwai iyata hilu ndramat malmou para mbulyan ipa, “Walu koro iye kiyasura tongki. Yo pe mbunah kamai iye andre yolu kaya totohun kaya yoro. Kihipwen, andre yolu kamui kasa kili walu.”

6 Pe Aparaham iyki kihiy iya pwese Yisak pe irosap para katimwi yukyuk. Aparaham ara irokun semen pe mwan, pwen hilu malmou kene hilyau.

7 Yisak ipa, “Tomo.”

Pe Aparaham isomwiy ipa, “Tesah, noru?”

Pe norun ipa, “Talu kun kihiy pe talu sap mwan iripo, hapeko noru sipsip para yukyuk aleheh?”

8 Aparaham isomwiy ipa, “Ngindrai mbukenan o andre kiyuk noru sipsip hamou para katimwiy tehe yukyuk.” Pwen pe hiltorokai ndron hilya.

9 Pwen hiltorokai pe hilyarayah iya kol nepo Ngindrai kinpwai pwen kinnata Aparaham ara, pe Aparaham isoye keyeu iro ariya pe ipwalani kihiy iya ndritan. Pwen iwasi tiriyi norun kamai Yisak pe iyki yiy iya keyeu ndrita kihiy. 10 Pe Aparaham ihiri semen iya iho hin pe pakitingundru Yisak. 11 Indrou pwi pe angelou ta Yapan iho paingan yang pe iyoh yiy ipa, “Aparaham! Aparaham!”

Pe yiy isomwiy ipa, “Tesah! Yo iye.”

12 Pe angelou ipa, “Aiki semen kiya pwan. Mbunarayi mbunah ara, pe mbunambusi hapesah kiya kili yiy. Mahapo upahasaniy tehe wou ara ndramat para tahilingiya nongna Ngindrai ndrokonan. Pe norum mepo ndriyam imbulihi yiy imwonen, ara apaiki yiy kisa kili yo.”

13 Aparaham maran pakiya yangiy pwi, inime noru sipsip hamou kamai mandrosuwan ipet iho ndrakei hakou mendreheh. Pwen iya wiriy isa pe itingundrun pe iykiy iya keyeu pe itimwiy iya soiwi norun tehe yukyuk para totohun. 14 Aparaham ipohowe ngala kol ara, “Yapan andre kiykiy.” Iro matinen ara isa mannen mahapo, hu ndramat ngara hu kapa, “Yapan andre kiykiy kiya ngondron atan.”

15 Pwen angelou ta Yapan iho yang pe iyoh iya kili Aparaham porosihi ipa, 16 “Yapan ipa, ‘Yo upwai ndrokonan iya ngolo toro: wou nerem kinna ta norum pwi pe apaiki yiy masih kisa kili yo, 17 pwen pe andre kumbusi ndrayem hu kasarayah soyo-soyon iya. Yihu andre karayah tehe kalayeng ita leng pe hu piriy hora yang. Pe ndrayem hu andre hu kapo pahun kiya kili hu ndram pe andre hu kawiri topwe kolohu ndram namandran kiya kolohu. 18 Pe yihu ndramat masih para kol pwan andre kutoholi hu kiyau kili ndrayem hu, paratesah, wou ahalingi yo.’ ”

19 Pwen Aparaham hilu hilmui hilya kili ndramat malmou para poya mbulyan. Pe humui huya kol Peersepa pe Aparaham iyen aliy.

20 Iyamulan hape, Aparaham ihilong tehe Milkah, nambuyu nalin Nahor, ara ikuni norun hu tiken kamai. 21 Pe ndrihou tahu ara ngalan Us, mundruwa ndrihou ara ngalan Pus, pe isa parahara ndrihou ara ngalan Kemuwel (nepo tama Aram). 22 Pe hu sarayah mulan ara ngalahu iye: Keset, Haso, Piltas, Yitlap pe Petuwel. 23 Petuwel ara isarayah tama Repekah. Aparaham nalin ara Nahor, iwiri Milkah pe iyki norun kamai mandrolmou ara. 24 Pe yihu husa suran ara noru Nahor nondriya Reumah, pihin para mbulyan. Pe ngalahu ara iye kene: Tepah, Kaham, Tahas pe Maakah.