1 Ya idah jo anya kasehek taha lau nadu batun. Aha kabudon kamwenen ta iri maha-an laba tinan kameh asahan taha hamon, ya aha kaden ma kanyar aha. 2 Iri sanuw taha mara-ei ndrabola, ma ndranyem ndrani kolau taha mara-ei ndrano ndra-au. 3 Bek nyikilikin hawe silba taha badeh, ndrandra-i, ma oro kameh leheyani ndra-in taha eme lewan, ma ani oda aha i buku jih. Saba lakou aha ndratondrokei ma ndratukumwiy kameh ano na len hamon. 4 Aha kanuhun kamwenen! Iri lau ta asoh nyamon badu bolo bilin taha badeh, aha ndrawendreyani iri, ya aha tawi luk tiri ranah nane ta sihine iri, ya sihine iri ranah nane aha tawiy, badeh, aloh i ta Kindrei ta konohei kandriyen ndra-in taha. Ya ndrelen tiri lau ta gok nane ndrasahan ndranye Laban, iy boto-on labai. 5 Len mari aha areu kon munyak, aha akohok iri lakou solo-an mwasin mwasin labai ma aha sekesek ta aliy. Ya aha aimon nyamon tinan, ma bwidi aha apar. Idoh, buku none lau ale anyohan bou apar, ano kameh iri adai iy ta aimon. Idoh i buku le len ta Kindrei ndrame mirihik ta anuhun sahou. Kora-on iy kidi aha ale. 6 Aha badeh, atehei iri lau mwasin ala ta mada sahou, ano aha adai iri amak. Ya iri bateleya mine aha bwe, ma iri bamekes bahun bawek taha ja bwe.* Iri lau ta tanan ra-on anya boho Grik asehek i buku doh: Ya iri bateleya mine aha bwe, ma iri bamekes bahun bawek hamon taha bwe. Arile, iri ra-on ja anya boho Grik asehek i buku doh: Kindrei kameh amekes bahun ewek hamon ewek taha lau nane, aha ndradai iri lau mwasin nane ndramak.

7 Eme ma aha nadu tine mwan ma badih ta Kindrei, aha katehei ndrine aha handru kili ta Laban, ya aha kabwese iri maha-an, ma kabe-en iy ta eme hamon. Aha tana aha, ndramak tan bilin ereu aliy, iy kameh abe-en nyamon mwasin asahan aliy. Iy kameh atehei ndrinen handru, ya iy ereu le abe-en ur hawe an, uru amekes gok turu. Hamon ta aliy, iy barala barakohok sali nyamon tan ai. 8 Aha ale, ndrine aha kudu mwasin, ma kado le katondrok ta bwese iri maha-an anya asahan taha, tasah len ta Laban ta eme hamon badeh, ndrame mirihik.

9 Aha nadu tine mwan ma badih ta Kindrei, aha sanunu-uh ma satebelese hawe nadu tine aha iri rayah ja. Kindrei kameh asahan buku ndramak ta anuhun sahou, ma iy kameh atehei aha ala ta mada sahou. Tasah, iy badeh, ales udu le madasan taha! 10 Aha nadu tine, aha kabudon oro propet bwena mene, oro mene atiye sahou ta nyara Laban. Kandriyen tiri badeh, mwasin labai ta aseben taha. Iri lau ta kaliu badeh, banuhun sahou toro bwe, ma iri amekes kandriyen ndra-in i toro propet doh. Arile, oro atehei ndrine oro udu mwasin ta bwese iri maha-an. Aha badeh, kandrei kandriyen toro doh, ma ka-en hamon ta aliy. 11 Taha badeh, asehek i buku doh, “Iri lau badeh, atehei ndrine iri ta bwese iri maha-an, iri sekesek ma ado mwasin. Tasah, iri badeh, banoh ta a-en hamon ma batebelese sahou ta Laban bwe. Iri a-en le hamon ta sahou tan handru.” Aha mara-ei badeh, ndranuhun ma ndratanan kundruh ta Jop. Iy ale atehei ndrinen, ma bwese iri maha-an marakon asahan tan. Ma aha tanan, udu hamon badeh, Laban amekes mwasin i tan ja. Laban badeh, irek ta tikisiy eme ma, iy badai taha mwan ma badih badu kon munyak bwe.

12 Aha nadu tine mwan ma badih ta Kindrei, lakou ari laba tinan labai, jo anya kasehek taha ma aha kamekes badeh, i buku doh: Buku none aha anya katandrakan badeh, aha saloh ma sanyek sala kandrah o kon munyak, o saba lakou ja, ta amekes sahou tam kabadok handru, ta iri lau katehei budon tiri kili le ta aliy. Buku aha anya, “Handru,” badeh, “Handru” le ka-i ai. Ya, buku aha anya, “Bwe,” badeh, “Bwe” le ka-i ai. Kora-on aha kasehek sahou “Handru” kili bolo sahou wasai, ya idah kameh, Kindrei edeu maha-an laba tinan labai ewek la-u aha.

13 Buku ndramak ari tado bwese maha-an, mwasin ta iy kasolom kili ta Kindrei. Buku ndrine iy ari badeh, sekesek, mwasin ta iy kiyah wari ta atudun nyara Kindrei. 14 Buku ari tado ibo sik, mwasin ta iy kaluhi oro lau an bwena ta lau ta Kindrei kame hawen. Ya, ta nyara Laban, oro kasolou ndrelekei ki badan, ma oro kasolom ki ta Kindrei, kamesekei ndramak nane kasahan kamwenen ja. 15 Buku aha asolom, ma atehei budon taha in ta Kindrei handru, badeh kameh, winiyan bwidi ndramak amwenen ja. Ya, buku none iy ndrataku ta kandriyen ndra-in, Laban winiyan mani kandriyen ndra-in tan doh.

16 Eme ma, aha ari ari badeh, kasehek nyala kandriyen ndra-in taha nane ki tiri lau ta Kindrei ra-on ja. Ya aha kasolom kili ta Kindrei ta iy kamesekei aha kasahan kamwenen ja. Tasah, buku are mwan o badih, iy mwasin mara-ei ta mada Kindrei, ya salom tan nyamun labai, badeh kameh winiyan sebenei lau solo-an labai asahan mwasin. 17 Alaija badeh, i buku le taha dah. Iy asolom boto-on labai, ta Kindrei satehei ur same andri, eme ma ur bame andri bwele-e munyak bwe, winiya jaha taloh hawe bun onoh. 18 Udu hamon ta aliy ja badeh, iy asolom i ta Kindrei ja, ya kandrah atehei ur eme andri, ya iri nyamon ateh ja ereu bolo bilin i buku le bwena.

19 Aha nadu tine mwan ma badih ta Kindrei, buku ari taha iy ndraruwani sahou handru ta Kindrei, ya iy ndrataku ndrala bolo iri kandriyen ndra-in, ya ari tataha badeh, kandrei iy keme hamon ja, nadu tine taha nane doh badeh, amekes kandriyen mwasin labai mara-ei ta akohok iy eme hamon ja. 20 Aha katehei sahou dah kamwenen kudu budon taha: Buku ado ari ala hawe ndramak nane ta amekes kandriyen ndra-in, ma sebenei iy, ya iy ruwani kandriyen ndra-in tan mara-ei, ma iy eme hamon ta san mwasin ta Kindrei, mwasin handru. Tasah, nadu tine to nane doh ndrakuhi malawin mara-ei ndrame hamon, ya iy kameh winiyan bamak bwe. Ta kandriyen tan doh le, Kindrei kameh mani kandriyen ndra-in tan mara-ei iu.