1 TESARONIENS
1 Tesaronienson Vuak Amur
Tavan iji For fu mai Korint ijia finma ijia fu fas fuon amur igi isoime e ma vierafejo ar Tesaronaika karinva iji nijiain. Revo Tesaronaika iji fu mai bomana be ai Mesedonia guf ijia revo mai iji fu saof irif ijia. Tavan iji For fu ai Gris ijia vuak ma iji abe kuardiak vainma ijia fu e Tesaronaikako iji vuak ma iji abe kuardiain. Fu kuardiamga e Jius roin bu Jesu ma vierafejga e Jiusbuon e mamkanuk iji buka deajidiain ijefuon bu uri For ga kaifijaf rotkuriava bu vain. Regavo rad For fu una Timoti kuama fu e iji iviakma ma vierafejo ai Tesaronaika ijia karijo iji bu izegrejo iji giakafa vain. Timoti fu vainma una kekome vuak ma iji bu izegrejo iji For kuardain. Ijefuon For fu fas igi isoime e Tesaronaikako iji bu unam ise kafokafo buon roko iji biedian revo buka giriesa daro mene ma vierafenva ijefuon For fu fas igi isoime buon oimaren. Regavo fu madu Jesu Kurais fu una roko ijefuon vuak iji una uruvana nijaidiain.
1 Tesaroniens ijia vuak kafokafo For fu isoinma ijin
1:1 For fu anadiainma ijin.
1:2–3:13 For fu buon bu ma vierafejo ijefuon Godon oimarenma ijin.
4:1-12 E ma vierafejo ijiebuon unam ma iji bu kekfuon ijin.
4:13–5:11 Jesu fu madu una rokon ijefuon vuak ijin.
5:12-28 Foron vuak radkma iji fu nijaidiainma ijiga fu anadiainma ijin.
1
1 For nar Sairas ko Timotina fas igi isoime e iji ja ai Tesaronaika ijia afuime Jesu ma vierafejo iji nijiav. E iji ja God Asoij ijiga E Bomana Jesu Kuraison efijaf. Regavo no vierafe God fu tavan bog ma rediame mukorigia samuagdiaga ja afuime kariokfuon.
For fu izeg e Tesaronaikako bu God ma vierafejo ijefuon Godon oimarenma ijin
2 Ijefuon tavan bog no sirimamejo no ja vierafene joifuon Godon oimarev. 3 No God Asoinuvuon iji no sirimamejo noka ja vierafej. Ijefuon maiji ja Jesu Kurais ma vierafejo ijefuon jaka ik jon mukorigia rej revo madu izeg ja jon oijmanamivo ijefuon jaka vajai fian abeknum ifenamiv. Regavo madu izeg E Bomana Jesu Kurais fu una ruakfuon ja vierafejo iji jaka arevo bakin revo jaka giriesame ma vierafeknum kegoij. 4 Regavo efnun God fuka ja bomana oijmiainma ijefuon fun usuibe ja kege uniainmado ja una efuon rek. 5 Ijefuon Godon vuak ma iji no abe kuardiainva iji nom nor abe kuardiainva bakin revo fun Godon Kaven Akai ijar vuak iji abe darokma kuardiamga ja faime ma vierafen. Regavo jan vierafe izeg no jana ijia karioknum irerag no reoinva iji no jon ma ijefuon ijeg ren. 6 Regavo izeg no E Bomana ijiena no kegoinva iji jan makai nuvuon ijia jajuov. Jaka vajai fian abeknum jajuo ruain revo fun Godon Kaven Akai ijar ifejdiamga ja vuak iji faime jaka oimaren. 7 Ijefuon jar e Mesedoniako bu jana moik ijia karinva ijiga e Akaiako bu nana moik be igia karinva ijin eraneb bu God ma vierafejo iji unam ma iji kege nijaidiain.
8 Regavo E Bomana ijefuon vuak iji ja abe kuaimoinva iji fu ai Mesedonia ko Akaia ijesugin vainma bakin gavo fuka moik roinroin ijia vain. Ijefuon e fok bu jon izeg ja God ma vierafejo iji bun faim barenva ijefuon no irerafuon una vuak kafo kuardiakva bakin. 9 E fok vuak jon bun faim barenva ijefuon bu izeg no jon vuakga ja oijmuome afeduinva iji bur kuarduin. Regavo madu bur izeg ja god kafokafo kufui iji aregavo una God ma iji tavan bog ijia fivako ijefuon ja anerene ik rejo iji bur kuarduin. 10 Regavo madu ja Godon Farif Jesu fu guamga God fu keunama fu una urinma iji fu una kaf gufia ari ruakreno ja iji samuav. Regavo tavan rad fu una ruakma God fu e iji bu ise rejo iji fu ziegafiame ke arafiriak. Regavo noiji fun Jesur karaunuinma ijefuon fuba no kege e ijiena arafuruok.