15
Mawutjalu Turlku Yinkarranytja
1 Nyangka-ya Mawutjalu puru yarnangu pirnilutarrartu turlku ngaanya yinkarra Mama Kuurrnga marninypungkulanytja:
“Mama Kuurrnga-rna yinkarra marninypungama.
Mama Kuurrnga wina mularrpa.
Purni pirninya-tjananya kapingka warningu tjarrpatjunu,
puru purnitjarra pitjapayinyatarrartu.
2 Mama Kuurrtu-rni waku purlkanyalu
wankarura kanyilpayi.
Nyangka-rnalu marninypungama.
Mama Kuurrtu-tju tjamupirti kanyiranytja.
Nyangka-rna turlku yinkarra marninypungama
Puurrpa Purlkanya nyinarranyangka.
3 Mama Kuurrnga warrmarla purlkanya.
Palunyanya yini Yaawayinya.
4 Palunyalu puurrpa Piiruku warrmarla pirninya
puru purni kaarrtjarra pirninya kapingka warningu tjarrpatjunu.
Nyangka-ya warrmarla puurrpa pirninya mirrirringu
kapi ngaa Tjitirn-tjitirnta.
5 Kapi katuwana ngarrirranyangka
yapupirinypa-ya tjarrpangu tirtu ngarrirra.
6 Mama, nyuntulun mara waku purlkanyalu
yanyan-yanyanpa nyinapayinya pungkula mirrirntara wiyalpayi.
7 Nyuntulun wina mularrpa.
Yanyan-yanyanpa nyinapayi-tjananyan pungkula wiyalpayi.
Yuwa, mirrparnarrirralpi-tjananyan pungkula-wanara wiyalpayi.
Warulukurlu tjanpi kampa wiyala, palunyapirinypa.
8 Mama, nyuntulun kapi puurnu tjarrarnu.
Nyangka wararrapirinypa ngaralanytja.
Nyangka manta kapi kaninytjarrangkatjanya
yartakarringkulalpi yiwarrapirinypa ngaralanytja.
9 Tjiinya-ya yanyan-yanyanpa nyinapayilu watjarnu,
‘Wanalku-latju tjulyalku.
Wuyurrarringkulalpi-latju yulytja-tjanampa tjarralku kanyinma.
Kunmarnu purlkanya yarraralpi-latju wakalku mirrirntaralpi
yulytja-tjanampa mantjira katiku.’
10 Nyangka nyuntulun kapi puurnu.
Nyangkalta-tjananya tjuturnu mirrirntanu.
Nyangka-ya yapupirinypa tjarrpangu tirtu ngarrirra.
11 Mama Kuurr, tjukurrtatja kutjupa nyuntunyapirinypa nyinanytjamunurtu.
Nyuntulun kutju mularrpa nyinarra.
Puru nyuntulukutjun tjukarurru nyinapayi.
Kutjupalu palunyapirinypa kamu palyalku.
Ngarna nyuntulun yayirninytjulu kutjupa-kutjupa palyalpayi.
12 Nyuntulunkun mara ma-kanyirnu.
Nyangka mantalu-tjananya yanyan-yanyanpa nyinapayinya kuurltjunu wiyarnu.
13 Nyangkankun katja yurntalpirti wankarunu.
Palunyalu-tjananyan mukulyanytjulu puru waku walykumunulu katirrayirnu tjarrpatjunu,
ngurra nyarra nyuntulun nyinarra, palunyangka.
14 Nyangka-ya yarnangu kutjupa-kutjupalu kuliralpi ngurlu tiltirrmarayirnu nguwanpa punkarnu mirrirringu.
Ngurra Pilitjila nyinapayilu-ya kuliralpi ngurluny-ngurlunyarringu.
15 Nyangka-ya Yiitamala nyinapayiku puurrpa pirninya ngurluny-ngurlunyarringu nyinarranytja.
Nyangka-ya Mawapala nyinapayiku puurrpa pirninya ngurlu tiltirrmaranytja.
Puru-ya yarnangu Kayinanta nyinapayi pirninya ngurlurringu nyinarranytja.
16 Yuwa Mama Kuurr, purlkanya-ya ngurlurringu.
Tjiinya-ya kulirnu nyuntulun waku purlkanyalu palyaranyangka.
