8
Isitsha Sezithelo Ezivuthiweyo
1 Nanku engakutshengiswa nguThixo Wobukhosi: isitsha esilezithelo ezivuthiweyo. 2 Wangibuza wathi, “Kuyini okubonayo, Amosi?”
Mina ngaphendula ngathi, “Yisitsha esilezithelo ezivuthiweyo.”
UThixo wasesithi kimi, “Isikhathi sabantu bami bako-Israyeli sesifikile; kangisabaxoleli futhi.
3 Ngalolosuku, izingoma zethempelini zizaphenduka zibe yikulila. Izidumbu ezinengi kakhulu zidaklazelwe indawo yonke! Thulani!” Kutsho uThixo Wobukhosi.
4 Zwanini lokhu, lina elincindezela abaswelayo njalo
lichitha labayanga elizweni,
5 lisithi,
“Ukuthwasa kweNyanga Entsha kuzaphela nini
ukuze sithengise amabele,
leSabatha lidlule
ukuze sithengise ingqoloyi na?”
Sinciphise isilinganiso,
sikhweze intengo
siqilibezele ngezilinganiso zenkohliso,
6 sithenge abayanga ngesiliva,
abaswelayo sibathenge ngamanyathelo,
sithengise lamakhoba ngengqoloyi.
7 UThixo ufungile ngokuziQhenya kukaJakhobe wathi, “Angisoze ngakhohliswa loba yini abayenzileyo.
8 Ilizwe kaliyikuthuthumela ngalokhu yini
labo bonke abahlala kulo kabayikulila na?
Ilizwe lonke lizaqubuka njengeNayili;
lizadungeka beselitshona phansi
njengomfula waseGibhithe.
9 Ngalolosuku,” kutsho uThixo Wobukhosi,
“ngizakwenza ilanga litshone emini,
ngenze emhlabeni kube mnyama emini ekhanyayo.
10 Ngizaphendula imikhosi yenu yokukhonza ibe yikulila
lokuhlabelela kwenu konke kube yikukhala.
Lonke ngizalenza ligqoke amasaka,
njalo liphuce amakhanda enu.
Lesosikhathi ngizasenza sifane lokulilela indodana eyiyo yodwa
lokuphela kwaso kube njengosuku olubuhlungu.
11 Insuku ziyeza, kutsho uThixo Wobukhosi,
lapho engizathumela khona indlala elizweni
hatshi indlala yokudla kumbe ukomela amanzi,
kodwa indlala yokuzwa amazwi kaThixo.
12 Abantu bazaphamazela besuka elwandle besiya elwandle,
njalo bazule kusukela enyakatho kusiya empumalanga,
bedinga ilizwi likaThixo,
kodwa kabayikulithola.
13 Ngalolosuku
izintombi ezinhle lezinsizwa eziqinileyo
zizaqaleka ngenxa yokoma.
14 Bona labo abafunga ngesono seSamariya,
loba bathi, ‘Ngeqiniso
njengoba unkulunkulu wakho ephila, wena Dani,’
loba bathi, ‘Ngeqiniso
njengoba unkulunkulu waseBherishebha ephila,’
bazakuwa, bangaphindi bavuke futhi.”