1 Eme Pol edek ili isos Debi ano iy ili Listra. Eme udu kon doh badeh, ndramak ari ta budon handru manyah udu aliy nyaran Timoti. Tinen badu Juwis ma budon tan handru ndra ta Jises, arile taman badu Grik. 2 Iri lau ta Kindrei badu Listra ma Ikoniyum mara-ei badeh, masiye Timoti. 3 Eme Pol anya kakohok iy ki hawen, ya uru kadek. Eme Pol sani ku-in, tasah iy abudon loboho doh badeh, ndrahu iri Juwis, ya iri tanan tama Timoti badeh, badu Grik. 4 Ya eme oro adek ala bolo kon tinan rakon ala rakon badeh, tiye tanan i tiri lau ta budon handru ta batanau oro aposel hawe oro batun tiri lau ta Kindrei ndrasehek ta aliy, udu Jerusalem nyala iri lau, ma iri ka-en hamon ta aliy. 5 Ma iri lau ta Kindrei abadok ta budon handru tiri ma len mari badeh, kane iri edek i sola.

6 Eme Pol hawe oro lau badu hawen, adek ala loboho kon munyak tinan Prijiya hawe Galesiya. Oro badeh, batiye sahou bala bolo kon tinan badu Esiya bwe. Tasah, Malawin Ndrabun badeh, tiye oro sala. 7 Eme, na len oro ame asahan bada kobek ta kon Misiya badeh, oro anya kanone kala kon Bitiniya katiye sahou, arile Malawin Ndrabun ta Jises baseken bwe ale. 8 Ya eme oro sakalawi kon Misiya ma adek ala andri ala kon tinan Trowas.

9 Eme na ben badeh, lele asahan ta Pol ma iy anyolom ndramak ari badu kon Masadoniya ales indrek iy anya, “Ou ame Masadoniya, ma aseben aso.” 10 Eme ya Pol anyolom lele doh ano le badeh, aso* Luk atorou buk dah aloh Lahou toro Aposel. Udu bolo sahou dah iy atorou aso. Anyolom ta aliy i buku Luk amwenen i se hawe Pol oro udu bolo len oro an kon Pilipai. Ou anyolom ale in ta Lahou toro Aposel kalan 16:40. alokou aso i le rasan, ta aso kala Masadoniya. Tasah, aso tanan Kindrei badeh, aloh aso kala katiye sahou mwasin ki tiri.

11 Eme aso an ndron are Trowas, alakak ame len ma ales ame busu Samotres. Ano len ari ja, aso asahan Niyapolis. 12 Ya eme udu doh badeh, aso adek ala lokei ala Pilipai. Kon doh badeh, kon ari tinan labai udu bolo kon munyak tinan Masadoniya, ya iri Rom atondrok kon doh. Eme aso ado doh len sabe sese.

13 Eme na len ta amunyau badeh, aso ame manan ta madasan tinan ta kon tinan ame kapa gwa anya katakaleh ndrahune kon ta asolom. Ya eme aso manyah ado andri ma asehek sahou i tiri badih atukum ame loboho doh. 14 Eme udu bolo iri badih nane anuhun sahou doh badeh, badih ari nyaran Lidiya udu aliy. Iy badeh, lahou tan ta asih kolau saraman iri amekes awin moroyan na aliy. Iy badu kon tinan Tayataira, ma iy atehei budon tan mara-ei i ta atudun Kindrei. Eme Laban mesekei ndrinen badeh, aseken labai ta anuhun sahou ta Pol asehek. 15 Eme iy hawe lowan oro mara-ei badeh, alomwa oro, ya eme iy kuhi aso ala asiu tan. Ma eme iy tiye i taso ma indrek aso anya, “I buku none ado lomondra jo badih ta budon handru i ta Laban eh, ado kame kado asiu tek.”

16 Na len ari aso anya kala ndrahune kon ta salom badeh, badih lohowan ari malawin ndra-in udu la-un eme bada aso. Iy winiyan tiye sasah kameh asahan udu bwena eme. Iy badeh, ndrakohok luk solo-an solo-an ndra-au ndra tiri lau ta atondrok iy i san ta sehek sasah asahan udu bwena. 17 Iy doh badeh, edek in hamon ta Pol hawe aso marakon, ma iy aloh anya, “Oro lau dah ala tiye sahou ta koha ado kameh udu le buku doh, badeh, oro lohowan ta Kindrei ere bwele-e kindrei mari badu loken.”