Kuliralpi-ya ngurlu tiltirrmaranytja
nyuntuku katja yurntalpirti-ya watipitjalayinnyangka.
Tjiinya-tjananyan Yiitjipulanguru yarlangkatjura katingu,
puurrpa palunyaku waarka tirtu palyaratjakutarra.
17 Palunyalu-tjananyan katingu nyinatjunu nyuntuku yapungka,
ngurra nyarra nyuntulun ngurrkarntanu nyinakitjalu, palunyangka.
Tjiinyan nyinakitjalu ngurra yungarralu palyarnu.
18 Yuwa Mama Kuurr, nyuntulun Puurrpa Purlkanya tirtu nyinaku nyinama.”
Miriyamalu Turlku Yinkarranytja
19 Nyangka tjiinya-ya Yitjurayilku tjamupirti kapingka ngururrkutjarra manta tikirlpangka mapitjalayirnu yitipirringu. Nyangka-ya Yiitjipunyamartatji warrmarla puru purni kaarrtjarra puru purnitjarra pitjapayinyatarrartu marlawana mapitjalayinnyangka Mama Kuurrtu kapi marlakuralpi-tjananya tjarrpatjunu. 20 Nyangka Yaranku tjurtu Miriyamalu tjiinya Mama Kuurrku wangka kulira tjakultjunkupayilu tingki-tingkipirinypa mantjira pakarnu turlku yinkakitjalu. Nyangka-ya minyma pirnilu nyakula wanarnu tingki-tingkipirinypa pungku-pungkula yinkarra nyarnpirranytja. 21 Nyangka Miriyamalu turlku ngaapirinypa yinkangu:
“Mama Kuurrnga-la yinkarra marninypungama.
Mama Kuurrnga wina mularrpa.
Purni pirninya-tjananya kapingka yangatjuturnu,
purnitjarra pitjapayinyatarrartu.”
Mawutjalu Warta Kapingka Warningu
22 Nyangka-ya kapi Tjitirn-tjitirnnga wantirra pakarnu. Nyangka Mawutjalu-tjananya pila yini Tjuralawanalu walara katingu. Nyangka-ya pitjalayirnu-pitjalayirnu ngurra kutjarratjanulu kapiku purtu ngurriranytja. 23 Pitjalayirnu-ya parrapitjangu kapi yini Maaranya purtu tjikira yarrkaranytja. Tjiinyamarntu kapi kumpuwalyku ngarrirranytja. Palunyalu-ya yini tjapirnu Maaranya. Tjiinya wangka palunyanya ngaapirinypa, Kumpuwalykunya. 24 Nyangka-ya yarnangu pirnilu mirrparn-mirrparnarrirralpi Mawutjala watjarnu, “Wanytjanyanyka-latju kapi tjikilku?” 25 Nyangka Mawutjalu kurrurntutarra Mama Kuurrnga kapiku tjapirnu. Nyangka-lu nintitjunu warta ngaralanyangka. Nyangka kartarntaralpi kapingka warningu tjarrpatjunu. Nyangka walykumunurringu. Nyangka-ya tjikiranytja.
Ngurra palunyangka-ya nyinarranyangka Mama Kuurrtu-tjananya wangka pirni watjaranytja. Kulira-yayi walykumunu nyinama. Palunyalu-tjananya tjapirnu, “Ngayunya-munta-rniyan mularrkulira?” 26 Palunyalu puru tjapirnu, “Wangarnarralu-munta-yan kulira palyanma ngayulu-tjananyarnanta tjurrkurlmara watjaranyangka? Palunyangka-tjananyarnanta pikatjarrantjamaaltu wantiku, nyarra ngayulu-tjananyarna Yiitjipunyamartatji pikatjarrarnu, palunyapirinypa. Tjiinya-tjananyarnanta ngayulu Mama Kuurrtu pika wankalpayi.”
27 Nyangka-ya pakara pitjalayirnu kapi yini Yiilimuku parrapitjangu ngurra tjunu. Palunyangka kapi warla 12-pa ngaralanytja. Puru-ya warta walykumunu mirrkatjarra pirni ngaralanytja.