1 Anubanila-wala mana-magarrangaynji-wala, na-Paul niwu-lharrgang lhaawu warruburru-wuy wuu-jambarrgini-wuy. Wurru-yanggi, marri wurru-waliynjiyn. Nga bagu wani-magaa, wani-wurrij-baabara-waa. Anubanila waniirruyn, ni-yanggi Macedonia-wuy.

2 Ni-yaḻdhangi bagala-yung wubani a-lhal-wurraayung-baj, wani-magaa lhugaaguj warruburru wuu-jambarrgini-yinyung. Wani-maṉmangi naadagi-yung, wani-wurrij-baabara-waa. Anubanila-wala ngijang, ni-waliyn Greece-duj. 3 Anubagu ni-burri ni-wulaynbaj na-ḻabama.

Anubanila-wala, niwu-ngaynbandangi ani-yanggi Syria-wuy barrawu-mirri, yagu waadurru-yung warra-Jew wirri-maṉdhangi lhaawu bagu, naadagi-yung ambunu-wini yungguyung na-Paul. Wudani-yung-gala, nigaayung ni-wijangani, ngijang aniigina Macedonia-wuy. 4 Mulung-arrgi-yung waḻya-waḻya wurraanggarra-yanggi. Sopater wubani a-lhal-wala Berea, na-niwiyayung na-Pyrrhus-inyung. Marri Aristarcus marri Secundus wubani a-lhal-inyung a-Thessalonica-yinyung. Marri Gaius a-Derbe-yinyung, marri na-Timothy. Marri Tychicus marri Trophimus, naadiṉi-yumbaa Asia-wala. Durru-yunggaj wurraanggarra-yanggi. 5 Wurru-yanggi Troas-guy raga-ragij-gaj, nga anubagu, nambi-narrangi nurru anaani. 6 Wurrugu, waari anubani-yung anggu-ḻuḻḏuḻwandi ana-marrya. Anubanila nii-lhal-warruyn ana-Philippi, nuu-yabaynjiyn, aḏaba nurru-warrgang. Wulal-wulal mana-miyn.nganga wurrugu, nurru-waliyn Troas. Anubagu nuu-lhangarrmaynjini. Anubagu nurru-burri marang-aynjaabugij marri jarranggay mana-miyn.nganga.

7 Ana-wulhu-wulhurr anubani-yung, nurru-muṉḏugaa. Anubagu nurru-nguni marrya. Nga na-Paul anubagu ni-magini lhaawu. Ni-yambini-wugij wu-mal-gaḻadhangayn, niwu-ngaynbandangi yamba ani-yanggi ngamugijgaj. 8 Anuuguni-yinyung ana-lhirribala ana-gara-rruj, arrawindi wudhalng wu-lhalmbaarrangi. Anubagu nurru-murrmbuliyn.

9 Naagi-yung wulmurr-inyung na-nimuwaj-jung Eutychus. Anubagu ni-burri yuwaagu aawajuwaju-rruj. Na-Paul nigaayung ni-yamba-yambini-wugij. Nigaayung na-Eutychus ni-yingayn, niiḏdhiyn. Anaani ana-wumurrng wuu-waliynjini, ana-wulhu-wulhurr-inyung lhirribala, wugurru daji aḻagaḻa wugurraayung anaani yuwaagu-windiyung malanga-garrwar wu-burri. Anubagala ni-rabini ama-miyn.nganga-wala ni-yaay. Anubani-yung niibirrmayn naagi-yung. Wurraagulhaynjiyn, wunu-marayanggayn, yagu waari, ni-wurrij-guldhiyn. 10 Na-Paul anuwagala ni-yarbiyn naagi-yung, nu-miyn, marri nu-mijgalalini. Ni-yamayn, “Yagi nurru-rugi, ni-wiri,” ni-yamayn. 11 Na-Paul ni-ḻaḻagiiyn, anubani niidadangi ni-yanggi, wubani a-marrya-wuy. Ni-wagiwayn anu-ḏayn nga nurru-nguni. Ni-yambini-wugij anaarrawindi ana-lhaawu. Mana-wuṉ nima-lharrmangi ni-yambini, awaagala waabandirriyn, marri ngarraaḻirr ngi-ḻan.gaḏiyn. Bani-yung marri waniirruyn, aḏaba ni-yanggi.

