2
UMoya ONgcwele Uyehla NgePhentekhosti
1 Kwathi kufika usuku lwePhentekhosti, bonke babendawonye. 2 Masinyane nje kwabakhona umsindo onjengokuvunguza komoya wesiphepho wehla uvela ezulwini, wagcwala indlu yonke ababehlezi kuyo. 3 Babona okwakungathi zinlimi ezingamalangabi omlilo ezehlukana zahlala komunye lomunye wabo. 4 Bonke bagcwaliswa ngoMoya oNgcwele, basebeqalisa ukukhuluma ezinye izindimi njengokwaneliswa kwabo nguMoya.
5 Ngalesosikhathi kwakuhlala amaJuda ayemesaba uNkulunkulu eJerusalema, evela kuyo yonke imibuso yomhlaba. 6 Athi ngokuzwa umsindo lo, kwabuthana ixuku labantu bemangele ngoba omunye lomunye wabezwa bekhuluma ngolimi lwakhe. 7 Ngokumangala okukhulu babuza bathi, “Kanti bonke laba abakhulumayo kabasimaGalile na? 8 Pho kungani omunye lomunye wethu ebezwa bekhuluma ngolimi lwethu na? 9 AmaPhathiya, amaMede, ama-Elamu; izakhamizi zaseMesophothamiya, lezeJudiya leKhaphadokhiya, lePhontusi le-Ezhiya, 10 leFirigiya lePhamfiliya, leGibhithe lezingxenye zeLibhiya eduze leKhureni; izethekeli ezivela eRoma 11 (amaJuda lamakholwa aphendukele enkolweni yesiJuda); amaKhrethe lama-Arabhu, sibezwa befakaza izimangaliso zikaNkulunkulu ngendimi zethu!” 12 Babedidekile bengelankani, babuzana bathi, “Kutshoni lokhu?”
13 Kodwa abanye benza inhlekisa ngabo bathi, “Banathe iwayini enengi bedlulisa.”
UPhethro Ukhuluma Phakathi Kwexuku Labantu
14 UPhethro wasesukuma labalitshumi lanye, waphakamisa ilizwi lakhe wakhuluma emphakathini wathi, “Bantu bakithi elingamaJuda, lani lonke eliseJerusalema, kahleni ngilichasisele lokhu; lalelisisani lokhu engikutshoyo. 15 Amadoda la kawadakwanga njengokucabanga kwenu. Kuseselihola lesificamunwemunye nje ekuseni! 16 Hatshi, lokhu yikho okwakhulunywa ngumphrofethi uJoweli ukuthi:
17 ‘Ngezinsuku zokucina, uNkulunkulu uthi,
Ngizathululela uMoya wami kubo bonke abantu.
Amadodana lamadodakazi enu azaphrofitha,
izinsizwa zenu zizabona imibono,
lamaxhegu enu azaphupha amaphupho.
18 Lasezincekwini zami, ezesilisa lezesifazane,
ngizawuthulula uMoya wami ngalezonsuku,
njalo bazaphrofitha.
19 Ngizatshengisa izimanga ezulwini phezulu,
lezibonakaliso emhlabeni phansi,
igazi lomlilo lezikhatha zentuthu.
20 Ilanga lizaphendulwa libe yibumnyama,
lenyanga ibeligazi
phambi kokuba kufike usuku olukhulu lukaThixo, olukhazimulayo.
21 Njalo wonke obiza
ibizo likaThixo uzasindiswa.’* 2.21 UJoweli 2.28-32
22 Bantu bako-Israyeli, lalelani lokhu: UJesu waseNazaretha wayeyindoda eyamiswa nguNkulunkulu kini, ngezimangaliso lezibonakaliso uNkulunkulu azenzayo phakathi kwenu ngaye, njengoba lina ngokwenu lisazi. 23 Umuntu lo wanikelwa kini ngecebo likaNkulunkulu ayelimisile langolwazi lokuzayo; njalo lina lincediswa ngabantu ababi,† 2.23 kumbe ngabantu abangelamthetho (okutsho abaZizwe) lambulala ngokumbethela esiphambanweni. 24 Kodwa uNkulunkulu wamvusa kwabafileyo, wamkhulula ebuhlungwini bokufa ngoba ukufa kwakungelamandla okumncindezela. 25 UDavida wathi ngaye:
‘Ngayibona iNkosi iphambi kwami kokuphela.
