18
Umphefumulo Owonayo Uzakufa
1 Ilizwi likaThixo lafika kimi lisithi: 2 “Litshoni lina bantu nxa libetha isaga lesi ngelizwe lako-Israyeli lisithi:
‘Oyise badla amavini amunyu,
amazinyo abantwana asetshelela’?
3 Ngeqiniso elinjengoba ngikhona, kutsho uThixo Wobukhosi, kalisayikusitsho isaga lesi ko-Israyeli. 4 Ngoba yonke imphefumulo ephilayo ngeyami, uyise kanye lendodana, bobabili ngokufanayo ngabami. Umphefumulo owonayo yiwo ozakufa.
5 Kasithi kulomuntu olungileyo
owenza okufaneleyo lokuqondileyo.
6 Kadleli ezindaweni zokukhonzela zasentabeni loba
athembe izithombe zendlu ka-Israyeli.
Kangcolisi umfazi kamakhelwane wakhe
loba alale lowesifazane esemazibukweni.
7 Kancindezeli muntu
kodwa uyabuyisela akuthathayo njengesibambiso sokwebolekwayo.
Kabenzi ubuphangi
kodwa unika abalambileyo ukudla kwakhe
labanqunu abanike izigqoko.
8 Kabolekisi ukuba athole inzuzo
loba athathe inzuzo edlulisileyo.
Uyasithinta isandla sakhe ekwenzeni okubi
njalo ehlulele kuhle phakathi komuntu lomuntu.
9 Uyazilandela izimiso zami
agcine lemithetho yami ngokuthembeka.
Lowomuntu ulungile;
ngempela uzaphila,
kutsho uThixo Wobukhosi.
10 Kasithi ulendodana elodlakela echitha igazi kumbe yenze loba yikuphi kwalezizinto 11 (lanxa uyise engenzanga lanye yazo):
Idlela ezindaweni zokukhonzela ezisentabeni.
Iyamngcolisa umfazi kamakhelwane wayo.
12 Incindezela abayanga labaswelayo.
Yenza ubuphangi.
Kayibuyiseli eyakuthatha kuyisibambiso.
Yethemba izithombe.
Yenza izinto ezinengisayo.
13 Yebolekisa ukuba ithole inzuzo njalo ithatha inzuzo edlulisileyo.
Umuntu onjalo uzaphila na? Kasoze aphile! Ngenxa yokuba enze zonke lezizinto ezinengisayo uzabulawa mpela legazi lakhe lizakuba phezu kwekhanda lakhe.
14 Kodwa kasithi indodana le ilendodana ezibonayo zonke izono ezenziwa nguyise, kodwa lanxa izibona, yona kayizenzi izinto ezinje:
15 Kayidleli ezindaweni zokukhonzela ezisentabeni,
kumbe yethembe izithombe zendlu ka-Israyeli.
Kayimngcolisi umfazi kamakhelwane wayo.
16 Kayincindezeli muntu
kumbe ifune isibambiso ekwebolekiseni.
Kayibenzi ubuphangi
kodwa abalambileyo iyabapha ukudla kwayo
inike labanqunu izigqoko.
17 Iyasithinta isandla sayo ekoneni
njalo kayithathi nzuzo loba inzuzo edlulisileyo.
Iyagcina imilayo yami ilandele lezimiso zami.
Kayiyikufela izono zikayise; izaphila impela. 18 Kodwa uyise uzafela izono zakhe yena ngokwakhe, ngoba wabamba ngamandla, waphanga umfowabo wenza okubi ebantwini bakibo.
19 Ikanti liyabuza lithi, ‘Kungani indodana ingabi lecala likayise na?’ Njengoba indodana yenze okufaneleyo lokuqondileyo njalo inaka ukugcina izimiso zami, izaphila impela. 20 Umphefumulo owonayo yiwo ozakufa. Indodana kayiyikuba lecala likayise, loba uyise abe lecala lendodana. Ukulunga komuntu olungileyo kuzabalelwa kuye, lobubi bomubi buzamelana laye.
21 Kodwa nxa umuntu omubi ephenduka kuzozonke izono azenzayo njalo agcine izimiso zami zonke enze okufaneleyo lokuqondileyo, uzaphila impela, akayikufa. 22 Akukho kona kwakhe okuzakhunjulwa. Ngenxa yezinto ezilungileyo azenzileyo uzaphila. 23 Ngiyathokoza ngokufa komuntu omubi na? kutsho uThixo Wobukhosi. Esikhundleni salokho, kangithabi na nxa bephenduka ezindleleni zabo njalo baphile?
24 Kodwa nxa umuntu olungileyo eguquka ekulungeni kwakhe enze izono njalo enze zona kanye izinto ezinengayo ezenziwa ngumuntu omubi, kambe uzaphila na? Akukho okwezinto ezilungileyo azenzayo okuzakhunjulwa. Ngenxa yecala lokungathembeki langenxa yezono azenzayo, uzakufa.
25 Kodwa lina lithi, ‘Indlela kaThixo kayilunganga.’ Zwana, wena ndlu ka-Israyeli: Indlela yami kayifanelanga na? 26 Nxa umuntu olungileyo eguquka ekulungeni kwakhe enze izono, uzakufela lokho; ngenxa yezono azenzileyo uzakufa. 27 Kodwa nxa umuntu omubi ephenduka ebubini abenzileyo enze okufaneleyo lokuqondileyo, uzasilisa ukuphila kwakhe. 28 Ngoba ucabanga konke okubi akwenzayo aphenduke kukho, uzaphila impela; akayikufa. 29 Ikanti indlu ka-Israyeli ithi, ‘Indlela kaThixo kayilunganga.’ Izindlela zami kazilunganga na, wena ndlu ka-Israyeli?
30 Ngakho-ke wena ndlu ka-Israyeli, lowo lalowo ngizamahlulela ngokumayelana lezindlela zakhe, kutsho uThixo Wobukhosi. Phendukani! Tshiyani ububi benu bonke; ngalokho isono kasiyikuba yikufa kwenu. 31 Zikhululeni kukho konke okubi elikwenzileyo, lizuze inhliziyo entsha lomoya omutsha. Kungani na uzakufa, wena ndlu ka-Israyeli? 32 Ngoba angithokozi ngokufa loba ngokukabani, kutsho uThixo Wobukhosi. Phendukani liphile!”