1 Ano na len Rejel anyolom iy bato-ou nah nadu Jekop bwe badeh, eme madan alikis nadu tinen. Eme badeh iy tiye i ta Jekop, “Ou atehei nah ki ndrinek, bwe kameh jo imek ai!” 2 Eme Jekop ibolosen i tan eme iy tiye, “Jo winiyan bakohok ndrahu Kindrei bwe, iy le badeh baramwekes ou barato-ou nah!”

3 Ano badeh Rejel anya, “I doh badih ta lahou tek Bilhah doh. Ou amadin iy ya iy kato-ou nah keme tek. Eme na iy le badeh lundriyek oro kasola.”

4-5 Eme iy atehei Bilhah badeh i nyara udu Jekop ma Jekop amadin iy, eme ma iy tuwi nah mwan. 6 Ano badeh Rejel tiye, “Kindrei badeh ndramwesekei sahou ma iy ndratehei seken tek; iy badeh anyolom tikisiy tek ma iy atehei tek nah mwan.” Eme nah doh badeh tondrohani nyaran badeh Dan.

7 Ano badih ta lahou ta Rejel ndrinen tinan ja ma iy tuwi nadu Jekop mwan ari ja. 8 Eme Rejel anya, “Jo badeh amwekes lahou boto-on labai hawe nadu tine eme ma jo ndrasakalawi iy.” Eme iy tondrohani nyaran badeh Nabtali.

9 Eme Liya anyolom iy badeh bato-ou nah bwe badeh, eme iy andrei badih ta lahou tan Silpah badeh atehei iy i ta Jekop i buku none udun. 10 Eme Silpah tuwi nah nadu Jekop. 11 Eme Liya badeh anya, “Jo ndramwe-es ai,” eme iy tondrohani nyaran Gat.

12 Ano Silpah badih ta lahou ta Liya tuwi nadu Jekop mwan ari ja. 13 Eme iy tiye, “Jo badeh sekesek labai! I dah kameh iri badih kameh aloh jo, ‘Sekesek.’ ” Eme iy tondrohani nyaran Aser.

14 Na len bwidiu wit uni badeh Ruben ili lokei badeh ndruni kei ta nah aloh mandrake, eme iy kuhiy eme atehei i mine tinen Liya. Eme Rejel eme iy anya, “Liya, nek rayah mandrake ta nadum keme.”

15 Arile i tan badeh iy anya, “Ou mene ndrandrei uduk ka-i ai. Ya i dah kameh mandrake kewek la-un ale?”

Eme Rejel tiye i buku doh, “I buku none ou atehei mandrake ta nadum, ou kameh amadin hawe Jekop na ben kameh.”

16 Eme Jekop udu lokei eme na beyeh badeh, Liya ili aturuk iy, eme Liya tiye, “Jo badeh andrei mandrake ta naduk, atehei ndra na Rejel eme ya na ben kameh ou ame amadin jo.” Eme badeh iy ili badeh amadin iy na ben.

17 Eme Kindrei anuhun Liya, eme Liya ndrinen i tinan ma iy atehei kuwim tan nadu Jekop. 18 Eme Liya anya, “Jo badeh atehei badih ta lahou tek i ta uduk, eme Kindrei badeh atehei nah i sihinek.” Eme tondrohani nyaran badeh Isakar.

19 Ano badeh Liya ndrinen i tinan ja iy tuwi nadu Jekop ja So-on tan. 20 Ano Liya anya, “Kindrei badeh ndratehei tek lakou mwasin labai. Na dah kameh uduk kameh anyolom jo udu mwasin ta madan ai, ma iy kameh masiye jo, tasah jo badeh ndratuwi nah onoh ndra nadun.” Eme iy tondrohani nyaran badeh Sebulun.

21 Ano udu ja badeh iy tuwi badih ma tondrohani nyaran badeh Dinah.

22 Ano badeh Kindrei lomondrani Rejel; iy anuhun iy, eme iy mwesekei ndrom ta ato-ou nah ja amwe-es. 23 Eme ma ndrinen i tinan ma iy tuwi mwan. Ano iy tiye, “Kindrei badeh ndramwesekei tikisiy tek badeh ndrano.” 24 Eme iy tondrohani nyaran badeh Josep, ano ma iy tiye, “Jo aseken Kindrei kedeu tek rayah nah ja.”

