Uwien ya Jɔtiefɛ̀nku ya gbɔnku Ebrembɛ 3

Yesu cɛn' Moyis

1 Tɔ, nʼninjiɛb nin nʼninsiɛbɛ, ninbi bà Uwien yin' nɛ ni taan' ki yé uʼyaab nnɔ, cère mɛn niʼnun ń li cɛ *Yesu bo. Uwien sɔn' wɔn nɛ u yé bitɔtuɔrciɛnb ya ciɛn. Ti teke' nɛn nɛ ki jin' ki tɔkeh nɛ̀ binib ya nun bó. 2 U gɛ̀nde' wɔn nɛ wɔ ń sɔn lituonl, nɛ u sɔn' lɛ̀ niʼdonbó tɛn Moyis là sɔn' niʼdonbó ma bo Uwien den ni niʼkɛ saan nnɔ. 3 Ama *Yesu kpɛ wɔ ń li ŋmɔbe ukpiɛke ki cɛn' Moyis, kimɛ bi pɛ̀keh wà mɛn' iden nɛ ki cɛn' iden bugbɛn. 4 Imɔ̀n, iden kɛ ŋmɔbe wà mɛn' yì nɛ, ama Uwien nɛ naan' tibont kɛ. 5 Moyis là yé utonsɔnl wà sɔn' itùon Uwien den ni niʼkɛ saan niʼdonbó nɛ, ki yé Uwien li tɔke uʼnib tigbɛr tà nnɔ ya mɔ̀nkunl. 6 Ama Kristo wɔn yé Uwien ya Bijɛ nɛ, ki sɔn' Uwien den niʼdonbó. Wɔn nɛ ŋmɔbe ticiɛnt Uwien den. Ti co mitekjim kenken, tiʼyɛnm sɔnge ti ŋmɔbe lidɛndɛnl là nnɔ bo la, ti yé iden nnɔ yaab nɛ.

Binib bà teke' Uwien ki jin' nɛ li lɛ lifuorl uʼsaan

7 Nɛn bo nɛ *Mifuoñaanm ye:

«Dinnɔ ni cii' Uwien ya niɛke bó la,

8 ni la ñɛle niʼtub,

tɛn niʼyaajɛb là tien' ma,

uyo wà bi là yìe' Uwien ya ñɔbu bó

ki dɛle' wɔ kupenpelku ni nnɔ.

9 Uwien ye:

‹Niʼyaajɛb là dɛle' nni kupenpelku ni

bɛ ń liike n li tien ma,

nin bi laa' n tien' nà,

10 ki tì dukn' ibin pinan ma kɛ nnɔ.

Nɛn bo nɛ nʼbenku ni piebe' biʼbo,

nɛ n len' ki ye: bi tuu ki tùreh usɛn nɛ,

ka toh bɛ ń kpìen n yíe bɛ ń kpìen usɛn wà.›

11 Nɛ nʼbenpiebe ni n pole' ki ye:

‹ba ń baa n bonde' bɛ nà saan bɛ ń fuore nnɔ fiebu.› »

12 Nʼyaabɛ, liike mɛn niʼyul bo, niʼni uba la li ŋmɔbe iyɛnmaalbiɛre uʼfɛ̀l bo yì ń pien wɔ u la teke kí ji ŋɔ kí wiɛ Uwien limiɛl ya daan ya sɛn. 13 Ama li saakreh mɛn tɔb ya gbɛnɛnt daan kɛ daan, ŋɔ niʼni uba la cère ibiɛre ń lɛre wɔ, wɔ ń tien uyufaa kí yìe Uwien ya ñɔbu bó. Kimɛ nì kɛle' *Uwien ya gbɔnku ni ki ye dinnɔ la, nì yé dinnɔ nɛ tiʼmɔ bo. 14 Imɔ̀n, ti juore' ki co kenken ti là co ma bo mitekjim ki tì fɔre' la, ti yé Kristo ya tɔntɔknlieb nɛ imɔ̀nmɔ̀n.

15 Nì kɛle' *Uwien ya gbɔnku ni ki ye:

«Dinnɔ ni cii' Uwien ya niɛke bó la,

ni la ñɛle niʼtub,

tɛn niʼyaajɛb là tien' ma,

uyo wà bi là yìe' Uwien ya ñɔbu bó nnɔ.»

16 Tɔ, bi lɛ ba nɛ là cii' Uwien ya niɛke bó, ki yìe' uʼñɔbu bó? Na yé binib bà kɛ Moyis là ñɛn' bɛ Esipt ni nnɔ-ɔɔ? 17 Uwien ya benku ni là piebe' bi lɛ bo ki tì dukn' ibin pinan-i? Na yé binib bà là tien' ibiɛre ki kpokpo' kupenpelku ni nnɔ-ɔɔ? 18 U là pole' ki ye bi lɛ ba ŋa ń kɔ u bonde' bɛ lifuorl udu wà ni nnɔ fiebu? Bà là yìe' uʼñɔbu bó nnɔ ŋa ñí-ii? 19 Imɔ̀n, ti laa' ba kɔn' udu wà ni Uwien bonde' bɛ lifuorl nnɔ ni, kimɛ ba teke' wɔ ki jin'.