18 Eme iy amekes lahou tan doh badeh, len solo-an labai. Ya eme Pol eme ndrinen isi ta aliy, eme iy tubuni iy ma tiye sahou i ta malawin ndra-in anya, “I san ta boto-on ta nyara Jises, jo tiye ou ame len ta la-u badih badeh!” Eme na le liliy, malawin ndra-in udu bwele-en eme len.

19 Eme oro lau tan nane atanan ta san ta akohok toro luk badeh, ndrano, oro ame tawi Pol uru Sailas, ya seheyani uru ame lohalak ndrahu kon ta anuhun sahou, ame mada iri lau ta atondrok kon. 20 Eme oro kuhi uru ame mada iri lau ta anuhun sahou ma tiye anya, “Uru lau dah badeh, badu Juwis, ya uru amekes nono-ou udu bolo kon tinan tataha. 21 Uru badeh, leheya kandriyen bamwenen ta kandriyen tataha bwe; taha badeh, lau badu Rom, ya kandriyen doh taha banone ma winiyan bamekes bwe.”

22 Eme iri lau arou ala la-u Pol uru Sailas ala adai uru, ya eme iri lau ta anuhun ame tiye iri tarani awin ta la-u uru ma a-um uru na malou sakabuk i bek. 23 Iri ubwi uru andra-i labai, ano iri akahei uru ala bolo kou. Eme iri tiye ndramak ta ndrokei ta bolo kou katehei ndrabek kihis ma katondrok uru kamwenen. 24 Iy anuhun sahou iri tandra-un i tan ano badeh, iy atehei uru ala bolo asiu udu bolon handru, ma sawei kati uru ma totowaniy i bolo sabar.

25 Eme i ndrukulu ben alih badeh, uru asolom ma ayah wari ta atudun Kindrei. Ya eme iri lau rayah are bolo kou i buku uru badeh, anuhun uru ayah wari. 26 Eme nawin bwe, kon totoreh ma sali asiu nane dah nyukunyok. Eme madasan mari ta bolo kou dah asak, ma kati iri lau mari udu bolo sabar dah asoh. 27 Ya eme ndramak ta ndrokei atondrok iri, amak anyolom kou mari asak badeh, iy anya iri are bolo kou ndratobwak. Eme iy andrei samen ta anya kidi iy le badeh, 28 Pol aloh anya, “Ou sadai ou! Aso ba-au bwe, aso mari ado kada-ah!”

29 Eme ndramak ta ndrokei dah tanyarei ta sun ma sakaliye ili taku ma totoreh udu mada Pol uru Sailas. 30 Ano iy kuhi uru ame manan, ma eme iy lelen uru anya, “Ah ma la-uh, jo kamekes sasah handru ya jo kakohok kohak handru ta udu le buku doh?”

31 Eme uru anya, “Ou atehei budon tam handru ki ta Laban, idah kameh koham udu le buku doh ma hawe lowam oro.” 32 Ano, uru asehek sahou ta nyala Laban i tan ma i tiri lau nane are bolo asiu tan doh. 33 Eme na le liliy na ben doh, ndramak ta ndrokei doh kuhi uru ma sikine ndrana turu; ano na le liliy, iy ma hawe lowan oro alomwa oro a gwa. 34 Ano iy andrei uru ala asiu tan mesekei nyamon i nuru. Ma oro lowan mari badeh, sekesek tinan handru, tasah oro badeh, ndratehei budon toro handru ndra-en ta Kindrei.

35 Eme kon aleu, iri lau ta anuhun sahou tiye sahou i toro lau ta mwena tiri lulik ala tiye ta ndramak ta atondrok, katiye iri lau doh ka-au ai. 36 Eme iy tiye sahou i ta Pol uru Sailas anya, “Iri lau ta anuhun sahou anya ah ka-au ai. Abo, ah ka-au ma mwasin.”

37 Arile, Pol eme tiye i tiri lau

38 Eme iri lau ta mwena tiri lulik ala hamon tiye i tiri lau ta anuhun sahou, ta Pol uru Sailas badeh, ndra sali kon Rom eme ma iri abwerei iri. 39 Eme iri ame tiye sahou ta tikisiy i turu ma eme iri tiyani uru ame len ta bolo kou ma tiye uru ka-au ta kon tinan. 40 Eme uru ala asiu ta Lidiya, batanau iri lau nane atehei budon tiri handru in ta Jises, ma iri kabadok, ano ma uru au ai.