25 Rejel atehei Josep eme len ano badeh Jekop tiye ta Leban, “Ou satawi jo, jo anya ki-iu ki kon tek. 26 Jo mene amwekes lahou tam ta uduk uru ma la-uh ma oro nah. Ou atehei oro kame ma jo ki-iu ki len tam. Ou badeh tanam jo mwasin labai len jo amwekes lahou tam.”

27 Arile Leban anya, “Ou badeh mwasin ta madak ya ou winiyan ba-au bwe. Ou ado. Jo badeh ndrada kau, Laban atehei nyosowan eme tek tasah na ou.” 28 Ano badeh iy tiye le, “Abo, sabe ou aseken jo kisih ou.”

29 Eme badeh Jekop anya, “Ou tanam lahou jo amwekes, ma san jo atondrok iri katin haka tam udu mwasin labai. 30 Lakou tam sola bwe len jo eme, arile na dah ndra sola, tasah Laban atehei minen udu la-um, tasah na jo; ma loboho heh jo edek i aliy. Arile na dah badeh jo anya kasilah lakou ta aseben asiu tek ai.”

31 Eme iy lelen, “Jo katehei sasah tam?” Eme Jekop anya, “Ou sanyohan jo lakou. I buku none ou aseken tanan tek doh; jo badeh kameh atondrok katin haka tam ilih le: 32 Jo kameh anyolom iri katin haka tam mari, ma jo kameh lebelei iri sipsip kasen bokodon ma hawe iri me busuwen are len. I doh sihinek ai. 33 Eme ya i buku none len hamon ou kameh i tanam jo badeh ta wasai bwe, buku na ben ou anya ame adeu sihinek. I buku none ari me belen udu bolon tek ma hawe i buku none ari sipsip kasen bokodon udu bolon tek, badeh jo bene-ei tam ai.”

34 Eme Leban anya, “Mwasin. Ki buku none bohom baden.” 35 Arile na len doh le badeh Leban lebelei iri me mwan busuwen ma hawe iri me badih busuwen ma iri sipsip bokodon. Ano iy atehei nadun oro ta atondrok. 36 Ano badeh Leban atehei len taloh udu ndrokowan hawe Jekop ta adek. Ya Jekop badeh atondrok kati haka rayah ta Leban ai.

37 Ano badeh Jekop tatasei andra kei popola ma almon rayah ma kei badeh alim ku-i kei winiya belen asahan bada iri. 38 Eme badeh tatahiy andra kei doh badeh udu bwena ta bwekei ta gwa tiri katin haka. Iy tatahiy udu doh, tasah iri katin haka amwekes mada bun tiri na len iri ame a-un gwa. Eme iri katin haka kanyolom badeh iri kales kala ka-un gwa. 39 Ya i buku none iri me amwekes mada bun tiri are bwena ta kei dah, i dah kameh iri adeu nah bokodon hawe nah busuwen.

40 Ano badeh Jekop lebelei iri sipsip badeh are len labai ta me, ya batala iri badeh ili tiri katin haka busuwen ta Leban. Eme san doh badeh iri katin haka tan bala bolon ta Leban bwe.

41 I buku none iri katin haka boto-on mada bun tiri asahan badeh, Jekop tatahiy andra kei udu bwena ta bwekei ta gwa tiri katin haka eme iri ame amunyau ma iri amwekes mada bun tiri. 42 Arile iri katin haka boto-on bwe badeh iy batehei iri bala aliy bwe. Eme badeh iri katin haka boto-on bwe baden eh a hawe Leban ai, ya boto-on badeh a hawe Jekop ai. 43 I san le doh badeh Jekop asahan ndramak tan lakou solo-an labai. Tan badeh iri katin haka solo-an, ma iri lau tan ta lahou solo-an ma hawe iri kamel hawe donki solo-an ado aliy.