12 Naadagi na-wulmurr-inyung ni-wiri, wunu-narrangi. Naadagi-yung-gala wurru-wurrij-maṉdhini, wurru-waḻaaḻarrangi.

13 Nurru anaani nurru-yanggi amubama-wuy ama-barrawu-wuy, marri nurru-warrgang Assos-guy. Na-Paul nigaayung mu-mun-gala ni-yanggi. Nurru-yambiynjini, “Yagu ngaambu-lhangarrmaynjang,” nurru-yamayn. 14 Anubani a-lhal-uj bagu nurru-lhangarrmaynjiyn. Aḏaba naagi-yung nurraanggarra-yanggi yuuguni Mitylene-wuy, ana-lhal wu-mayini. 15 Ngarrubagi-yung ngarraaynbaj-duj ngijang yuuguni nurru-yanggi nurru-warubaj-gini a-rilji-wuy, Chios wu-mayini. Ngarrubagi-yung ngarraaynbaj-duj ngarraaḻirr ngijang nii-lhal-warruyn aḏaba, nurru-yanggi yuuguni Samos-guy. Ngarrubagi-rruj ngijang ngarraaynbaj-duj aḏaba yuuguni nuu-yanggi Miletus-guy. 16 Na-Paul yamba ni-wijangani, “Yagi nga-burri ana-baḏag anaani-rruj ana-Asia,” ni-yamayn. Wudanila-wala anubagu waari naanggu-jiibugaa, bandharra-walawaj nuu-wayamangi, nii-lhal-yaḻgiwayn ana-Ephesus. Na-Paul yamba naagi-yung niwu-ngaynbandangi ani-yanggi Jerusalem-guy, ni-nguḻu-nguḻubini, ni-waḻwaḻ-gini. Anaani-yung niwu-ngaynbandangi ani-walangi ngalbaḻang, anubani wu-mayini Pentecost, anu-muwaj.

17 Anubagu ana-Miletus, anubani-yung wani-lharrgandi waḻya-waḻya Ephesus-guy wurru-yanggi, wubani a-lhaawu warruburru-wuy warra-mijiwanggu-wuy wuu-jambarrgini-yinyung. “Numburraaṉina,” ni-yamaa dani-yung.

18 Marri wurru-yanggi nigawi-wuy. Marri wani-magaa. Ni-yamaa, “Gurruwaj, anaani nga-burri baḏag nugurri-rruj, ana-mal-ḏaga-ragij-gaj nga-yanggi Asia. 19 Nganu-yandhurrbangaa na-Buunggawa, marri nga-yaal-murramurra. Anubani-yung nga-ramarr-ngawini marri nga-ruguni. Marri warra-mulung-arrgi-yung ngambi-wurrij-galadi-waa. Marri warra-Jew waadurru-yung wirri-maṉdhangi wiij-galadi-wini. 20 Yagu ngana-magaa andhurrg, waari nga-muḏaḏbangi. Anubani ngana-magaa-yinyung ana-lhaawu, wu-lhaawu-maṉdhina. Warruburru-yung ngarra-yiyini warra-wurru-wurruj anuwaagu anaarabarabalu-rruj, marri ana-lhirribala-waj ana-wumurrng. Ngana-yiyini-wugij. 21 Ngarra-magaa warra-Jew marri warra-Greek. ‘Numburru-wiḻibiḻingiyn anaaladi-wala nugurru, na-God-guy. Numbuu-jambarrgiiyn na-Buunggawa na-Jesus Christ.’ Dani-yung nga-yambini.

22 “Yigaj, anaani nga-yaarri Jerusalem-guy yimbaj. Na-God-jinyung ana-Mawurr nganggu-magana windiyung. Nga-maḻaḻadi ari anggiijaminggarrang anubagu. 23 Nga-yaarri-maynji ana-lhal-aynbaj-baj, anaani wuguuguni nganggu-magana ana-Maṉngulg Mawurr, ari malg-aynbaj ngaynjaarri ngambambi-radbumana, marri ngambambi-wungarri-dhijgana. 24 Na-God anaani ngani-lharrgang, nganggu-wandha-wuguuguni, murrubu nganggu-jadugang. Ngani-yayn nga-mijgalmina, wurrugu marri nganggu-jadugang. Ngambuguuguni ngamba-yiyina warra-wurru-wurruj ana-lhaawu na-Buunggawa ngani-yayn, ana-lhaawu na-God-jinyung anubani-yung ngarrani-walgaṉmaa. Aadanu nganggu-jadugang. Ngaya waari ngambijangang ngayawi-nyinyung anaani ana-wiri.”

25 Na-Paul naagi-yung ni-yambini-wugij. “Anaani nga-yanggi, ngana-magaa na-God-jinyung warru-mandag. Yagu anaanila-wala nugurru yagi aḏaba ngirri-yi-ni ngaya. 26 Anaani ngana-magana ana-yimbaj, ngaya anaani nganaa-gandhurrg-gana nugurru. Nugurru-maynji numburru-wiḻibiḻingiyn na-God-gala marri numburru-ngawang, aadanu waari ngayawi-wala-magaa. 27 Ngaya waari nganggadhuwini, waari nga-muḏaḏbangi ana-magij-jinyung, anaani ana-lhaawu na-God ngani-yayn. Ngana-magana maaḻamburrg-galawaj anaani ana-lhaawu.

