1 Jekop badeh manyah udu munyak mene taman udu aliy aloh munyak Kenan. 2 Ya eme i dah sare nadu Jekop oro: Josep badeh ma loweu le, jaha tan badeh ma ronoh ndro taloh le. Iy badeh udu atondrok katin haka hawe nadu tinen oro ta lundriye Bilhah hawe Silpah, udu Jekop ta nyeu. Oro badeh atondrok iri sipsip hawe me. Ano badeh iy eme, asehek nyala taman ta kandriyen ndra-in ta nadu tinen oro.

3 Jekop badeh aseken Josep tinan labai ja ta nadun oro mari. Tasah nadun doh badeh iy atehei iy badeh udu suniya iy ndra alon. Eme Jekop eme, mwesekei awin lawe-en moroyan labai i ta Josep. 4 Eme nadu tinen oro anyolom tama oro badeh aseken Josep tinan labai ja toro. Eme oro ame badeh amwekes budon ndra-in i tan ma oro badeh bawadei iy bwe hawe basehek sahou mwasin bala tan bwe.

5 Ano badeh Josep eme ameh, eme iy asehek nyala nadu tinen oro. Eme badeh mwesekei budon toro andra-i labai ja tan. 6 Eme Josep asehek i toro anya, “Ado kanuhun ameh tek doh: 7 To mari badeh ado lobwidiu aseu bwidiu wit ise, eme oro bwidiu wit tek badeh toka udu loken. Eme badeh tado mari badeh ame badeh awudi tek, eme ma oro aluh andri i ta tek.”

8 Ano nadu tinen oro tiye i tan anya, “Ou kede-eh anya, i dah kameh ou a kabin ma atondrok aso ai?” Eme badeh oro badeh no-o oro atok tan labai ai, tasah ta iy asehek nyala ameh tan i toro.

9 Ano ja badeh iy ameh ja, eme iy asehek ta nadu tinen oro, “Ado kanuhun, jo ameh ja, i doh ja badeh an hawe bun ma hawe ndrau ma ronoh ari badeh aluh i andri eme tek.”

10 Ano badeh iy asehek ameh doh i ta taman, eme badeh taman arah i tan, “Ameh tam badeh i buku sah badeh? Ou abudon anya i dah kameh tinem ma nadu tinem oro hawe jo kameh kandru aso kameh i andri tam?” 11 Eme nadu tinen oro badeh mada oro badeh alikis tan, arile taman tawiy udu budon tan.

12 Nadu tine Josep oro ndra-au ndrasariye iri katin haka ndrala ndraimon bwidiu mirihik ta Sekem. 13 Eme badeh Jekop tiye i ta Josep, “Ou tanam nadu tinem oro badeh atiye iri katin haka badeh aimon bwidiu ado mirihik ta Sekem. Ou ame, jo anya kaseken ou a hawe oro.”

Eme iy anya, “Mwasin jo aseken.”

14 Eme taman tiye i tan, “Ou ala anyolom nadu tinem oro ma hawe iri katin haka, oro ado mwasin de bwe em, oro ado ndra-in, ano ou ame hamon asehek tek.” Ano badeh taman suni iy edek udu nyamak Hibron ili. Eme Josep asahan Sekem badeh, 15 ndramak ari ndruni iy edek leleya eme, eme iy ndremenya Josep, “Ou takaleh sasah?”

16 Eme badeh iy anya eh, “Jo asilah nadu tine oro. Oro badeh atondrok katin haka. Ou tanam oro ado heh de bwe?”

17 Eme ndramak dah anya, “Oro badeh ndra-au. Jo anuhun oro badeh tiye anya oro kameh ala Dotan.”

Eme Josep in hamon toro ili badeh asahan hawe oro mirihik ta Dotan. 18 Oro anyolom iy edek udu ndra len eme kahis le badeh, oro atilik nyala oro ta anya kadai iy.

19-20 Eme oro tiye i toro ari ari: “Iy ndramak ta ameh asa eme ah! Abo, to kadai iy ma kakahei iy ki bolo oro ari lek, ano to kato-en anya, iy badeh katin haka ndriliu ndrani iy. Ano badeh to kanyolom sasah kameh kasahan ta ameh tan.”

21 Arile Ruben eme anuhun badeh iy anya kaseben ta akohok iy udu mine oro. Eme ma iy anya, “Ndri-i to sadai iy. 22 Kakahei iy le, ki bolo lek kudu lomale an dah, ya to sadai iy ndrayen samou.” Ruben asehek sahou doh badeh, ta iy anya kaseben iy ma iy katiyani iy ki hamon hawe taman.

23 Ano badeh Josep eme isos hawe nadu tinen oro le badeh, oro tawi iy, sadi awin moroyan tan. Awin iy edeu doh nane sowan badeh tinan labai. 24 Ma oro bwese-e iy ma akahei iy i bolo lek gwa bolon bwe dah.

25 Ano oro manyah aimon nyamon, ano oro suri mada oro eme loken badeh oro anyolom iri lau ta Isma-el badeh adek are loboho Gileyat ame. Udu bwele-e kamel badeh lakou solo-an labai, lakou i buku none spais kei ta ndrelekei, bam hawe mer ndraye kei ta bekebek ndrana. Oro badeh adek ala Ijip ta atiye lakou ta sisih.

26 Eme badeh Juda tiye i ta nadu tinen oro, “Saba lakou kameh kasahan ki ta to ki buku none to kadai nadu tine to, ano to kabisiniy? 27 Ado kame iy badeh nadu tine to, to katehei iy ki ta sisih. To badeh sadai iy, tasah iy badeh nadu tine to ma ndraye to le.” Eme badeh nadu tinen oro aseken. 28 Eme iri lau rayah badu Midiyen ame badeh, oro aruwi Josep udu bolo lek eme loken. Ma oro atehei iy i ta sisih i toro Midiyen na su-ubek lunoh silba boroh i tiri lau badu Isma-el ma iri kuhi iy iu ili Ijip.

29 Ano badeh Ruben eme mada lek anya katou nadu tinen, arile nadu tinen aliy bwe. Eme badeh iy sadiy awin tan ma iy tikisiy andra-i labai. 30 Eme iy ili hawe nadu tinen oro ma tiye, “Jo kameh barabwidiy barala buku sah handru? Iy nah badeh aliy bwe!”

31 Ano badeh oro adai me ari imek ano oro andrei awin tan badeh tahiy i ta ndra. 32 Eme badeh oro andrei awin i hawe tama oro ma oro tiye, “Ou none anyolom awin doh se, koro-an ta nadum.” Aso badeh ndruniy. 33 Eme iy anya, “I dah ta naduk le ai. Josep badeh ndramak handru, rayah katin haka ndriliu badeh ndrasadi iy ma ndrani iy.”

34 Eme Jekop tikisiy ma iy sadiy awin tan eme iy asiniy awin ta tikisiy amwekes na lami me ma iy eden ndranye nadun ben solo-an. 35 Nadun oro mwan ma badih ame atamar iy, arile winiyan bwe, iy bwalen. Eme iy tiye, “Winiyan bwe. Jo kameh eden winiya jo imek ta naduk.” Eme badeh iy eden ili le, ta ndranye nadun.

36 Ano udu badeh, udu kon Ijip badeh iri Midiyen atehei Josep ja i ta sisih i ta Podipa. Podipa badeh ndramak ta lahou badu bolo asiu ta kabin, ma iy ndramak ta mwena ta ndrokei.