1 Me nediyeŋ Bepaŋ Loloŋnitdi kadokodok nadiŋa adi’walaŋkade uune Bepaŋ Saŋiniŋ Molomdi kadokoune hatilak, adi Yahwedok indiŋ nimbek,

2 “Dagoŋ yahehewe tinamuŋa momooŋ hinek nabudokolaŋ, tiŋa da kubugoŋdi Bepaŋne hatilaŋ. Unduŋ doktiŋa du kubugoŋ nadisukilitigamulat.”

3 Biyagoŋ hinek, Bepaŋdi gehitubu-lodaune nemek gehitubu-kadakadok kabup hebihakiiŋ wendi tuwot mu gehitubu-kadakaneeŋ. Tiŋa undugoŋ, gabu-ulidokoune yagit hogohi fafaŋehi hinek tuwot mu mintagamneeŋ.

4 Adi pupup tamuniŋdi wapmihiŋiye papalidi yehikufulalak wondok tuwolit hinek gehikufulaluwaak. Du Wapum’walaŋ papaliŋiŋ gineŋ hebihalune momooŋ hinek gabudokoluwaak. Adi gabudokodok yalaŋ mu yolak, unduŋ doktiŋa du me kweletalak gut galiŋa yakiiŋ wendok tuwot Wapum’walaŋkade wooŋ galiluwaaŋ.

5 Du timiŋ nemek mikhinitdok munta mu tiluwaaŋ. Be hadapmo nemek maŋiŋ miknit niŋdi pilap hinek mintaaŋ gehitubu-kadakawaakneŋ yoŋa munta mu tiluwaaŋ.

6 Du yagit kadakaniŋdi timiŋ mintagambaakneŋ yoŋa munta mu tiluwaaŋ. Be hadapmo munabuli hogolidi pilap hinek mintagamuŋa gehitubu-kadakawaakneŋ yoŋa munta mu tuluwaaŋ.

7 Me 1 tausendi du halaaŋneŋ yamaiŋgoŋ uŋgoŋ binek kumuneeŋ, be me 10 tausendi kohoge didimeniŋneŋkade binek kumuneeŋ, iŋgoŋ nemek miknit hogoli wendi mu gehitubu-kadakaluwaak.

8 Da daugedi hinek yabune Bepaŋdi me kadakaniŋ titiŋ hekidok kibikoŋhik tubu-udaneyembaak.

9 Du nemek kadakahi gineŋ doktiŋa Yahwe’walaŋkade uune Bepaŋ loloŋnit hinek adi hogokdi gabudokolak, 10 wendoktiŋa nemek hogolidi du foloŋ tuwot mu mintagamuluwaak. Eŋ yagit hogolidi du yokeneŋ mu mintaluwaak.

11 Wapumdi aŋelo hekidok kwanai-mede yembune daŋgoŋdaŋgoŋ waaŋ u adi kedem gabudokoyaneeŋ. 12 Tiŋa kawadedi kayoge youlaakneŋ doktiŋa adi kohohikdi gehitiloneeŋ.

13 Kaŋ du adi laion eŋ miŋgembet miknit eŋ laion pamala tiŋa miŋgembet wapuhi hinek u yehiyaliwaaŋ.

14 Bepaŋdi indiŋ yolak, “Metam nediyeŋ welehikdi hinek nabukahileiŋ adi yadi kotigoŋ yanagilaat. Tiŋa metam nediyeŋ nu hogok hinek nadinamiiŋ adi yadi momooŋ hinek yabudokoluwaat. 15 Adi naninadiune yonadihik nadiyemiluwaat. Eŋ malabumuŋ mintayemiluwaakneŋ nu adigut hatiluwaat. Unduŋ tiŋa kotigoŋ yanagila wohikgigit momooŋ yemiluwaat. 16 Tiŋa wendok tuwahik adi hatihatihik tomboyouyemiluwaat. Unduŋ tiŋa kotigoŋ yanagilene nakat noŋgoŋ hatiyaneem.”