JEIMS
Jeimson Vuak Amur
E iji fas igi isoinma iji Jeimsri isoin. Regavo e ma vierafejo uruvana bu vierafega Jeims e fas igi isoinma iji fu Jesuon diar ijar isoime e iji Kurais ma vierafejo iji nijiain. Regavo e iji ma vierafejo iji buka unam gigikin kafo biediavo ijefuon bu dab ataseme ar iror igia karioin. Fas igia Jeims fuka ire kafokafo ka ma uruvana ijiebuon kuain. Regavo vuak iji fu kuainma iji sinuom zaraivo ijigam e sinuom bakin ijigam kaven ise ijar biesuoga no ise rejo ijigam iti nuvuon samuagdiakfuon ijigam afikin kafo no biediakfuon ijigam sirimamejo ijefuon fu iji isoime kuain. Ire bomana be Jeims fu buk igia isoinma iji e roin bu kuai bu Jesu ma vierafejo kuaiv revo buba e fok mardiakva buon bu ma vierafejo iji fu ma bakin ijin isoin.
Jeimson vuak kafokafo fu isoinma ijin
1:1-8 No izeg oimarknum vajai fian abene darokma ma vierafekfuon ijin.
1:9-11 E sinuom zarainva ijiga e sinuom bakin ijiebuon vuak ijin.
1:12-18 Kaven e biesiamo ijefuon vuak ijin.
1:19-27 Noka Godon vuak iji faimvo God igakfuon ijin.
2:1-13 E fok noka ke unam besum ijia rediakfuon ijin.
2:14-26 Noka nuvuon ma vierafejo iji kege ire ma iji e kafobuon rega bu giakfuon ijin.
3:1-18 Noka iti nuvuon iji mukorigia samuagdiakfuon ijin.
4:1-5 Noka moik igefuon vierafe ijiga kaven ise Setanon vierafe iji asidiakfuon ijin.
1
1 Fas igi e Jeims nar isoime Godon e fok iji moikigia kekirame karioinva ijin nijiame anadiav. Regavo naiji na God ko E Bomana Jesu Kuraisbuon ik reoijo.
Ma vierafene rejo iji fu Godon rokon
2 Efnun erar ire ise kafokafo jafak rega ja vajai fian abekva iji nika oimarknum of. 3 Ijefuon maiji ire ise iji bu jon ruak revo jon ja ma vierafejo ijar ifejdiakma ja giriesame ok. 4 Jon ja ma vierafejo ijia jab zazaik. Ja ijegrenki ja uri e damuigin rene mukorigia maturaime keok. 5 Eraneb bu vajai fian abeknum uri nonamimoijo iji nika Godon sirimamene fu ifejdaga ja ma vierafene keok. Ijefuon maiji God fu e ziegafiamo bakin revo fu e fok oijmiaknum ifejdiamo. 6 Regavo ja God kuardakva nika oion ijekma ma vierafene kuardagavo jab uri fu kuardakuai nonk. Erar fu nonekma iji fu do iji fu firame munuag azan ijia siriamo ijeg rek. 7-8 E ijegreoinon iji fuba vierafero E Bomana ijar fu ifejdakro fub ijeg vierafeno. Ijefuon maiji e iji fu irerag fu reoinon iji fuba mukoi vierafeknum vo unam fuon fu reno iji fuka nonem. Ijefuon e iji fu ijegreoino iji fuba vierafero E Bomana ijar fu ijegreoino ijeg vierafen.
E sinuom bakin ijiga sinuom zarainma ijiebuon vuak ijin
9-11 God fu e iji erar sinuom ba zarainma iji ifejdame ire kafo vajaknum abe aroikma e iji funi oimarmne. Regavo God fu e iji sinuom zarainma ijefuon sinuom iji una kekma e iji nika oimarmne. Ijefuon maiji e iji sinuom zarainma iji fu sinar iji fu irasemevo rad fu tavan kaname sairmo ijekin. Fu tavan ivuankbe ijia sinuom iji kege na fivake ga fu guamo ijia sinuom fuon iji fun ijia areme vak.
Unam ise iji bu nuvuon roko iji no izegrekfuon ijin
12 Regavo erar fu ire afikin kafo bu fuon rok gavo fuba zazaimo e iji fu iviakma fuka oimarknum ok. Ijefuon maiji ire iji bum fu biesuain revo fu vek giriesame ma vierafeknum oin. Ijefuon rad God fu e ijekin iji bu fu mukoi oijmavo iji kiaga bu unam ma karivako iji fu abe miakafa kiainma iji abek. 13 Regavo ire ise kafob e be biesuakva e iji fuba uri kuai, Ise igi biesiemo iji fu Godri na biesiemno kuaik. 14-15 Ijefuon maiji ise iji bu e igi nor koiknuvuon vierafejo ijin. Regavo no ise iji uruvana igia vierafeoijo ijar oinuvuon iji kam karoiga no iji ise reoij. No ise iji reoijo ijefuon ise nuvuon ijieb kaven nuvuon iji buka mukor kaniaga bu aoiv.
16 Ijefuon efnun ire ise kafob ja biesiaga jab unam buon ijia jajia vak. 17 Regavo irerag fok God fu vajuomo iji fuka ma ijesugin. Regavo ire ma iji fok fuka e iji varur gufi sanainma iji amarenma ijar kege no vajuom. Fu tavan bog ijegreno revo fu no nuigafuome vako no nakinma ijia karioijo bakin. 18 God fu vierafenma ijia fun vuak fuon ma ijefuon duadok ijia no kege amarduoma non una afijaf ren. Ijefuon noiji ma afijaf amur ijin.
Godon vuak iji faime kegoijo ijin
19 Efnun vuak igi mukoi faif. E fok ja bu vuak kuaiga nika migegare vuak iji faif revo ja vuak iji jab una migegare roin kuardia vo jab migegare ziek. 20 Ijefuon maiji erar fu migegare ziemoino e iji fu unam ma iji God fu vierafe fu ijia fiokfuon iji fuba ijeg fiok. 21 Ijefuon ni koikjon mukoi samuanamiknum ire isekma kafokafo ja vierafene reoijo iji aref. Regavo nika oijon fok Godon vuak iji fu abe oijon ijia oinma iji mukoi vierafeknum of. Ja ijegrekva vuak iji oijon ijia tavuamo ijar rad ja karauniak.
22 Ja vuak fuon faimvo ba abe mimatame kegoijo iji jaka koikjo unam jon kam arafiriav. 23 Erar fu vuak fuon faimvo ba abe mimatame kegoino iji fuiji fu e iji fu koikfuon bivar ijia ganamimo ijekin. 24 Fu bivar ijia uikinik fuon ganamime vo rad fu bivar iji areme vakma uikinik fuon fuka migegare ruk. 25 Regavo erar fu vuak iji God fu e fok no karaunuokafa kuarduinma iji mukoi faime ba totegavo fu tavan bog oifuon ijia abedeme mimatame kegoino iji Godri rad daro mame ifejdaga fu unam ma ijia reokfuon.
26 Regavo e be fu vierafero fuiji fu tavan bog God ma vierafeoinon revo fu itit fuon ijia fuka vuak ise fok kuaimoino iji fuka God ma vierafeno bakin gavo fuka koikfuon arafirinamim. 27 Regavo God Asoi nuvuon fu vierafenma iji ijeg. E iji fu God ma vierafeno iji fuka am iji asieasoi bakin iji ga bara amun iji oifian abejo iji samuagdiak. Regavo madu e iji fuka moik igefuon ire ise kafokafo ijieb fu arafirikro fu iji agoimoino ijin.