Ihubo 135
1 Dumisani uThixo.
Dumisani ibizo likaThixo;
mdumiseni lina zinceku zikaThixo,
2 lina eliqhuba inkonzo endlini kaThixo,
emagumeni endlu kaNkulunkulu.
3 Dumisani uThixo ngoba uThixo ulungile;
hlabelani indumiso ebizweni lakhe ngoba lokho kuhle.
4 Ngoba uThixo usemkhethile uJakhobe ukuba ngowakhe,
u-Israyeli ukuba yinotho yakhe eligugu.
5 Ngiyazi ukuthi uThixo mkhulu,
lokuthi iNkosi yethu inkulu kulabonkulunkulu bonke.
6 UThixo wenza loba yini ayifunayo,
emazulwini lasemhlabeni,
enlwandle lasezinzikini zazo.
7 Wenza amayezi aqubuka emikhawulweni yomhlaba;
uthuma umbane kanye lezulu,
avulele umoya oseziphaleni zakhe.
8 Wawalahla phansi amazibulo aseGibhithe,
amazibulo abantu lawezinyamazana.
9 Wathumela izibonakaliso lezimangaliso zakhe
phakathi kwakho, wena Gibhithe,
phezu kukaFaro lezinceku zakhe zonke.
10 Wazilahla phansi izizwe ezinengi
wabulala amakhosi alamandla,
11 uSihoni inkosi yama-Amori,
u-Ogi inkosi yaseBhashani
lawo wonke amakhosi aseKhenani
12 wanika ilizwe labo laba yilifa,
ilifa labantu bakhe, u-Israyeli.
13 Ibizo lakho, Oh Thixo, limi kuze kube nininini,
udumo lwakho, Oh Thixo, ezizukulwaneni zonke.
14 Ngoba uThixo uzabalamulela abantu bakhe
abe lesihawu ezincekwini zakhe.
15 Izithombe zezizwe ziyisiliva legolide,
zenziwe ngezandla zabantu.
16 Zilemilomo, kodwa kazikhulumi,
amehlo, kodwa kaziboni;
17 zilezindlebe, kodwa kazizwa,
njalo kazilamphefumulo emilonyeni yazo.
18 Labo abazenzayo bazakuba njengazo,
kube njalo lakulabo abathemba kuzo.
19 Wena ndlu ka-Israyeli, dumisa uThixo;
wena ndlu ka-Aroni, dumisa uThixo;
20 wena ndlu kaLevi, dumisa uThixo
lina elimesabayo, dumisani uThixo.
21 Udumo alube uThixo lusuka eZiyoni,
kuye ohlala eJerusalema.
Dumisani uThixo.