14
Eroris ijiqueri Jesos irianti Joan.
(Mr 6.14-29; Ir 9.7-9)
1 Aique iquemocoqueri Jesos Eroris, itingomi Garireasati. 2 Icantaiguëri iromeraroegui:
—Ira Jesos, iriantijengari Joan baotisatantatsiri. Nógagantabitacari, carari najique icabiritaja aisati, iroro itasongantaguëque.
3-4 Aroqueque Eroris yágabitsaqueri iina ireinti jitacha Jeripe; iina ojita Erorías. Icantabecari Joan:
—Te ongomeite págabitsatiri iina pirenti.
Iroro yágagantaguëqueri Joan Eroris yomianqueri yoguëshotiaqueri sogatsaquë coshotsari. 5 Icogabeca Eroris iróguirime ira Joan, carari itsorogaiguëri matsiguengajegui. Igóiguë matsiguenga cara Joan icomantëgotëri Tosorintsi. Ijique Eroris: “Aroca nógagantëri, inguisëgotaiguëmari matsiguengajegui”. 6 Aique pareca cataguiteri isantone Eroris. Icaimaguetaiguëri tojai imatsiguenga, yoganinasëretaigapëri. Aro omaninquebintëri osinto Erorías. 7 Iniacaninatobëronta ora tsinane ira Eroris, aro icanquero negaca:
—Pairoraca pomanaquina, aro nomëmiro. Igóque Tosorintsi cara quero namatobitimi.
8 Aro ocomantatsaquero oniro, ocantacaquero negaca:
—Nocoguini pógagantiri ira Joan baotisatantatsiri, aique pomapënaro ora iguito cara tsibetaquë aique nomëro inato cara ogóque aisonorica icamaque.
9 Yogasëreca itingomi cara icantasanotëro, aisati cara iquemaiguëri antagaisati igaimane ora icantasanotëro irisintotsari. 10 Aro igáqueri soraro irobatëaquintiri Joan cara iromingamentoquë. 11 Aique yamapënero tsibetaquë iguito Joan, ipëro irisintotsari. Iroroque përo oniro. 12 Ira irogomere Joan ipocaiguë, yágaiganaqueri cara iritijaigairi. Aique iáiguë, icomantaigapëri Ira Jesos:
—Yogamaguëri Joan Eroris.
Yoguibatëro Jesos itasonguëro pan, yomitojaiganaquero.
(Mr 6.30-44; Ir 9.10-17; Jn 6.1-15)
13 Cara iquemaque Jesos aroque icamaque Joan, iátacagaiguëri irogomerejegui canta tenta ontimengani. Yotetanaca pitotsi. Aisati cara iquemocotaigabaqueri matsiguengajegui ijocaiganaquero iboeborotepague yoguiataiganaqueri cara onamijaquë. 14 Cara yagatocotaigapë Jesos, iniaigapëri tojai matsiguenga ira aguiaigaseguiri. Tojai icantaneintëgotaigapëri yoguibegaigairi janaitaguetatsiri. 15 Aro ochapinitanë cara ipocasitaigapëri irogomere, icantabetaigaari:
—Yaca teca ontimingani, aisati aroque ochapinitanë. Yamai pigátaigueri icaegui matsiguengaca iriáiganaque poeboropaguequë iromananteta iraperi.
16 Icantaiguëri irogomere Jesos:
—¿Pairo iratsipiriobitaiguë iriáigae? Pomaigueri obirojegui ora irapaiguë.
17 Yotabitanëri:
—Teri ine yaca ora nomaiguëri. Yaca aiti oca pan ocarati pabocorooti aisati pitenianti sima. Quero cotonguiboro.
18 Icanque Jesos:
—Pomenaro yaca.
19 Aique yogasobicaiguëri iraegui matsiguenga cara tobarisiquë. Aique yáguëro Jesos ora pan aisati sima. Inetsanaque jonoquë, icanqueri Iriri:
—Pabati, nacarasiatocoquemiro oca noperijeguica popaiguënaca.
Aro itibatsaaguequero pan Jesos, yotsatengaiguëri irogomere cara imaiguëri matsiguengajegui ira aguiataiguërira. Aisati yotsatengaigacari sima. 20 Yapaiguë antagaisati, iquemaigaca. Aique yobiitaguetajiro irogomere ora irangarataneegui, iagajiro 12 cantiri. 21 Tojai yapaiguë sërari icarati 5,000, aisati tsinanejegui, aisati ojaniquitejegui.
Yanëiatanë Jesos jonoicaa nija.
(Mr 6.45-52; Jn 6.16-21)
22 Aique icantaiguëri Jesos:
—Nogomere, potetaiguema pitotsiquë, pobataigue antatinta.
Aique igátaiguëri ira botoibiritaigari:
—Yamai pijáigue pobangojeguiquë.
23 Aro itonganaque Jesos oguitojaquë cara yamanaque, inibatëri Iriri. Ainta Jesos paniro inë cara otsitinitanë. 24 Ora pitotsi aroqueque pinë aganguijaquë, icomatabitacaro irogomerejegui. Te iraretima iroontita omotoncaatasantapa nija aisati poguipigapigatocoqueri coguentima. 25 Cara igogaraaque iáque Jesos aiquero pitotsiquë, yanëiaapë jonoicaa angaare, te iritsitigue. 26 Iniaigabaqueri irogomere, te irogóigueri, itsorogasantaiganaque, icaibaitanë icantobaca:
—¡Eeee! ¡Coraque camagari cara iráganacái!
27 Carari yotabitaigapëri Jesos:
—Quero pitsorogaigui. Naanti bocapaatsi, pinganinasëretëgotina.
28 Aro icabëri Peroro:
—Obiroca Natingomi, pingaimina najáque nanëiatanë jonoicaa nija irooti cara pinasegui Obiro.
29 Yotabitanëri Jesos:
—Omana popogopë.
Aro yaguëtanë Peroro, yanëiatanë jonoicaati nija iáque aique cara inasequi Jesos. 30 Pënibaque irarequimari cara iniaquero nija omotoncaatapa itsoroganë, iparintanaca itsitiganë. Icaibatanëri:
—¡Natingomi, págobaina!
31 Aito cara yacotasitobairi Jesos, yágobagotobairi ira Peroro, icanqueri:
—Arosata piquemisanquina, ¿Pairo pitsoingobiquina?
32 Aro yotetaigaaro pitotsi Jesos aisati Peroro. Aro osantocotanai coguentima. 33 Aito cara iraegui inasegatsi pitotsiquë yobaticagueritotasitaiganacari icantaigabaqueri:
—Aisonori, Obiro Itomi Tosorintsi.
Jesos yogaguibegajiri ira janaitaguetatsiri cara Jenesarequë.
(Mr 6.53-56)
34 Aro imontiaiganaja, yaretaigapaa Jenesarequë. 35 Ainta timaigatsi cara, igótobëri Ira Jesos, icomantëgotaiguëri, yotsatengaiguëri imatsiguengajegui. Aro yamapëneri tojai janaitaguetatsiri. 36 Yamanocopëri cara iranintacaqueri irotsagataigapëri ogarasiquë iguitsagare. Aro yogaguibegaigairi omagaro ira otsagaqueri.