32
Ukulilela UFaro
1 Ngomnyaka wetshumi lambili, ngenyanga yetshumi lambili ngosuku lokuqala, ilizwi likaThixo lafika kimi lisithi: 2 “Ndodana yomuntu, khala isililo ngoFaro inkosi yaseGibhithe uthi kuye:
‘Wena unjengesilwane phakathi kwezizwe;
unjengesilo phakathi kolwandle,
uvubavuba amanzi ezifuleni zakho,
uchaphaze amanzi ngezinyawo zakho,
ungcolisa lezifula ngodaka.
3 Nanku okutshiwo nguThixo Wobukhosi:
Ngoquqaba olukhulu lwabantu
ngizaphosela imbule lami phezu kwakho
njalo bazakudonsela phezulu ngomambule wami.
4 Ngizakuphosela emhlabathini
ngikudonsele egcekeni egangeni.
Ngizakwenza zonke izinyoni zasemoyeni zihlale phezu kwakho
lezinyamazana zonke zasemhlabeni zizitike kuwe.
5 Ngizachaya inyama yakho phezu kwezintaba
njalo ngigcwalise izigodi ngezidumbu zakho.
6 Ngizathambisa ilizwe ngegazi lakho
eligeleza indawo yonke kusiya ezintabeni,
lezindonga zizagcwala inyama yakho.
7 Lapho sengikucitsha, ngizakwembesa amazulu
ngenze izinkanyezi zawo zibe mnyama;
ngizakwembesa ilanga ngeyezi,
lenyanga ingabe isakhanyisa.
8 Zonke izibane ezikhanyisa emazulwini
ngizazenza zibe mnyama
elizweni lakho, kutsho uThixo Wobukhosi.
9 Ngizakhathaza inhliziyo zabantu abanengi
lapho sengiletha ukuchithwa kwakho phakathi kwezizwe,
phakathi kwamazwe ongazange uwazi.
10 Ngizakwenza abantu abanengi bamangale ngawe,
lamakhosi abo azathuthumela ngokwesaba ngenxa yakho
lapho nginyikinya inkemba yami phambi kwawo.
Ngosuku lokuwa kwakho
lowo lalowo wabo uzaqhaqhazela
isikhathi sonke sokuphila kwakhe.
11 Ngoba nanku okutshiwo nguThixo Wobukhosi:
Inkemba yenkosi yaseBhabhiloni
izamelana lawe.
12 Ngizakwenza amaxuku akho abulawe
ngezinkemba zamadoda alamandla
alesihluku kakhulu phakathi kwezizwe zonke.
Azachoboza ukuziqhenya kweGibhithe,
njalo wonke amaxuku alo azanqotshwa.
13 Ngizabulala zonke inkomo zabo
ngaseduzane lamanzi amanengi
angaphindi adungwe lunyawo lomuntu futhi
kumbe angcoliswe ngamasondo enkomo ngodaka.
14 Lapho-ke ngizakwenza amanzi alo azinze
lezifula zalo zigeleze njengamafutha,
kutsho uThixo Wobukhosi.
15 Lapho iGibhithe sengilichitha
ngiphundla ilizwe lakho konke okukulo,
lapho sengibacakazela phansi bonke abahlala khona,
lapho-ke bazakwazi ukuthi mina nginguThixo.’
16 Lesi yisililo esizaculelwa iGibhithe. Amadodakazi ezizwe azasicula: azasiculela iGibhithe kanye lamaxuku alo wonke, kutsho uThixo Wobukhosi.”
17 Ngomnyaka wetshumi lambili, ngosuku lwetshumi lanhlanu lwenyanga, ilizwi likaThixo lafika kimi lisithi: 18 “Ndodana yomuntu, lilela amaxuku aseGibhithe njalo wehlisele ngaphansi komhlaba kokubili lona iGibhithe kanye lamadodakazi ezizwe ezilamandla, lalabo abehlela phansi egodini. 19 Tshono kubo uthi, ‘Lina liyathandwa kakhulu kulabanye na? Yehlelani phansi lilale phakathi kwabangasokanga.’ 20 Bazafela phakathi kwalabo ababulawa ngenkemba. Inkemba isihwatshiwe; iGibhithe kalihudulwe lamaxuku alo wonke. 21 Abakhokheli abalamandla bazakutsho ngeGibhithe labamanyene layo bephakathi kwengcwaba bathi, ‘Sebehlele phansi njalo balele labangasokanga, lalabo ababulawa ngenkemba.’
22 I-Asiriya ikhona lebutho layo lonke; izungezwe ngamangcwaba abo bonke abayo ababuleweyo; bonke ababulawe ngenkemba. 23 Amangcwaba abo asekuzikeni kwegodi njalo ibutho layo lilele lihanqe ingcwaba layo. Bonke abandisa ukwesaba elizweni labaphilayo babulewe, bebulawa ngenkemba.
24 I-Elamu ikhona, lamaxuku ayo wonke azungeze ingcwaba layo. Bonke babulewe, bebulawa ngenkemba. Bonke abandisa ukwesaba elizweni labaphilayo behlela phansi ngaphansi komhlaba bengasokanga. Bathwele ihlazo labo belalabo abehlela phansi egodini. 25 Yenzelwa umbheda phakathi kwababuleweyo, lamaxuku ayo wonke ehanqe ingcwaba layo. Bonke kabasokanga, babulawa ngenkemba. Ngoba ukwesatshwa kwabo kwasekugcwele elizweni labaphilayo, bathwala ihlazo labo lalabo abehlela phansi egodini; babekwa phakathi kwababuleweyo.
26 IMesheki leThubhali akhona, lamaxuku awo wonke ezungeze amangcwaba awo. Wonke amaxuku kawasokanga, abulewe ngoba andisa ukwesatshwa kwawo elizweni labaphilayo. 27 Kanje kawalele lamanye amabutho angasokanga awafayo, wona ehlela phansi engcwabeni lezikhali zawo zempi, azinkemba zawo zabekwa ngaphansi kwamakhanda awo na? Isijeziso sezono zawo sahlala phezu kwamathambo awo, lanxa ukwesatshwa kwamabutho la kwagcwala elizweni labaphilayo.
28 Lawe futhi, wena Faro, uzakwephulwa njalo ulale phakathi kwabangasokanga, lalabo ababulawa ngenkemba.
29 I-Edomi ikhona, amakhosi ayo lamakhosana ayo wonke; phezu kwamandla abo, balaliswa lalabo ababulawa ngenkemba. Balele labangasokanga, lalabo abehlela phansi egodini.
30 Wonke amakhosana asenyakatho kanye lamaSidoni wonke bakhona; behlela phansi lababulawayo behlazekile lanxa kulokwesaba okwabangelwa ngamandla abo. Balele bengasokanga kanye lalabo ababulawa ngenkemba njalo bathwala ihlazo labo lalabo abehlela phansi egodini.
31 UFaro lebutho lakhe uzababona njalo uzaduduzeka ngamaxuku akhe wonke abulawa ngenkemba, kutsho uThixo Wobukhosi. 32 Lanxa ngamenza wandisa ukwesaba elizweni labaphilayo, uFaro kanye lamaxuku akhe wonke, bazalaliswa phakathi kwabangasokanga, lalabo ababulawa ngenkemba, kutsho uThixo Wobukhosi.”