1 Iri Parasi hawe Sadusi ame hawe Jises anya kanone iy. Oro tiye tan ta amekes ari lahou tinan ta leheya buku none iy amekes gok ta Kindrei handru.

2 Arile iy asumon oro i buku doh, “Na beyeh ado anya, ‘Mada kon ndra saram. Sebwe idah kameh jor bwe ma kon mondrei nadeh.’ 3 Na mandraben ado anya, ‘Asi kandrah ndra bokodon ma mada kon ndra saram. Sebwe na idah kameh jor atohou ma ur undruk nadeh.’ Ehe, ado atou kalem ere bolo kandrah, ma tiye amwenen. Arile ado batou ma baleheya bamwenen iri kalem ta len dah bwe.* Iri lau ta tanan rayah abudon kalan 16:2-3 Metiu amwenen batorowenei bwena bwe. Iri anya ndramak ari ja torowenei hamon. 4 Iri lau mwan ma badih ta len dah badeh, lau ndra-in handru, ma iri batehei ndrine iri handru bala ta Kindrei bwe. Iri ndremenya ta anya katou kalem, arile winiyan bwai. Kalem ari le kameh iri atou, kalem ta Jona.” Eme ma Jises ruwani iri ma iy iu.

5 Jises hawe oro lau tan ala kapa gwa li bilisiu, arile oro lau tan maniy, ma oro bakohok jabi ramen bwe. 6 Eme Jises tiye toro i buku doh, “Ado kanyolom kamwenen. Mada ado kaleu ta yis tiri Parasi hawe Sadusi.”

7 Eme oro lau tan asehek sahou ndrokowa oro amwenen, “Sebwe iy amekes sahou doh tasah to bakohok jabi ramen bwe nadeh?”

8 Arile, Jises tanan ta sahou nane oro asehek, eme iy tiye i buku doh, “Ado lau budon tado tinan handru bwe. Buku sah handru ado asehek, anya ado jabi ramen bwe? 9 Sebwe mada ado baleu bwe le nadeh? Ado ndramaniy ja, ta limeh jabi ramen mene iri lau ma lamawa (5,000) aimon? Ma bwak sabe mene erah ado anyuhiy? 10 Ado ndramaniy ja ta jabi ramen ma ndro taloh iri lau ma hawa (4,000) mene aimon, ma bwak sabe ado anyuhiy? 11 Buku sah handru budon tado kede-eh baleu bwe le? Jo babudon ta jabi ramen bwe. Mada ado kaleu ta yis tiri Parasi hawe Sadusi.” 12 Oro anuhun sahou doh, ma oro atana oro buku iy basehek ta mada oro kaleu ta yis ta amekes jabi ramen, bwe. Arile, iy anya mada oro kaleu ta sahou toro Parasi hawe Sadusi oro leheya iri lau na aliy.

13 Jises iu ili loboho kon tinan Sesariya Pilipai. Kala doh iy ndremenya oro lau tan i buku doh, “Iri lau anya Nadu Ndramak Awas, iy are lau handru?”

14 Eme oro anya, “Lau ra-on anya ou Jon ta alomwa. Ya ra-on anya ou Alaija, ya ra-on anya ou Jeremaya, deh ou ari propet.”

15 Eme Jises ndremenya oro, “Ya ado amwenen anya jo are lau?”

16 Saimon Pita asumon iy i buku doh, “Ou Krais, Kindrei suni ou ame dah. Ou Nadu Kindrei kohan handru udu aliy.”

17 Eme Jises asumon sahou tan i buku doh, “Saimon, ou nadu Jon, ou winiyan sekesek. Tasah, ari ndramak badu kon munyak baleheya ou ta sahou dah bwe. Idoh tama le udu kandrah, iy leheyani sahou dah ewek tam. 18 Ya jo tiye tam i buku doh: Ou Pita,† Boho iri Grik Pita badeh, moson bek. ya jo kameh amekes iri mwan ma badih tek asahan i buku asiu salom tek, ya ou kameh aseben iri i buku ndru bek aseben asiu ales boto-on udu bwele-e munyak dah, ya Satan hawe boto-on ta imek kameh winiyan batohowei asiu salom tek doh bala andri bwe. 19 Ya jo kameh amekes nyaram ki buku nyarak. Iri lakou ou asehek iri mwan ma badih kamekes udu munyak dah, mwasin, Kindrei udu kandrah mukuni ale. Ya saba lakou ou turukiy udu kon munyak, idoh kameh Kindrei ale turukiy udu kandrah.” 20 Eme Jises batanau oro lau tan boto-on labai i buku doh, “Ado sasehek nyala lakou dah sala ta ari ndramak, anya jo badeh, Krais, ndri-iy.”

21 Kala doh Jises leheya oro lau tan anya iy ki-iu kili Jerusalem. Ya iy kameh akohok sisi-in solo-an labai ereu mine iri lau tinan areu bwena, ma hawe iri lau tinan tiri pris, hawe iri lau tanan ta sahou batanau. Ya iri kameh adai iy imek, ya len taloh ano iy kameh amak ja. 22 Pita anuhun sahou doh, ya iy seheyani Jises i kabwak, ma iy ibolosen i tan i buku doh, “Laban, sebwe lakou doh kameh winiyan basahan tam bwe nadeh.”

23 Arile Jises tubuni iy ma iy asehek ta Pita i buku doh, “Satan, ou a len a konak! Ou anya aturuk san tek. Ou ba-en hamon ta budon ta Kindrei bwe. Ou a-en hamon le ta budon tiri lau.” 24 Eme Jises tiye toro lau tan i buku doh, “Buku none ari ndramak anya ki-in hamon tek, mwasin, iy kamani iri so-ok tan mari, ya iy kabwese-ei kei tondreh tan, ya iy ki-in hamon tek. 25 Tasah, buku none ari ndramak anya katawi kohan kudu, kohan kameh ano. Arile, buku none ari ndramak abudon jo ya kohan ano, iy kameh winiyan andrei kohan ja. 26 Ya, buku none ari ndramak kuhi lakou mari badu kon munyak, ya iy kimek, iri lakou doh kameh sebenei iy i buku sah handru? Ya lau kadeu saba sowan handru kameh ta akohok kohan keme hamon? 27 Nadu Ndramak Awas kameh eme ma lomadan ta taman. Ya iy kameh eme hawe oro angelo tan. Na len doh kameh iy edeu ndramas i tiri lau mwan ma badih i le winiya le kandriyen iri amekes. 28 Jo asehek sahou handru ewek tado. Lau ra-on ales areu bolo to dah kameh bamak bwe, ya iri kameh atou Nadu Ndramak Awas eme hamon ma atondrok kon munyak i buku kabin.”