28 “Nugurru numburru-dhi-maṉdhina. Numburru-wuguuguni numburru-rangarrina na-God-jinyung warru-mandag. Wugurru wurru-yamana nguynju a-jib-jii. Ana-Maṉngulg Mawurr nani-yayn nugurru, nguynju yadhu numburru-rangarrii ana-jib. Numburru-rangarrii maaḻamburrg-galawaj. Warruburru-yung warru-mandag na-God-jinyung, wani-bayarra-gayn nigawi-nyinyung-mirri wulang. 29 Anaani nga-marrbuy ngaya-maynji anambaarruyn, warruburru-yung warraalaaladi amburru-yaarri anubagala. Nguynju yaga warrubawa waa-nunggarrang, wu-waḏa-waḏaḏ marri wu-marryaadii. Marri wu-yaarri wubani a-jib-guy, marri ambu-wangana anubani ana-jib. Dani-yung amburru-yamana, warraawurru-yung warraalaaladi.

30 “Marri wugurraayung warra-mulung-arrgi-yung nugurri-nyinyung-gala narra-rangarrii-wala, amburru-yambina aladi lhaawu. Warruburru warra-ngaynbandii warra-wurru-wurruj amburru-yagaynjina nguynju wugurri-yii. 31 Nugurraayung nambarra-waḻamin-nayii-wugij, numburraandha-wuguuguni. Numburraawanggina, waari ngaya nga-muḏaḏbangi anubani-yung, anaani-yung ngana-magaa-wugij. Ana-miyn.ngu marri anaani anaarrarra nga-wuguuguni nga-yambini, nga-ruguni, anaani-yung anaagalhal-aḻirr wulaynbaj-gala. Ngana-wiḻibiḻingiyn nugurru, nganaandhurrg-gayn.

32 “Aḏaba nganaarruna nugurru, aḏaba aadanu nurru-burraa a-marang-duj na-God-duj. Marri nigawi-nyinyung ana-lhaawu aḏaba nganiiyii. Niga nani-walgaṉmana, marri nani-yayn ana-lhaawu. Ana-lhaawu anaani nambanggu-waḏa-waḏaḏ-gang. Numburraarra-waṉagana anaarrawindi, anubani-yung na-God ngarraniini warra-mijburrayung-guy. Marri ngarrani-maṉngulg-gana ngagurru.

33 “Nugurru nurru-marrbuy, anubani-yumbaa ngaya nga-burri nugurri-rruj, waari ngawu-ngaynbandangi ana-gold marri anu-ṉuga, yagu mana-yaaḻi. Waari ngamba-yandhawiwandi warra-mulung-arrgi-yung. 34 Anaani nga-mijgalmini ngayawi-nyinyung-mirri anaani ana-marang, anubani-yung anaani nga-ngaynbandangi-yinyung, nga-waṉagaa. Marri wugurraayung warruburru-yung warra-mulung-aynbaj-jinyung nuu-yagaynjini-yinyung. 35 Marri ngana-yiyini nugurri-wuy, warra-mulung-arrgi-yung numburru-maṉmaynjina, numbuu-yamana numburru-mijgalmina, nambarra-maṉmani warruburru warra-bilnyalga-yinyung. Numburru-wijangayii, anubani-yung ana-lhaawu na-Buunggawa-yinyung na-Jesus Christ-yinyung, ni-yamayn ‘Warra-wurru-wurruj-maynji nambambiiyii nugurri-wuy marri nimbirri-mang, yuga wiij-maṉdhina? Nugurru-maynji nambarriiyii, bani-yung anggiij-maṉdhiiyn.’ Dani-yung na-Buunggawa ni-yamayn.” 36 Anaani-yung ni-yambini naagi-yung na-Paul, ni-magini anaani ana-lhaawu.

Aḏaba wani-magaa-wala, aḏaba anaani-yung ni-ḻandharrdhangayn, marri ni-yambini arrwiyaj. 37 Warraawurru-yung ni-bagumayn-gala, aḏaba warraawurru-yung wuu-walgarra-rawaynjini warra-wurru-wurruj. Wunu-bilhargaa na-Paul-wuy, marri wunu-lhawuynjaa. 38 Warraawurru-yung wurru-wurrij-galadi-wiiyn, anaani ana-lhaawu wani-magaa-wala, ni-yamayn yamba niga, “Yagi ngaya anaani ngirri-yi-ni aḏaba.” Marri wurraanggarra-yanggi wubama ama-barrawu-wuy, aḏaba ni-yabaynjiyn.