1 Nowaiy ungune nunkowarrin reyuramb an kornar nunkowarrin; ungunuk ungune luku nowaiy ile pempani Jehovah onomangk.

2 Yaral inde nunkowarrin, nowaiy inde kaikund trumpetungai, lun ellin hyprocritar, synagogueungar, streetungar, reyuramb an kornar. Katyil atte tingowun onomangk, pindyin harnakar, wilkun ar.

3 Yaral inde nunkowarrin, nowaiy reyin inde yan mai warrame, yare um atye nunkeri mare. 4 Nginte mangk nunkowarrin, nowaiy reyin an kornar, wunyitye Ngaiowe nakkani um, pempani ile umangk, wunyar ngruwar kornar nakkani.

5 Yaral inde reytyuwun ityan Jehovah nowaiy inde lun yelpulamaldar: kar reytyuwun ityan synagogueungar, streetungar, reyuramb an kornar. Katyil atte tingowun onom, pindyin harnakar wilkun ar.

6 Yaral inde reytyuwun ityan Jehovah, ngintai yappulun mantangk, yaral tarno korn um nakkin, wunyinde reytyuwun inangk ityan Ngaiowe, nakkani ile um Ngaiowe, kungani ile um, pempani ile umangk, wunyar kornar nakkani.

7 Yaral inde reytyuwun inangk Jehovah, nowaiy inde yarnani kaldowamp yammalaitye tungare, lun ellin ar heathen; kar kungullun, ile an Jehovah kungun hil amb uk ar multuwarrin yarnin. 8 Nowaiy inde luku; ngungkur Ngaiowe nglemin ungunai inde reytyuwun.

9 Luku ungune reytyuwun inangk Jehovah. Ngaiyeri anam lewin inde wyirrewarre. Ungunuk arn yarnin umauwe mitye blukkun arn.

10 Umauwe kingdom tyiwewar itye punt. Ngruwar ruwungai um kung our, yaral inde an taiyani, lun ellin narar wyirreungai.

11 Pemp our yan arnangk arnauwe krepowe hikkai nungge.

12 Tainpul our inde ungunuk arn wirrangwarrin, lun, ellin arn tainpulun ungunuk ar kornar wirrangwarrin arnangk.

13 Nowaiy inde arnan waiyani yangi ar wirrangar nanampundun arnan wirrangwarrin. Moerpun nide arman, wunyarn nowaiy wirrangwarrin. Nginte ellin governorowe piltengi, klartin, kaldowamp. Amen. 14 Ungunuk kornar wirrangwarrin, wunyungune tainpulun wirrangwarrin; wunyiie ngaiowe tainpulani nomauwe wirrangwarrin. 15 Ungunuk ungune nowaiy tainpulun kanauwe wirrangwarrin wunyile Ngaiowe nowaiy tainpulani umauwe wirrangwarrin.

16 Ungunuk ungune fasting nowaiy ungune lun ellin yelpulamaldar; kar enggun winmin kanauwurle makenggun kinemin, reyuramb an kornar kar fasting. Katyil atte yarnin onomangk, pindyin harnakar wilkun ar.

17 Yaral inde fasting nginte in angk nyrippin. 18 Wunyar kornar nowaiy nglemin inde fasting, nakkani ile um Ngaiowe, kityai, wunyile, umangk pempani, yaral kornar um nakkani.

19 Nowaiy ungune daiyuwun an maiyinggar nomanyirungai ruwungai, palli ar pultuwarrin; palli petamaldar an pettani. 20 Yun our inde an ngruwar wyirreungai, yangi ar nawaiy pultuwarrin, tarno petamaldar an pettani. 21 Ungunuk inde yuppun ngruwar wyirreungai, mai ngele yan pornun an wyirrewarre.

22 Pele ellin nakuramb, ungunuk pele nunkeri, wunyinde an nakkani tyelyerar. 23 Ungunuk pele wirrangi, ngruwar yonguldye ellani. Ungunuk umauwe pele yonguldye, wunyitye grauwe yonguldye.

24 Tarno korn serve em ani enggun masterenggun: nowaiy itye an pornun an yammalaitye masterowe, kitye an parnun an yamminye masterowe. Yar amb itye lun ellin ile nowaiy an nornun an yamminye, kitye an pornun an hikkai masterowe. Nowaiy ungune serve em enggun, Godowe mammon.

25 Ngape yarnin onomangk nowaiy ungune kurrin, minye ngurn takkani minye ngurn muttani, yangi arnauwe maiyingarr. Ngande um tumbewarrin; ngande winmir mai ngulde?

26 Nak our an pulyerar, nowaiy ar wingamin wheatowe, nowaiy reap em, nowaiy an yuppun barnangk, unmauwe Ngaiowe munguwun haranekar; wunyile um munguwani, mekimbe inde nowaiy wurruwarrin ityan? 27 Yarild ityan winmin inde in angk yullukru yammalai cubitowe.

28 Mekimb inde multuwarrin wilkun an maiyinggar - Nak our an flowerar - Kar kuringgun, nowaiy ar wilkun an maiyinggar, nowaiy ar ngenempin, nowaiy ar winmin an maiyinggar. 29 Ngate um tingowun, Solomon nowaiy itye in angk ngolir an maiyinggar lukugge haranekar. 30 Ungunuk ile Jehovah, luku pempir maiyinggar kaiye ald amb, yar itye kuringgun hikkai nungge, ngrekkald itye nyrangkani ovenungai; wunyile onom pem pani maiyinggar. Mekimbe ungune nowaiy wurrwuwarrin ityan.

31 Nowaiy ungune multuwarrin wilkun, nowaiy ungune multuwarrin yarnin, miny arn takkani, minyarn multani? Miny arn ngolani? 32 (Gentilar wilkun harnakar luku.) Nomauwe Ngaiowe wyirreungai nglemin itye pornun inde an harnakar. 33 Ngungkur ungune wilk our yan kingdom Godald, wilk our nunkowarrin, wunyile ngaiowe an pempani haranekar, takuramb, muturamb, ngoluramb.

34 Nowaiy ungune multuwarrin kungullun ngrekkald amb: ngrekkald ungune wilkun kin amb ai. Kunye ungune parpin hikkai nungge, yikkowun, in ambe yammalaitye nungge.