1 Regavo fun Godon Kaven ijar fun samakaf vuak iji kuai, Tavan rad e roin bu Kuraison vuak ma iji nijaidiavo iji bu ijia arekfuon. Regavo bu kaven ise iji biesia vuak kufui nijaidiavo iji jajiame vakfuon. 2 Regavo kaven ise ijieb e iji biesiaga bu una e roin vuak kufui nijaidiak. Regavo vuak kufui bu nijaidiavo iji bu ise rejo iji buba vierafenva ijefuon buka ba juk. 3 Regavo e iji vuak kufuimene nijaidiavo ijieb nijaidiame kia, Bara savo ijigam duok kafokafo ijo iji fuka ba marenma jab ijeg rekno kiak. Regavo vuak iji fu ma bakin ijefuon maiji fun Godri ire fok fur amardiain. Ijefuon e iji eraneb bu God ma vierafe vo vuak fuon ma iji ma vierafejo iji bu duok iji oimarknum kege sirimamene ikfuon. 4-5 Ire fok God fu amardiainma iji bu mukordo ire besum jab uzak. Regavo duok fok nika kege Godon sirimamene oimarknum ikfuon. Ijefuon maiji Godon vuak ijiga Godon sirimamejo ijieb duok iji kege marev.

6 Regavo Timoti a vuak iji na kuardavo iji kege uviaifnuvuon iji nijaidiakma a ma Jesu Kuraison ikreno. Regavo Godon vuak iji a ma vierafene nijaidiamo ijieb a ifejdaga a on a ma vierafeno ijia a e damuigin rekfuon. 7 Regavo suar usuikor iji ka ma daro bakin iji ijia aref. Regavo tavan bog nika daro on ijekma Kaven Akai ijefuon unam ijia uruvana mimataoikin a daro abek. 8-9 Ijefuon maiji vajai nuvuon fu daro abekafa no mimatame ire kafo rejo iji fu ma. Regavo Kaven ijefuon ijia mimatavo ijar kaven nuvuon ifejdiaga no Godon unam ma ijesugin jak. Regavo ijar ifejduoga no iviakma ma kariknum vo rad no ma karivak. Regavo vuak iji fuka ma ijefuon aka mukorigia faime vo ma vierafe jame kekfuon. 10 Ijefuon tavan bog no giriesame vajai fian abeknum ikrej ijefuon maiji no tavan bog God ijia fivako iji ma vierafen ijefuon no ijeg rej. Regavo fun Godri aresredo fu e fok eraneb fu ma vierafejo iji karauniakfuon. 11 Ijefuon Timoti vuak iji na kuardavo iji abe e iji nijaidia vo soisoime ejafiaga bu vuak iji jakfuon.

12 Regavo ab arega e kafob a neseme e ukakbe ijeg gak revo mimatame ma rejo ijia kege nijaidiaga bu ma vierafene a oijmame agordak. Regavo unam iji a mimatame nijaidiakfuon iji nika vuak ma ijesugin kuardia vo unam mukorigia mimatame ke nijaidia. Revo madu e fok oijmia vo tavan bog God ma vierafekfuon. Regavo on a vierafeno iji fuka maturai vo arir vierafekfuon. 13 Regavo a vek na samuagdiemo ijia na vierafe a daro on fok ijekma Godon vuak iji sos guf e nifak ijia samakaf uruvana daknum vuak ijefuon ma iji e iji kuardiaknum nijaidiak. 14-15 Regavo amur aba anerene ik on rene vuak kuardiamo ijia e Godon vuak vierafene kuaimo be fu ik on a rekfuon iji fun kuardain. Regavo e mamkanuk roin bu imut nigen abedevga God fu ik on ijefuon daro main. Ijefuon daro iji God fu mainma iji ab rubdame nui girek revo ire iji nika mukor igia mimatame re. Regavo nika oion ijekma ikrega e fok bu ik on ma iji a mukorigia rene vako bu iji gak. 16 Regavo izeg a oino ijia ga vuak ma iji a nijaidiamon ijia mukorigia vierafeknum ire ijieb giriesa re vakne. Ijefuon maiji a ijegrekma e iji bu a fazdavo iji a ise buon ijia karauniaknum ga a koikon keunanamim.