Njengoba isesandleni sami sokunene,
angiyi kunyikinywa.
26 Ngakho inhliziyo yami iyathaba
lolimi lwami luyathokoza;
umzimba wami lawo uzahlala ulethemba,
27 ngoba kawuzukungidela ukuba ngiye endaweni yabafileyo,
njalo kawusoze wekele ongcwele wakho
ukuthi abone ukubola.
28 Ungazisile izindlela zempilo;
uzangigcwalisa ngentokozo phambi kwakho.’‡ 2.28 AmaHubo 16.8-11
29 Bazalwane, ngilitshela ngilesibindi ukuthi ukhokho uDavida wafa wangcwatshwa, njalo ithuna lakhe likhona khonapha kuze kube lamuhla. 30 Kodwa wayengumphrofethi, ekwazi ukuthi uNkulunkulu wayemthembisile ngesifungo ukuthi wayezabeka omunye wesizukulwane sakhe esihlalweni sakhe sobukhosi. 31 Ngoba ebona okwakuphambili, wakhuluma ngokuvuka kukaKhristu kwabafileyo, ukuthi kazange atshiywe endaweni yabafileyo njalo umzimba wakhe kawukubonanga ukubola. 32 UNkulunkulu usemvusile uJesu lo waphila, thina sonke singofakazi balokho. 33 Njengoba esekhutshulelwe ngakwesokunene sikaNkulunkulu, usamukele kuYise uMoya oNgcwele owathenjiswayo njalo usekuthulule lokho elikubonayo lelikuzwayo khathesi. 34 Ngoba uDavida kenyukanga ukuya ezulwini, kodwa wathi,
‘INkosi yathi eNkosini yami:
“Hlala ngakwesokunene sami
35 ngize ngenze izitha zakho
zibe yisinyathelo senyawo zakho.”§ 2.35 AmaHubo 110.1’
36 Ngakho-ke, u-Israyeli wonke kaqiniseke ngalokhu: uNkulunkulu usenze uJesu lo elambethelayo waba yiNkosi loKhristu.”
37 Abantu bathi bekuzwa lokhu bathinteka kakhulu ezinhliziyweni, bathi kuPhethro labanye abapostoli, “Bazalwane, senze njani na?”
38 UPhethro waphendula wathi, “Phendukani libhaphathizwe lonke, ebizweni likaJesu Khristu ukuze lithethelelwe izono zenu. Njalo lizakwamukela isipho soMoya oNgcwele. 39 Isithembiso ngesenu labantwabenu labo bonke abakude, lesabo bonke iNkosi uNkulunkulu wethu ezababiza.”
40 Wabaxwayisa langamanye amazwi amanengi; njalo wabancenga wathi, “Zisindiseni kulesisizukulwane esonakeleyo.” 41 Labo abalemukelayo ilizwi lakhe babhaphathizwa, kwengezwa enanini labo mhlalokho abangaba zinkulungwane ezintathu.
Ubudlelwano Bamakholwa
42 Bayikhuthalela imfundiso yabapostoli kanye lokudlelana, lokuhlephuna isinkwa lokukhuleka. 43 Wonke umuntu wagcwala ukwesaba ngezimanga lezibonakaliso ezenziwa ngabapostoli. 44 Wonke amakholwa ayendawonye, ehlanganyela kukho konke. 45 Athengisa izinto zawo lempahla zawo anika loba ngubani oswelayo. 46 Insuku zonke aqhubeka ehlangana emagumeni ethempeli njalo ehlephuna isinkwa emakhaya awo esidla ndawonye ngezinhliziyo ezimhlophe lezithobekileyo, 47 edumisa uNkulunkulu njalo ethakazelelwa ngabantu bonke. Njalo iNkosi yengeza inani lawo insuku zonke ngalabo abasebesindisiwe.