16
Oro angelo ma ndro taloh asolou losen ta Kindrei udu bolo bwekei
1 Ano badeh, jo anuhun boho ndramak ari asehek sahou boto-on labai udu bolo asiu
tinan ta Kindrei ili toro angelo ma ndro taloh i buku doh, “Ado kala kasolowei bwekei ma ndro taloh losen ta Kindrei udu bolon kodo-oh ki-iu kili andri bwele-e kon munyak!”
2 Iy asehek sahou ano le badeh, jo anyolom angelo ari atah ili solowei bwekei tan amou ili bwele-e kon munyak. Eme ma se nawin bwe, soso-ou ma hawe sisi-in ndra-in mara-ei badeh, asahan bada iri mwan ma badih, iri nane kalem ta nyabwe munyak udu bada iri ma iri atudun malawin iri bwidiy na sukumada kei.
3 Ano, angelo ari ja ili solowei bwekei tan amou ili bwele-e ndras. Eme ma gwa ndras asahan i buku ndraye ndramak imek, eme ma iri lakou mara-ei, bwisik ma tinan, are bolo ndras, mara-ei amak.
4 Uru angelo la-uh ndrano ai, iy ari eme len ja solowei bwekei tan amou ili bwele-e gwa lakon ma kaloh mara-ei. Bwekei doh asahan ili taloh ai. Eme ma gwa mara-ei asahan ndra. 5 Eme ma jo anuhun boho angelo atondrok gwa mara-ei nane asehek i buku doh,
“Ou ndrabun labai.
Ta sahou tam, ou anuhun sahou tiri lau ndra-in amwenen labai.
Tasah, nadah ou are aliy, ma ndra bwena mene ou are aliy ale.
6 Iri mwan ma badih mene ale adai ma bwidi ndraye iri lau ma hawe iri propet tam amou.
Eme ma ou atehei ndraye iri lau badeh, ili wa-i iri.
Eme ma iri akohok bundruwe ndra-in tiri amwenen.”
7 Ano ja badeh, jo anuhun ndramak ari udu loboho mada koto-ok, asumon boho angelo nane i buku doh,
“Ya, ou Laban handru, ou Kindrei,
boto-on marakon udu tam.
Ou badeh, aleben iri mwan ma badih are ta mada sahou,
iri sahou tam badeh, ndra handru le, ma amwenen mara-ei.”
8 Ano badeh, angelo ari ja eme len ili solowei bwekei tan amou amwenen ili bwele-e an, ma jih taladan eme loken, ma sulumwi bada iri mwan ma badih. Ya bwekei doh ili asahan hahuw ai. 9 Jih ta an nane doh badeh, nyarahan labai ma sulumwi bada iri mara-ei atabuk, eme ma bwidi iri abolosen, ma iri aten nyara Kindrei. Tasah, Kindrei badeh, amekes iri lakou mara-ei nane doh. Eme ma iri bwale iri ta tobolowe ndrine iri, ma ta a-en hamon ta sahou handru, ta atudun nyara Kindrei.
10 Ya, iy angelo ari ja eme ili solowei bwekei tan amwenen ili bwele-e koyeu ta nyabwe munyak. Ya bwekei doh ili asahan limeh ai. Eme ma lulik asahan tubuluhi tondrok ta nyabwe munyak. Eme ma bwidi iri lau atohei kalime iri, ta sisi-in tiri nane doh. 11 Iri abudon ta sisi-in hawe soso-ou tiri, eme ma bwidi iri aten nyara Kindrei badu kandrah. Arile, iri badeh, batubuni ndrine iri ma batehei kona iri bala tiri kandriyen ndra-in nane iri amekes bwe.
12 Iy angelo ari ja badeh, ili solowei bwekei tan amou amwenen ili bwele-e gwa tinan Yupretis. Ya bwekei doh ili asahan onoh ai. Eme ma gwa Yupretis asamar mara-ei, ta adik san tiri kabin badu loboho rai mara-ei kameh ame. 13 Ano ja, jo anyolom oro malawin ndra-in ma taloh, kotowa oro i buku basen. Oro ado boho mwak laba tinan banin ere aliy sandroh ame len, ma udu boho nyabwe munyak, ma udu boho propet ta wendreya ale. 14 Oro basen ma taloh doh badeh, malawi oro ndra-in labai, ta amekes iri kalem solo-an hawe lahou tinan. Oro ma taloh badeh, ala hawe iri kabin marakon tiri mwan ma badih badu kon munyak. Iri anya katukum iri kala le se kamekes bahun kameh udu bada len laba tinan ta Kindrei, boto-on mara-ei udu tan.
15 “Aha ari ari kanuhun! Jo Jises, jo kameh ewek i buku ndramak ta bahana!
Eme buku are mwan o badih, iy atehei ndrokei amwenen na bolo len mara-ei,
ma lowosani kolau tan kudu mirihik tan, iy kameh winiyan badek ndrakane mada iri lau, ma iri lau winiyan banyolom badan bwe.
Iy lau doh badeh, kasekesek.”
16 Eme ma, malawi oro balik ma taloh nane badeh, ame tukumwi iri kabin mara-ei ala le loboho doh, i boho Hiburu badeh, iri aloh Amagedon.
17 Ano, iy angelo in ndrobek toro mara-ei badeh, ili solowei bwekei tan amou ili bolo kandrah. Ya bwekei doh ili asahan ndro taloh ai. Eme ma ndramak ari ales mirihik ta mada koto-ok udu bolo asiu tinan ta Kindrei, iy asehek sahou i buku doh, “Lakou marakon badeh, ndrano ai.” 18 Bolo len doh badeh, kalik takamek ili eme, ma kuruh atohou, kurutuwen laba tinan labai, ndroi asahan, iy nyokoda kon ma kon munyak mara-ei totoreh andra-i mara-ei. Ndroi ari le doh badeh, i randrah labai, bala buku iri ndroi rayah ale Kindrei amekes kala iy bwidi iri lau manyah bwele-e munyak eme taku dah, bwe. Iy ndroi le doh badeh, iy ndra-in, ndra-in labai udu bolo iri ndroi mara-ei! 19 Kon tinan nane iri aloh Babilon, badeh asak asahan i tolokon, ya kon tinan badu kon munyak tinan mara-ei, badeh, irou i andri ma ano iu. Ya, Kindrei badeh, bamani kandriyen ndra-in mara-ei tiri mwan ma badih badu kon tinan Babilon amekes bwe. Eme ma bwidi ndrinen ibolosen labai, ma iy a-um iri na lakou doh. Ya, iy bokoro-ei iri badeh, eme ma iri asahan i buku iri lau a-un waen solo-an labai, ma iri abo sik i ndra-in mara-ei. 20 Ya, ndroi laba tinan nane asahan badeh, ndratolomwani iri busu mara-ei udu bolo ndras laba tinan, badeh ndratuh ndra-au ndrala baha ndras. Ma iri mandrei mari ale arou ame le andri, ma atohou iu laleyah, ari madan bwe. 21 Ma ur laba tinan undruk eme andri i buku bek. Maha-an ta mada ur ari ari doh badeh, i buku kilo ma lomonoh (50). Ur doh badeh, i buku bek, undruk udu bolo kandrah eme andri ili bwele-e iri mwan ma badih badu loboho kon munyak mara-ei, ma bokoro-ei iri andra-i labai. Eme ma, iri aten nyara Kindrei ta ur i buku bek nane bokoro-ei iri.