Hibru
O bolobol o la tasir Hibru
Noso bolobolor Hibru
O buk Hibru o moko tar timuhur uelhote.
O buk Hibru o ualasira tar bureher inete tang Iesu. Inggeig ahik pahi ate tang mai ke bolo toro bolobolo roon. O gisiamehe ra namana tang Poul teke bolo tang roon.
O buk Hibru o inete uliek tun ge o ualasira pe roono tar bureher niualasir i lolono toro Baeboul. Roon o ualasira tagigeig tang Iesu ahik paha anggelo (Hib 1). Iesu a God. Bo Iesu puk ke me tamat. Iesu nagi patereig (Hib 5 doh mahar 9). Doh Iesu ter Patere uaia tun (Hib 7.25-28) i lolono tar pensiounur uelhote, o patere ra uiliatung pous tasir inetesiner tua mare luaka liu God tasir tamat. Bo Iesu ke me mata katkatongo tar kale uelmahing teregi niguata uasaeig. God ke uahue toro duatingina Iesu tono maton (Hib 9). Temaeit God e turung kusa luara teregi niguata uasaeig tar binaka ri tagorong mana tang Iesu.
I lolonno toro Baeboul tar pensiounur uelhote, o burehe ka tagorong mana tang God (Hib 11). Gisina ka tagorong man, e turung heiriha God tang Iesu. Temaeit gisin ahik pah ka sokor, gitiempe ka ueltupara pemesina tar bureher niduh. Temaeit inggeig pono paki tagorong mana tang God tar binaka ri ueltupara tar niduh (Hib 12.1-2).
1
No Uelhire God ke mene keipin tar tun ger keketik bulout
1 Sioununtiehe tun God ke mene keip toso bungugigeig tasir propet tar bureher binak, kare tar mamang hagarilik. 2 * Jon 1.3Bo tar binaka pukulanine daan, God ke mene keip tar tun ger keketik bulout tono uelhire tagigeig. God ke ualapagaha tar tun tere kale uahiua tar mamang inetelik. Tatanon, God ke touo keip tatanono tar mamang inetelik i ran dohi kot. 3 * Jon 14.9; Kol 1.20; Hib 8.1Inggono tere ualasira tar balbalana na uiniatoro God, doh inggono teke kale uakapa tun hape re baka pe God, kare kale toto tokaha tar mamang inetelik tono uelhire popokoh. Binaka ke uadelauana baka peono teregi niguata uasaeig, kare la tabilangua tar pang mua tang God ger tampopokohontiehe tun i Heuen.
4 * Pil 2.9Temaeit inggono ter i rana kai uainintiehe tasir anggelou ter siokono kompe tar hanga ke heirin God tatanon a irana kai uainintiehe tar hangasisin. 5 * 1OUTT 17.13; Apo 13.33Ge God pe ahik pah ke kula pare, me tang siokor anggelou,
“Ingga a tuguo, daana ku kotpokoso inggo a tamoumua.” Ker 2.7
Doh ahik pono pah ke kula me anggelou pare,
“Inggo u turung kotpokos a tamanon,
doh inggon e turung kotpokos a Tuguo.” 2 Samuel 7.14
6 * Roum 8.29Doh tar binaka tun ke marang heirihaono tar tun ger uoum ger bulout i kot, inggono ke kula pare,
“Inggoum, no anggelou uakapa tun God, mu lotu tatanon.” Ualatut 32.43
7 * Ker 104.4Kare kula pare tosno anggelou,
“God e guata sira tasir anggelou misiana tar rom,
doh tosno tamatang kalekinale o nituha keip toro luhluhuna ro hue.” Ker 104.4
8 Bor Tunono teke kulaiono pare,
“Ingga a God, nongo tabtabilang toiaa
o turung moko dedela tar mamang binakalik,
Ingga o kaueke keip tosnongo tamata tenang nitoia tar niguatar kodkodoh.
9 Ingga o malauelhir tar niguatar uia, karo de tar niguatar sa.
Temaene, God ge nang Goda, ke uelpikur keip totomua tar uaiuaiang uah,
a hagaring ueltad a uleik uain tar niuaheit ke heiriono toso uanotoumua.” Ker 45.6-7
10 God ke kula pono pare,
“Tar uakikilanganar binak, ingga teko touo tar tagirinar kot,
doh tar limoum katong, ingga ko tou i ran.
11 Rasin ura turung rou, bo ingga o turung uangoul dede,
rasin ura turung pensioun, kaura mout sira toro gomono pensioun.
12 Ingga o turung ligun sira tasrasina toro kokop,
doh rasin ura turung uapalih.
Bo ingga puk o turung uangoul sira kompela pare tar mamang binakalik, ahik paho palih tagu.” Ker 102.25
13 Doh God ahik pah ke kula sira tagu me anggelou misiana ke kula pe tar Tun,
“Tabilane tar pang mua totoguo,
e tuka getu touahiua inggo tosnongo uelmatana
ra uangoul i kukulebanga totomua.” Ker 110.1
14 * Ker 34.7; 91.11O hauanguasinar anggelou? Gisin o iaben gera kalekinale tang God, doh no ualualatueon tar poul tasisit ra uelkarusis.